Nola inportatu Thunderbird Lightning egutegira Moodleren egutegia

Aurreko mezuan komentatu nuen Moodleren egutegia erabiltzea interesgarria izan daitekeela ikasteko plataforman aritzen direnentzat. Komentatu nuen ere Moodleren egutegia esportatu daitekeela Google Calendar-era, Thunderbird-era eta Ical protokoloa erabiltzen duen edozein egutegira.

Gaurkoan erakutsiko dut nola inportatu Thunderbird-eren egutegira, Lightning-era alegia, Moodleren egutegia.

Urratsak:

• Ireki zure Moodle gunea eta sartu erabiltzailea eta pasahitza.
• Eskuin aldean agertzen da zure egutegia. Hilabetearen izenean klikatu.

 

• Egutegia erdiko zonan agertzen da eta azpiko Esportatu egutegia botoia klikatuko dugu.

• Irekitzen den leihoan: 1 ekitaldi guztiak edo ikastaroena aukeratuko dugu 2 pertsonalizatutako tartean urte beteko tartea aukeratuko dugu eta 3 Egutegiaren URLa lortu (diferentzia hau eta esportatzearen artean seguruena da URLarena tarteka eguneratuko dela). 
• Agertzen den URLa kopiatu.
• Thunderbird-en egutegira joan eta ezkerraldean, egutegien zerrendaren azpian, eskuin klik egin eta Egutegi berria > Sarean > iCalendar (ICS) > Kokapenean aurretik kopiatutako URLa itsatsi eta Hurrengoa klikatu. 
• Egutegiaren izena jarri (Moodle), kolore bat hautatu eta kito.

Kontuan izan esportazio bat dela eta ez sinkronizazio bat. Beraz Thunderbird-en Moodleren ekitaldiak edo gertaerak ikusiko dituzu baina ezin editatu edo berriak erantsi.

Moodleren egutegia: irakasle eta ikaslearen agenda.

Moodlen blokeek joko interesgarria eman dezakete ikastetxeetan, besteak beste egutegiaren blokea.

Hona hemen haren ezaugarri batzuk:
Moodlek lau egutegi mota bereizten ditu:

• gunekoa (ikastetxekoa), 
• ikastarokoa, 
• taldekoa
• pertsonala.

Guneko kudeatzaileak ikastetxeko ekitaldi orokorrak sar ditzake, hala nola, ikasturteko hasiera eta bukaera egunak, oporrak eta jai-egunak, euskaren-eguna... Mintegiak edo irakasleak materiako ekitaldiak, hala nola ebaluazio eguna, materiako eskolaz kanpoko ekintzak... eta taldeko ekitaldiak (soilik talde bati dagokion kasuan). Kontuan izan behar dugu zereginak, azterketak eta data bati lotutako elementuak automatiko agertuko direla agendan. Era berean, irakasleak ikastaroko egutegi pertsonalean jar ditzake gelako plangintza, hala nola, unitate didaktikoaren hasiera eta ikasleen interesekoak ez diren elementuak.

Egutegi honen abantaila handi bat da irakaslearen agenda izateaz gain ikaslearen agenda ere badela. Ikasleak bere agendan kudeatzaileak eta irakasleak jarritako ekitaldiak ikusten ditu, bai eta jardueren entrega datak. Hortaz aparte ikasleak bere ekitaldi pertsonalak sar ditzake.

Agenda bezala hilabeteko, asteko eta eguneko ikuspegia izan arren, kontsultatzeko ez da sobera praktikoa baina behin programatutako ekintzak sartuta egutegia esporta daiteke Googel Calendar-era harekin sinkronizatuz eta bertatik Thunderbid-eren egutegira, Gnome-egutegira. Google Calendar-ekin sinkronizatuz gero Android mugikorrean ere kontsulta daiteke.

Ikus dezagun nola sinkronizatu Moodle egutegia Google Calendar-ekin:  Moodle egutegiaren gaineko hilabetean klikatu eta egutegia zabalduko da, beheko partean agertuko da esportatzeko botoia (ezkerreko irudian, klika handiagotzeko) eta ondoren, behin zehaztuta ekitaldi guztiak (1) denbora-tartea -ikasturte osoa- (2) egutegia ics formatuko fitxategira esportatu (3)...

...eta gure Google Calendar (https://calendar.google.com) joan, ezarpenetan sartu eta Moodle izeneko egutegia sortu, ondoren bertara inportatu Moodlen sortu dugun ics fitxategia.

