Nola inprimatu hainbat argazki orri batean Gthumb erabilita

Gthumb GNU/Linuxen argazkiak, irudiak eta bideoak ikusteko eta lehenengoen edizio txikiak egiteko aplikazio interesgarria da. Edizio berezietarako Gimp egokiagoa da baina argazkien ohiko edizioa egiteko (berrenkoadratu, begi gorriak kendu, biratu, koloreak zuzendu...) oso egokia.

Gaurkoan azalduko dut nola inprimatu hainbat irudi edo argazki orri batean.

Lehenik eta behin Gthumb ireki eta inprimatu behar ditugun  irudiak dauden karpetara joango gara. Bertan Ctrl tekla zanpatua inprimatu behar ditugun irudiak hautatuko ditugu.

Ondoren eskuin klik egin eta inprimatzeko aginduko dugu.

nprimagailuaren aukeretan,  Prestatu orrialdea fitxan, paperaren orientazioa hautatuko dugu (bertikala edo horizontala) eta Irudiak atalean zehaztuko dugu irudiak zenbat errenkada (Rows) eta zutabetan (Columns) inprimatu nahi ditugun.

Aukera dugu orriari titulu edo oina jarri eta argazkien epigrafe bezala izena, data edo beste datu batzuk jartzea. Kito.




Gthumb ez da instalatzen Ubunturekin batera baina aukera dago Software-zentro-tik instalatzeko edo terminalean hau itsatsita:

sudo apt-get install gthumb

Netvibes Google Reader-en ordez

RSSak irakurtzeko Google Reader erabiltzen baduzu jakingo duzu uztailaren batetik aurrera zerbitzua bertan bera utziko duela Google-k. Aukerakoak bilatzeko beta nahikoa badago baina nik dagoeneko aldaketa egin dut.

Blogen harpidetzak irakurtzeko bi sistema nagusi daude bezero aplikazio bat instalatzea edo web baten bidez irakurtzea. Biren artean bigarrena iruditzen zait interesgarriena batetik azkarragoa dabilelako eta bestetik edozein ordenagailutik erabili daitekeelako ezer instalatu gabe. Hori erabakita bigarren erabakia zein web erabiltzea RSSak irakurtzeko. Asko daude eta batzuk oso itxura ona dute. Nik bakarra komentatuko dut bertan: Netvibes.

Zergaitik Netvibes? azkarra, argia eta praktikoa delako.

Netvibes harpidetzen jarioak irakurtzeko web zerbitzua baino gehiago da atari-orri pertsonalizatua da: web-widget edo zerbitzu-leihatilen edo moduluen bidez hainbat aplikazio bil dezake orri batean edo hainbat fitxatan. Zentratuko naiz RSS jarioetan eta bukaeran aipatuko dut beste aplikazioren bat.

Ikus dezagun nola erabili Netvibes RSS jario irakurgailu moduan.

Lehenik eta behin beste RSS-irakurgailu bat erabiltzen baduzu zure harpidetzak

esportatzea komeni zaizu.
Google Reader-en kasuan: Ezarpenak > Reader Settings >

Import/Export > Download your data through Takeout >

 

 Create archive >

Download > Horrek sortzen du zip fitxategi konprimitu bat gorde edo zuzenean ireki behar duguna > Behin deskonprimitua interesatzen zaigun fitxategia subscriptions.xml izenekoa da.

Orain Netvibes-ekin hasiko gara lanean:

Lehenik eta behin netvibes.com orrira joango gara eta, lehendik egina ez badugu, erregistratu egingo gara. Zure sistema euskaraz badago Netvibes-en eduki nagusiak euskaraz azalduko zaizkizu. Ikus dezagun nola inportatu Google Readerretik esportatu ditugun jarioak:

Gehitu edukia > Jario bat gaineratu > inportatu > arakatu, lehengo subscriptions.xml fitxategia hautatuko dugu eta inportazioa gauzatuko da.

