Firefox-ek 152 bertsiotik webguneak euskarara itzuli ditzake

 151. bertsioan probatan ibili ondoren 2026/2/19an estreinatu den 152. bertsioan Firefox-ek webguneen hamarka hizkuntzen  itzulpena eskaintzen du eta, itxuraz, oso ondo egiten du.

 Ezarpenetako Hizkuntza > Itzulpenak atalean zehaztu daiteke:

• Euskaraz ez dauden webguneetan itzulpena automatikoki eskaintzea.
• Nahi duzun hizkuntzetarako itzulpena automatikoki egitea
• Zer hizkuntzak ez itzuli inoiz.
• Zer webgune ez itzuli inoiz.
• Eta deskargatu daitezke hizkuntza paketeak itzulpenak azkarrago edo lineaz kanpo egiteko. 

 

Spliit: gastuak partekatzeko laguntzen duen web zerbitzua

 Lagunen artean edo familian ospatzen diren jaia, bidaiak, opariak edo proiektu txikien gastuak erraz eta argi zerrendatu, dokumentatu eta sortzen partaide bakoitzak zorrak kitatzeko saldoak kalkulatzen duen web zerbitzua da Spliit (split it, zatitu ezazu espresiotik).

Erabiltzeko aski da instantzia ofizialera jotzea:

  

https://spliit.app/ 

Nola funtzionatzen du:

  Hasteko, antzeko zerbitzua eskaintzen duten Splitwise edo Tricount zerbitzu pribatiboetan ez bezala, zerbitzu honetan ez da erregistratu behar erabiltzeko. Web orrian sartu, talde bat sortu, partaideak zehaztu eta  gastuak partekatuko dutenen artean mezularitza edo posta elektronikoaren bidez taldearen esteka banatu eta hortik aurrera partaide bakoitzak egiten dituen gastuak sartu eta, bestela ere, gastu guztiak kontsultatu eta zenbat zor duen edo zor dioten kontsulta daiteke.

Ezaugarri nagusiak:

 Norberak sar dezake berak egindako gastua eta, nahi izanez gero faktura edo tiketa erantsi (eskaneatzeko laguntza eskaintzen du). Zehaztu daiteke partaideen artean gastu hori zati berdinetan banatuko den, zeintzuen artean banatu edo ehuneko zein kopuru zehatzetan banatzea. Gastuak, nahi izanez gero, kategorietan sailka daitezke. Era berean, maiztasun periodikoa duten gastuak ere sar daitezke.

 

Partaideek edozein unetan kontsulta dezakete partaide bakoitzak egindako  gastuak eta, partaideen arteko diru-transferentziak optimizatuta, sortzen ari diren bakoitzaren saldoak. 

Nahi beste talde sor daitezke eta web orritik zure taldeen zerrenda ikusi eta sartu. Web aplikazioa euskaraz dago eta gai argi edo ilunean erabili daiteke.

 Aplikazioa kode irekikoa da eta instantzia ofizialak zerbitzua doan ematen du. Zerbitzua  beste instantzia baten bidez zerorrek eman nahi baduzu Github-eko web orritik deskargatu eta erreplika daiteke.

Xournal++ aplikazioak Laser punteroaren funtzioa gehitu du 1.3.0 bertsioan

 Xournal++ tresna interesgarria da irakasleentzat, bai arbel gisa erabiltzeko, bai PDF dokumentuen gainean nabarmentzeko eta oharrak egiteko. Bigarren erabilera honetan hain zuzen ere  bere azken bertsioak, besteak beste, berritasun interesgarri bat ekarri du: Laser punteroa.

Laser honen bidez arkatzaren (edo nabarmentzailearen) antzeko edizioa egin daiteke baina segundo pare batean desagertzen da. Hori ondo etortzen da elementu bat edo testu zati bat istant batean nabarmendu behar dugunean.

Azpiko animazioan ikus daiteke elementu bat nabarmentzea arkatzarekin eta ondokoa laserrarekin.

Arkatza eta laserra

 Aplikazioa instalatzeko, edo Luberri Linux-ena berritzeko, Github-etik deskargatu eta instalatzen ahal duzu. Web orri horretan kontsultatu daitezke ere gainerako berritasunak.

 

 

Nola prestatu aurkezpenak Logseq aplikazioan

 Aspaldi honetan boladan dago aurkezpenak sinple -ez eskasak- eta formaz garbi eta minimalistak egitea.

Logseq aplikazioa bi baldintza horiek betetzea errazten du eta, bide batez, edukia ondo gordeta geratzen da eta berrerabiltzeko eta moldatzeko prest. 

Logseq erabiltzen baduzu eta aurkezpen bat egin eta erabili nahi baduzu hau da nire bide proposamena:

Edizioa: 

1.  Logseq ireki eta zure gogoko koadernoan (graph) orri berri bat ireki.
2. Lehenengo paragrafo edo blokean "/" idatzi eta aukeratu goibururako maila bat (h1, h2...)
3. Hurrengo diapositibara pasatzeko sakatu Sartu. Beste lerro bat gehitu nahi baduzu sakatu Mayus+Sartu.

Testuaren formatua mugatua da baina markdown formatuaren bidez editatu dezakezu *etzana* edo **lodia**. 