Kontuan izan ikasturte batetik bestera pasa dezakegula egutegia ikastaroko materialarekin batera. Hori bat, ikastaro berrian datak egokitu beharko ditugu.

Gure ikastaroko egutegian era automatikoan agertuko dira ikasleei jartzen diegun zereginen epemuga eta azterketak. Unitate didaktikoen hasiera-bukaerak eta bestelako gertaerak gure egutegi pertsonalean sartuta IKT heldutasuna ereduaren zertifikazioaren goi mailarako eskatzen den koaderno digitalaren parte inportante bat osa dezakezu agenda honen bidez.

Xuxen 5 kalean da.

Xuxen euskararen zuzentzaile ortografikoak bertsio berria estreinatu du, bosgarrena.

Bertsio honek Hiztegi batuko eta Elhuyar hiztegiko azken aldaketak jasotzen ditu.

Linuxen deskarga eta instala daitezke:

• Firefox-erako. Gehigarrien bilaketak ere topatuko du. 
• LibreOffice-OpenOffice-rako.

Behin deskargatuta instalazioa automatiko egiten da.

Zuzentzaile lexiko-gramatika badu baina bakarrik dabil Microsoft Officen.
Informazio gehiago eta beste sistementzako deskargak Xuxenen web orrian.

Nola ikusi EAEko hezkuntzako Alfresko Ubunturen arakatzailean

Ubuntu erabiltzen baduzu EAEko hezkuntzako Alfresco zerbitzaria ikusteko bi aukera dituzu:

• Interneteko nabigatzailearen bidez:  https://alfresco.hezkuntza.net
• Ubunturen fitxategi arakatzailearen bidez.

Dokumentu asko kudeatu behar baduzu bigarrena arinagoa da. Ikus dezagun nola egin konexioa:

Ubunturen goiko paneleko Lekuak klikatu eta zabaltzen den zerrendan aukeratu Konektatu zerbitzariarekin...

Irekitzen den leihoan idatzi:  davs://alfresco.hezkuntza.net/alfresco/webdav irudian ikusten den bezala:

 Eskatuko dizu erabiltzailea eta pasahitza eta konexioa gogoratu behar ote duen. Ondoren zure fitxategia Nautilusean ikusiko dituzu:

Nola aktibatu Xuxen zuzentzaile ortografikoa Firefoxen

Firefoxen euskarazko zuzentzaile ortografikoa erabiltzeko Xuxen gehigarria instalatu behar dugu. Horretarako gehigarrien web orrian sartu, 'Gehitu Firefoxera' klikatu eta instalazioa bukatzen duenean Firefox itxi eta ireki.


Baina hori ez da nahikoa izango. Testu kutxa batean idazten dugunean euskarazko testua markatuko digu ongi idatzita egon arren zeren eta berak uste du testua gazteleraz dagoela. Beraz, adierazi behar diogu testua euskaraz dagoela. Hori era desberdinetara egiten da web orriaren arabera:


Webmail erako posta mezuetan:

Idaztean gorriz azpimarratutako edozein hitzaren gainean Eskuin klik egin > hizkuntzak > Euskara. Hortik aurrera soilik ulertzen ez dituen hitzak azpimarratuko ditu zuzentzaileak eta hitza zuzentzeko haren gainean Eskuin klik egin eta idazkera zuzena hautatuko dugu zerrendatik. Behin hori eginda ekipo honetan eta webmail honetan gogoratuko du gure hizkuntza aukera.

Moodlen:

Moodleren testu kutxetan gauza bera gertatuko zaigu, hitz guztiak gorriz azpimarratuak agertzen dira. Moodlen, ordea, gorriz azpimarratutako edozein hitzaren gainean Ctrl+Eskuin klik egingo dugu > Hizkuntzak > Euskara. Era berean zuzenketak egiteko ulertzen ez duen hitzaren gainean Ctrl+Eskuin klik egin beharko dugu idazkera zuzena hautatzeko. Aurreko kasuan bezala behin hizkuntza aldatuta Moodlek gogoratuko du.

Foxit Reader bertsio berria Linuxerako

PDF fitxategiak editatzeko aukera ematen duen Foxit Reader aplikazioak 2009tik ez zuen bertsio berririk Linuxerako eta atera duena ez du funtzionalitate aurreraturik baina oinarrizkoak baditu eta oso interfaze sinple eta interesgarrian.

