OpenOffice.org 3.1 euskaraz jaisteko prest

Dagoeneko jaisteko prest dago OpenOffice.org 3.1 bertsio berria euskalgnu.org web orritik. Windows, Linux eta Solaris sistemetarako (laster MacOs).

Instalatzeko jaitsitako fitxategian klikatu eta deskonprimituko da. Ondoren instala zure sisteman ohikoa den eran instalazio abiatu eta morroiak lagunduko dizu erraz instalazioa burutzen. Gogoan izan Xuxen IV zuzentzaile ortografikoaren gehigarria hemendik jaitsi dezakezula (aurreko bertsioan instalatuta ez bazenuen). Jaitsi ondoren klikatu eta bera bakarrik instalatuko da.

Bertsioaren zenbait berrikuntza:

Aplikazio guztietan:

• Anti-aliasing sistemaren bidez grafikoen ertzak leunagoak ikusten dira.
• Grafikoak mugitzeko klikatu eta errestan eramatean aurreikuspen bat erakusten du.
• Hautapenak argiagoak: gardenak direnez jatorrizko koloreak hobeto antzematen dira.

Kalkulu orrian:

• Hobekuntzak datuen adierazpen grafikoetan. Batez ere balio negatiboetan.
• Aukera gehiago datuak ordenatzean.
• Orrialdearen aurrebistan inprimaketa-area orrira egokitzeko laguntzailea:

Testu prozesadorean:

• Elkarlanetan oharrei erantzuteko aukera eta beste kolaboratzaileek egindako ekarpenak onartzeko edo ukatzeko aukera gehitu dute.
• Goimarratzea erantsi dute. Azpimarratzearen antzekoa baina karaktereen gainetik.

ARTypist mekanografia online euskaraz

Orain arte ingelesez, gazteleraz eta katalaneraz zegoen online aplikazioa dagoeneko euskaraz dugu. Instalaziorik gabe, web orri batetik (http://www.artypist.com/) ikas dezakegu mekanografia. Erregistratu behar da eta, horri ezker, programak gogoratzen du zein mailatan ari garen.

Interfazea euskaraz ikusteko klikatu ikurriñan.

eta, ekin lanari!



Irakasleok posible dugu irakasteko offline aplikazio bat erabili eskolan, Type Faster esate baterako, ARTypist gomendatu etxean edo praktikatzeko, eta Addictive Typinf Drills ebaluatzeko.
Eskerrik asko Jose Luis.

Forecastfox euskaraz

Firefox nabigatzailean eguraldiaren berri ematen digun Forecastfox gehigarria orain euskaraz agertzen da. Termino guztiak ez dira euskaraz agertzen baina, tira, asteko egunak, eguraldia eta ezarpenak bai. Euskaraketa Gotzon Egiak egin du. Eskerrik asko.



Forecast instalatzeko: https://addons.mozilla.org/eu/firefox/search?q=forecastfox&cat=all
Beste zenbait gehigarri interesgarri: http://alexgabi.blogspot.com/2009/01/firefox-gehigarriak-firefox-interneteko.html

Nola instalatu Ubuntu Windows duen ultra-arin batean

Zure eskuetara iritsi bada Windows duen ultra-arin bat, alegia CD irakurgailurik ez duen eramangarri txikia, eta abiatze dual bat jarri nahi baduzu Ubunturekin irakurri proposamen hau.


Lehenik eta behin ultra-arina kablez edo wifiz internetekin konektatuko dugu. Ondoren Ubunturen ISO irudia ultra-arinaren diskora -gogorra izan edo flash- jaitsiko dugu. Internetetik IsoDisk doako aplikazioa jaitsi eta instalatuko dugu. Programatxo honek ISO irudia emanda haren diskoa duen unitate birtuala sortuko du; hau da, Ubunturen distribuzioa duen CD unitate birtuala sortuko digu.


A unitateko wubi.exe exekutatuko dugu. Wubik Ubuntu Windowsen gainean instalatzen du. Behin instalatuta ekipoak abiatze duala izango du; ekipoa abiatzean erabakiko dugu Windows edo Ubuntu erabili saio horretan. Ez du partizio iraunkorrik sortzen, horretaz gain, Ubunturen instalazio arruntarekin alderatua Wubirena pittin bat motelago ibiliko da eta Windows hondatzen bada ezingo dugu Ubuntu erabili. Patxadaz hartu instalazioak luze jotzen baitu eta hizkuntza fitxategiekin arazotxoak ematen ditu; hala bada, euskararen hizkuntza-fitxategiak berrinstalatuko ditugu.

ScribeFire Firefoxen gehigarria blogen sarrerak editatzeko

Nafarroako IKT dinamizatzaileen blogetik izan dut Firefoxen gehigarri honen berri. Instalatu dut eta mezu honen bidez ari naiz frogatzen. Zerbitzua abiatzeko nahikoa da F8 egin edo Firefoxen Tresnak menuan ScribeFire klikatu eta pantaila erdiko -neurria alda daiteke- interfaze argi bat azaltzen da. Bertan eskuinaldeko fitxetan zure blog(en) datuak eman eta mezu berriak idatzi zein zaharrak edita daitezke. Etiketak ere erraz kudea daitezke.


Abantailak:

• Oso interfaze argia du.
• Blog bat baino gehiago baduzu mezuen kudeaketa errazten da.
• Irudiak Firefoxetik arrastatu eta jaregin daitezke. Horretaz gain lerrokatzeko tresna oso egokia du.
  
• FTP zerbitzua
• Tarteka edukia automatikoki gordetzen du.

Format Factory euskaraz

Bideo, audio eta irudien fitxategien formatuak era masiboan aldatzen dituen freewarea edo doako aplikazioa euskaratu berri dut. Filma-DVDak eta audio-CDak ere ripeatzen ditu.


Bideoa
MP4/3GP/MPG/AVI/WMV/FLV/SWF formatuak onartzen ditu eta hainbat kalitate aukerak eskaintzen ditu.

Audioa
MP3/WMA/AMR/OGG/AAC/WAV formatuak eta kalitate aukerak.

Irudia
JPG/BMP/PNG/TIF/ICO/GIF/TGA formatuak. Tamaina eta biratze aukerak eskaintzen ditu.

Horretaz gain ripeatzeak egiten ditu, ISO bihurtzeak, bideo-fitxategien fusioa, fitxategi multimedien informazioa eta abar.

Laburbilduz potentzia, abiadura eta erabilerraztasuna elkartzen duen aplikazioa.

Soilik Windows (32) gainean dabil.

Jaisteko tokia. Instalatzean Windowsen ezarpen lokaletan "vasco" jarrita badugu euskaraz instalatuko da, bestela hizkuntza aukeretan "basque" hautatu behar da.

Windows aplikazio bat da. Linuxen erabili nahi baduzu Wine erabili behar duzu. Bestela Linuxen programa hauek erabil ditzakezu.