Orain ikusiko dugu nola egiten dira Netvibes-en oinarrizko atazak:



Nola egin harpidetza berri bat.
Interesgarria iruditzen zaizun blog edo web-orri dinamiko zaudela RSS-en ikur laranja klikatu eta netvibes hautatu edo orriaren helbidea kopiatu eta aurreko irudian agertzen den leihatila zurian itsatsi.







Nola irakurri jarioak.
Jarioak bi eratara ikus daitezke: widget edo leihatila-moduluak eta reader edo zerrenda. Gustu kontua da. Aukera aldatzeko bat edo bestea klikatuko dugu.

Ikus dezagun ikuspegi biak:

Mezuak irakurtzeko nire aukera reader da baina widgets ikuspegia interesgarria da mezu zaharrak ikusteko (reader ikuspegian soilik irakurri gabeko mezuak ageri dira eta widgets ikuspegian azkeneko zazpi mezuak) eta harpidetzak ezabatzeko (leihatilaren menuan X sakatuta).
Reader ikuspegian eskuineko panelak erakusten digu blogak eta markatuta eta parentesi artean zenbat mezu irakurri gabe agertzen da. Nahi izanez gero panelaren ezker aldean klikatuta autoezkuta daiteke eta sagua ezkerretara bidalita ageriko da. Bideo honetan ikusten ahal dugu nola autoezkutatu panela:



Nola aldatu itxura:

Netvibes hainbat gai edo itxura aurretik eginak ditu eta aukera ematen du nor berea diseinatzeko. Aukera hauek aldatzeko netvibes-en panelean ekualizadore itxura duen ikonoan klikatu eta Gaiak > Gallery  atalean hauta edo alda dezakegu gura dugun itxura. Goiko irudi eta bideoan agertzen dena Darkvibes gai iluna da -gauez irakurtzeko egokia bista gutxiago nekatzen duelako-.


Irakurgailuaren bestelako aukerak.
Aukera guztiak ez ditut azalduko baina interesgarria iruditzen zait aipatzea mezuak irakurrita moduan marka (Mark all as read) daitezkeela irakurtzeko gogorik ez badugu edo kontrakoa irakurketa sakonagoa merezi badu markatzen ahal dugu ez irakurrita bezala edo geroko irakurtzeko (Read later). Era berean mezua interesgarria iruditzen bazaigu parteka dezakegu (Share) e-posta, Facebook edo Twitter bidez.

Netvibes-en beste aukerak.
Hasieran aipatu bezala RSS aparte bestelako widget edo modulu pila bat eskaintzen du. Horiek erabili nahi baduzu widgets ikuspegiko panela-tabuladorean fitxa berri bat irekitzea komeni da (paneleko eskuin aldeko plus-ean klikatuta) eta tabuladore edo fitxa berri horretan jar dezakegu interesatzen zaizkigun widget edo eduki berriak. Pertsonalki interesgarriak iruditzen zaizkit: egitekoen zerrenda (To do list), eguraldia, e-posta, albisteak...


Bukatzeko. Ni oso kontent nengoen Google Reader-ekin eta uztailatik aurrera zein erabili buruan nuen baina honez gero Netvibes erabiltzen dut Google Reader baino garbiago eta praktikoago iruditzen zaidalako.
Google-i kritika gogorrak egin dizkiote erabaki honengatik. Ni ez naiz horretan sartuko baina blogari baten komentario oso argigarria iruditu zait: esaten zuen Google-n produktua ona izanda ere konpainiak utzita zuela eta egoera horretan bertan behera geratzea positiboa zela  haren segmentua eskuratu nahi dutenak mugiaraziko duelako eta RSS irakurgailu gehiago eta hobeak izango digulako. Hala izan dadila.
Google Reader hil da. Gora Netvibes edo ...

Korrika 18ren mezua

Andoaindik abiatu eta bi mila kilometro baino gehiago eskuz esku ibili ondoren Baionara iristean lekuko barneko mezuak -Amets Arzalluz-ek idatzia- argia ikusi du.



Animazioa ffDiaporama aplikazioaz egina da.

Creative Commons eskema

Xmind aplikazioarekin egindako eskema.