Foxit Reader-en interfazea

Funtzionalitateak:
Edizioa

• Nabarmentzeko  tresna (fosforitoa) testua aukeratzeko tresnekin (klik bikoitza eta hirukoitza, Ctrl+A...), azpimarra, gain-marra.
• Arkatza eta borragoma.
• Oharrak.
• Testua ordezteko eta txertatzeko iradokizunak. 
• Testu edizioa (letra mota, tamaina eta kolore aukerarekin).
• Edizio guztiak bektorialak dira: aukeratu eta ezabatu, mugitu eta aldatu daitezke.

Laster-markak, bilatzeko tresna eta abar.

Foxit Reader versus Master PDF Editor


Foxit-en abantailak Masterrekiko

• Interfazea sinpleagoa, intuitiboagoa eta erabilgarriagoa.
• Nabarmentzeko tresna testuarekin jokatzen du eta ez zonekin.
• Inprimaketak aukera ematen du inprimatzeko dokumentua edizioekin edo
  
  gabe. Horrek suposatzen du ez direla zertan gorde behar jatorrizkoa eta editatutakoa.
• Foxit-en oharrak Evincek erakusten ditu (Masterrenak ez)

Masterren abantailak Foxit-ekiko

• Erabiltzaile guztientzat instalatzen da.
• Orriak txertatu, dokumentua zatitu, dokumentuak batu... 
• Aukera gehiago ditu.

Instalazioa

Instalazioa fitxategi exekutagarri baten bidez egiten da eta aplikazioa edozein erabiltzailek egin dezake eta soilik berarentzako ibiliko da.
Foxit Reader deskargatzeko orrira joan, aukeratu Foxit Reader > Free Download eta agertzen den fitxan sistema aukeratu (Luberriren kasuan Linux 32 bit) eta Download. Deskargatzean deskonprimituko dugu fitxategi kudeatzailearekin eta azalduko da FoxitReader.enu.setup.1.0.0.0909(r186903).run fitxategia; fitxategia exekutatu eta Aplikazioak > Grafikoak atalean agertuko da.


Bukatzeko
Software librean hutsune handia dago PDF fitxategien edizioan. Evince oso aplikazio pobrea da, arina baina edizio tresnarik ez du. Okular aplikazioak baditu edizio tresnak baina soilik Okular-en ikusten dira haren oharrak eta nabarmentzeak. Egoera horrela segitzen duen bitartean Master PDF Editor edo Foxit Reader bezalako software pribatiboa segitu beharko dugu.


Beste Linux-eko aplikazioak
Software bilduma

Moodle: nola ezeztatu matrikulak

Moodle-en matrikulak eskuz egitea erraza da baina matrikulak bertan bera uztea ez da hain intuitiboa.

Ikus dezagun nola ezeztatu daitezke matrikula bat edo batzuk.

Lehenik eta behin kudeatzaile edo irakasle bezala sartu, ikastaroa ireki eta haren kudeaketan Erabiltzaileak hauta eta Matrikulatutako erabiltzaileak.
1- Matrikulazio metodoetan Eskuzko matrikula hautatu eta...
2- Iragazia pasako dugu. Une horretan erabiltzaileen ezkerrean kontrol laukiak agertuko dira. Ezabatu nahi d(it)ugun erabiltzailea(k) hautatu eta...
3- Aukeratutako erabiltzaileekin Ezabatu hautatutako erabiltzaileen matrikula.

Oharra
Sistema honek eskuz matrikulatutako ikasleentzat balio du, kohorteen sinkronizazioaren bidez matrikulatutako ikasleei ezin zaie banaka baja eman.

Epoptes: gela kontrolatzeko aplikazioa.

Erne! bezeroak instalatzeko modua aldatu da. Mezu hau 2019/4/16an eguneratu dut modu berriarekin.

Ikasleak ordenagailuaren aurrean daudela irakaslea haien bizkarrean hobeto dago bere ordenagailuaren aurrean baino, hala ere, Epoptes probatu ondoren ez duzu erraz utziko. Ikasleen pantailak kontrolatu baino askoz gehiago egiten du eta.

Epoptes versus Italc
Software librearen unibertsoan Italc zen gelaren kontrolerako aplikazio nagusia baina, niri horrela gertatu izan zait behintzat, irakaslea denborarekin ikasleen kontaktua galtzen du. Epoptes-en kasuan hori ez omen da gertatzen. Epoptes, Italc ez bezala, soilik GNU/Linuxen funtzionatzen du, ez du Windows-eko ikasleak ikusten. Bestetik Epoptesen instalazioa errazagoa da.