Zerrenda buletadunak egin daitezke asterisko bat jarrita elementu bakoitzaren hasieran edo formatu honekin:

<ul>
<li>sagarrak</li>
<li>laranjak</li>
<li>madariak</li>
</ul>

edo zenbakidunak

<ol>
<li>garbitu</li>
<li>kendu xaboia</li>
<li>errepikatu</li>
</ol> 

Edizioan gehitzen ahal duzu irudiak. Horretarako lerro berria gehitu eta bertara arrastatu irudia arakatzailetik. Irudiaren beheko eskuineko kontrolaz alda dezakezu tamaina.  

Interneteko estekak jartzeko markdown formatua erabiltzen ahal dugu, adibidez: [https://www.berria.eus] (Berria).

Diapositiba berria egitean (Sartu) Tab sakatuta azpi-blokeak egiten ahal ditugu.

 Aurkezpena ikusteko: 

Goiko paneleko ... (hiru puntu ikurra) sakatu eta "View as slides" aukeratu. Eskuinean panel bat irekiko da aurkezpenarekin. Diapositiba batetik bestera teklatuko geziak erabiltzen ahal dituzu edo aurkezpenaren kontrola. Diapositiba eskuinetik agertuko dira eta azpi-blokeak erabili baditugu behetik gora. Pantaila osoan ikusteko F sakatu behar da.

 

 Aurkezpenak egitea ez da inolaz ere PKM edo Ezagutza Pertsonalaren Kudeaketarako kode irekiko Logseq aplikazio honen funtzio nagusia baina hori ere bada.

 

 

Collabora Office orain ordenagailurako bertsioa eta euskaraz.

 Collabora Online-k, LibreOffice bulegotika paketearen online bertsioak, orain bere mahaigaineko bertsioa estreinatu du Linux, Windows eta Mac-erako Collabora Office du izena eta euskaraz egiten du polito. Bere garaian OnlyOfficek-ek egin zuen jauzi bera.

  Zein alde dago LibreOffice eta CollaboraOffice-ren artean? bada, interfazea, egileen esanetan "modernoa, garbia eta produktiboa".

Collabora ezkerrean eta LibreOffice eskuinean

Irudian ikusten den moduan Collaborak Ribbon itxura du, alegia tresnak azpimenu gisa. LibreOfficen irudian interfaze klasikoa agertzen da baina Ribbon ere aukeran du.

 Bulegotika pakete honek testu prozesadorea, kalkulu orria eta aurkezpenetarako aplikazioak ditu. Ez du, momentuz bederen, irudien editorea, datu-basea, makroen editorea edo matematika plugina, nahiz eta formula sinpleak txertatu daitezkeen.

Bere formatu lehenetsia odt da baina ireki ditzake microsoftenak eta esporta daiteke horretara zein pdf, epub edota htlm.

Motorean web teknologiak erabiltzen ditu: JavaScript, CSS, Canvas eta WebGL. Horri esker online bertsioaren antza mantentzen du eta Java erabiltzen ez duenez programa txikiagoa da eta errazago mantentzen da.

Eta, zergatik erabili desktop bertsioa online erabili badaiteke? batetik azkarrago ireki eta ibiltzen da, interneten dependentziarik ez du, pribatutasuna hobeto babesten da eta sistemaren inprimaketa, pdf irakurketa, pantaila osoko bista eta sistemaren abantaila guztiak erabiltzen ahal direlako.

Online bertsioaren herentziaz interfaze gehiena dago euskaraz -itzulpena %70 inguruan dago- baina momentu honetan zuzenketa ortografikoa bakarrik dabil ingelesez.

Instalatzeko flatpak bertsioa dago. Linuxerako hemendik deskarga daiteke  

 sudo flatpak install collaboraoffice-v25.04.7.2_final.flatpak (beste bertsioa bada aldatu behar duzu).

Nola konpondu "Fritzing caught an exception from simulationButton in event 3: bad_function_call"

 Elektronikako zirkuituak diseinatzeko eta probatzeko Frintzing aplikazio librearekin zirkuituak probatzek unean "Fritzing caught an exception from simulationButton in event 3: bad_function_call" errorea agertu zait Fritzing 1.0.1 bertsioan. Zirkuitua gordetzeko aukera ematen du eta, ondoren, aplikazioa ixten da.

Bertsio hori da Luberri 25.2 eta Linux Mint 22 sistemetan software biltegitik instalatzen dena.

Antza denez, bertsioaren errorea da eta hurrengo bertsioetan errore  hori konponduta dago. Beraz, nik egin dudana izan da bertsio hori desinstalatu (aplikazioen panelean bere ikonoan eskuin klik eta desinstalatu) eta hau idazteko orduan berriena den 1.0.6 bertsioa instalatu. Hori bai, bertsio hori Linuxerako bakarri dago AppImage formatuan. Instalatzeko, hemendik deskargatu dut (nik horrelakoak AppImage izeneko karpeta batean deskargatzen ditut), ondoren exekutatzeko baimena eman: fitxategian eskuin klik > propietateak > baimenak > baimendu fitxategia programa bezala exekutatzen. Probatu.

Ondo badabil aplikazioetan abiatze bizkorra sortuko diogu: paneleko Aplikazioak eskuin klik > konfiguratu >  behean Ireki menuaren editorea > nahi duzun aplikazioen kategorian Elementu berria > Izena: Fritzing, Komandoa: arakatu eta hautatu fritzin...AppImage deskargatu berri duzun fitxategia, Ikonoa: aplikazioetan bilatu Fritzing > Onartu.