 


Creative Commons tipologiak konbinatuz zehazten dira lanaren gaineko eskubide orokorrak.

Eskuinekoak  dira ohiko konbinazioak.

Zure lana partekatzeko egokien deritzozuna aukeratu ondoren creativecommons.org web orritik deskarga dezakezu svg, eps edo png formatuan zure lanaren ageriko toki batean txertatzeko.



Hona hemen Txopik egindako semaforo-eskema:

Ezkerreko irudia PNG formatuan dago handiagotu behar baduzu hobe duzu SVG bertsio bektoriala deskargatu.

Nola instalatu LibreOffice 4 euskaraz Ubuntun PPA bidez

2013/9/5ean eguneratua.

Badira hilabete batzuk LibreOfficek 4 bertsioa kaleratu zuela baina Ubunturen software biltegian, zuhurtziaz, 3. bertsioa eskaintzen da oraindik.

Bada, edonola, modu erraz bat instalatzeko 4. bertsioa eta PPA du izena. Modu honetan aparteko software-biltegi bat erantsiko diogu sistemari, kasu honetan aplikazioaren garatzailearena.


Eta zer berri LibreOfficen?  Gauza mordo bat, aldaketa handia ez bada ere errendimenduaren hobekuntzak gain -abiatzeko denbora nabarmen murriztu dute- hainbat tresna berri sartu diote. Ezagutu nahi badituzu askatze-ohar edo ReleaseNotes orrian agertzen dira funtsezkoenak.

4. bertsiora pasatzen animatzen bazara horrela egin dezakezu: ireki terminala eta ondoko aginduak hurrenez hurren exekuta itzazu:

sudo add-apt-repository ppa:libreoffice/ppa
sudo apt-get update

ondoren, Gnome erabiltzen baduzu (ohikoena)

sudo apt-get install libreoffice libreoffice-gnome

eta KDE erabiltzen baduzu

sudo apt-get install libreoffice libreoffice-kde

Instalatu ondoren probatu eta, euskaraz ez badago, sistemaren ezarpenetara jo eta  Hizkuntza Sostengua klikatu eta osatu sostengua.

Beste sistema bat erabiltzen baduzu LibreOffice-ren web orrira joatea duzu deskarga egiteko.

Eguneratzea 2013/7/14
Xuxen euskarazko zuzentzaile ortografikoa oraindik ez da automatikoki instalatzen, beraz eskuz instalatu beharko duzu. Librezale elkarteak Xuxen LibreOffice 4rako atondu du eta LibreOffice Extension-Center-etik  deskarga (570KB) daiteke.
Deskargatu ondoren LibreOffice-ren menuan Tresnak > Hedapen kudeatzailea > Gehitu eta arakatu deskonprimitutako oxt fitxategia. Instalazioa bukatzean berrabiarazi LibreOffice eta kito.

Smart ez dabil Ubuntu 12.04 eguneratu ondoren (konpondua)

Hainbat eskoletan erabiltzen den Smart arbel digitala Ubuntu 12.04.1 eguneratu ondoren ez dabil. Hori gerta daiteke baldin eta eguneratzean kernela ere eguneratzen bada.

Hori saihesteko bi era daude: lehena eguneratzeak ez egitea, bigarrena eguneratzea  eguneratzeen gestorearekin egin beharrean "sudo apt-get update"- "sudo apt-get upgrade" eginez. Baina dagoeneko berandu bada eta zure arbelak interaktibitatea galdu badu egin behar dena da nwfermi paketea berriz instalatzea.

Horretarako
1- Software-zentrora joan, nwfermi bilatu eta desinstalatu.
2- https://launchpad.net/nwfermi/trunk/0.6.5/+download/nwfermi-0.6.5.0_i386.deb orritik nwfermi-0.6.5.0_i386.deb fitxategia deskargatu karpetara nagusira eta terminalean honako hau itsatsi:
sudo dpkg -i nwfermi-0.6.5.0_i386.deb

3- Berrabiarazi eta kito.