Epoptes-en funtzionalitate nagusiak:

• Ikaslearen ekipoa piztu, saioa amaitu, itzali edo berrabiarazi.
• Ikasleen ekipoen pantailak ikusi, ikasle baten ekipoaren kontrola hartu. Proiektorea izanez gero irakaslearen pantailatik edozein ikasleren pantaila erakutsi daiteke. Horrela ikasleek euren lanak erakutsi edo atazaren bat nola egiten den erakustea dute.
• Irakaslearen pantaila ikasle batzuen edo guztien pantailan erakutsi (bereziki interesgarria proiektorea ez badago).
• Exekutatu aginduak ikasleen ekipoetan (baita root bezala ere). Gure ordenagailutik aplikazio bat instala dezakegu ikaslearen ekipoan. 
• Ikasle baten edo guztien ekipoa mututu, blokeatu (esate baterako azalpen bat eman behar denean).
• Ikaslearen ekipoaren informazioa (adib. IPa) ikusi.
• Ikasle bati edo batzuei mezu bat bidali.

Instalazioa:
 

Irakaslearen ekipoan

Epoptes instalatuko dugu terminalean hau itsatsita:
sudo apt-get install epoptes

eta irakaslea(k) Epoptes taldean sartuko ditugu:
sudo gpasswd -a erabiltzaile_izena epoptes

non erabiltzaile_izenaren ordez irakaslearen erabiltzaile-izena jarri behar duzu. Bat baino gehiago bada bereiztu komen bidez.

Irakaslearen ekipoak IP finkoa eduki behar du. Ez badu jarriko diogu (ikusi nola). Bere IPa kontsultatuko dugu (goiko panelean: konexioa > konexioaren informazioa) eta apuntatu paper batean.

Berrabiarazi ekipoa.

Ikasleen ekipoetan

1- Aplikazioa instalatuko dugu. Administratzaile moduan Epoptes-en bezero aplikazioa instalatuko dugu terminalean hau itsatsita:
sudo apt-get install epoptes-client


2- Ikaslearen ordenagailua eta irakaslearen ordenagailuaren arteko lotura definituko dugu. Bi era erabili daitezke:

2.A- Zerbitzariak, alegia irakaslearen ordenagailuak, IP finkoa badu:
Bezeroaren terminalean hosts fitxategia editatuko dugu horrela:
sudo xed /etc/hosts  

(xed editorearen ordez gedit , nano edo bestelako testu-editorea  erabili dezakezu)

eta fitxategiaren bukaeran honelako lerro bat gehituko dugu:

xx.xx.xx.xx  server
non xx.xx.xx.xx-ren ordez irakaslearen ordenagailuko IP finkoa jarriko dugun. Ondoren gorde eta itxi fitxategia.

2.B- Zerbitzariak IP finkoa ez badu edo ez badakigu:
Irakaslearen ordenagailuaren host izena begiratuko dugu; horretarako haren terminalean idatziko dugu:
hostname
Demagun ematen duen izena dela "zerbitzaria". Ondoren, bezeroaren terminalean itsatsiko dugu:
ping zerbitzaria.local
Kontaktua ematen badu terminalean itsatsiko dugu:
sudo xed /etc/default/epoptes-client
(xed editoraren ordez gedit edo bestelakoa erabili ahal duzu) eta fitxategi hau editatuko dugu SERVER aurreko # traola ezabatuta eta zerbitzariaren izena jarrita:
SERVER=zerbitzaria.local
non "zerbitzaria"-ren ordez irakaslearen ordenagailuaren host izena jarriko dugu. Gorde fitxategia eta itxi.

3- Lotura ezarriko dugu.
Azkenik irakaslearen ekipoaren SSL egiaztagiriak eskuratuko ditugu ikaslearen ordenagailuan honako agindu hau exekutatuta:
sudo epoptes-client -c

Aginduaren mezua begiratu ikusteko konexioa lortu dela. Errorea ematen badu zerbait gaizki egin dugu. Done agertzen bada dena ondo.

Berrabiarazi ekipoa


Erabilera:

Irakaslearen ekipoan egin Aplikazioak > Internet > Epoptes eta aplikazioa abiatuko da. Ikasleek ekipoak piztu ahala ikusiko dira monitorean. Miniaturen tamaina alda daiteke eskuineko beheko aldeko kontrolarekin eta miniaturen azpian ekipoaren izena, erabiltzailearena edo biak ikustea kontrola daiteke menuko Etiketak elementutik.
Blokeoak, mezuak, itzalketak eta abar hautatutako monitoreen gainean funtzionatzen du. Bat baino gehiago hautatzeko sakatu Ctrl. Denak hautatzeko Ctrl+A,


Bukatzeko:
Epoptes greziar proiektu bat da (Epoptes-ek grekeraz begiralea esan nahi du) eta VNC teknologian oinarritzen da.
Renmina edo TeamViewer aplikazioetan ez bezala Epoptes-en ez da erabiltzailearen (ikaslearen) baimena behar bere ekipoa zelatatu edota kontrolatzeko.
Aplikazioa euskaraz dago 0.5.8 bertsiotik Juan Ezeizaren lanari esker.


Linuxeko beste aplikazioak
Software bilduma

LibreOffice 5 Ubuntun: berritasunak eta instalazioa.

Abuztutik dago eskuragarri LibreOffice 5 baina ez dut horren berririk eman zeren eta bazituen akats batzuk baina kaleratu berri den 5.02.2 bertsioarekin akats horiek konponduta erabiltzeko prest dago LibreOffice berria.

Berritasun nabarmenenak hauek dira:

• Eskuineko alboko barra erabiltzen ari zaren estiloaren propietateak erakusten ditu.
• Txertatutako irudiak testu prozesadorean bertan moztu daitezke irudian eskuin
• klik eginda agertzen den laster-menuan "Crop Image"
• Tauletan errenkada eta zutabeen txertaketa egin daiteke uneko errenkada edo zutabearen aurrean edo ondorenean menu-lasterretik.
• Tresna-barretan hobekuntzak egin dira. 
• Calc-en datu barretan kolore solidoa erabili daiteke.
• Impress-en interfazea aldatu dute diapositibak espazio gehiago izateko.
• M Office-ren konpatibilitatean hobekuntzak.

Berritasun gehiago eta azalpen osoagoak LO5 release-notes-en

Ez dira aldaketa handiak eta nire ustez aplikazioaren abioa moteldu da pixka bat.

Animatzen bazara instalatzen honela egin dezakezu Linuxeko Debian, Ubuntu, Mint-en PPA bidez: terminalean honako aginduak hurrenez hurren itsatsi eta exekuta itzazu

sudo add-apt-repository ppa:libreoffice/ppa
sudo apt-get update
sudo apt-get install libreoffice

Moodle: nola deskargatu ikastaro bat irakasle rolean

Mezu honetan deskribatuko dut nola deskargatu dezake irakasle batek bere ikastaro baten segurtasun kopia.

Lehenik eta behin babeskopia egingo dugu Ikastaroaren kudeaketa > Segurtasun kopia.

Kontuan izan:
1- Irakasle bezala erabiltzaileen datuak eta bere fitxategien kopia ezin duzu egin.
2- Bai pantaila honetan bai hurrengoetan erabaki dezakegu zeintzuk elementu sartu behar diren babeskopian.



Babeskopia egiten dugunean Moodle-en zerbitzarian bertan geratzen da. Egindako segurtasun kopia deskargatzeko egingo dugu Ikastaroaren kudeaketa > Berreskuratu

Asmoa ez da, berez, ikastaroa berreskuratzea baina bertan agertzen da Erabiltzaileen segurtasun-kopietarako eremu pribatua eta, bertan, egindako babeskopia. Berau deskargatzeko Jaitsi egingo dugu eta mbz konpresio formatuan deskargatuko da.

Deskarga hori gorde dezakegu babeskopia moduan edo eramaten ahal diogu, USB memoria batean edo DVD batean, hurrengo ikastetxeko Moodle kudeatzaileari ikastetxe berrian berreskura dezan*. Fitxategi horren bidez ere gure ikastaroa parteka dezakegu beste irakasleekin web edo blog batetik.

*Kontuan izan Moodle 1eko babeskopiak Moodle 2n berreskura daitezkela baina ez alderantziz.

smarthphonea euskaraz eskaintzen dituzten markak

Informazio eguneratua Teknopata.eus web orrian

Nola erabili Hot Potatoes Ubuntu eta beste Linuxetan

Hot Potatoes, ariketak egiteko editorea, zaharra eta zatarra geratu da baina jarraitzaile fidelak ditu oraindik.

Ikus dezagun nola erabili daitekeen Linuxen. Ez du Linuxerako bertsioa baina Java bertsioa nahiko ongi dabil. Winerako bertsioa ere badu baina Wine instalatuta ez baduzu ez du merezi.

Deskargatu dezakegu Hot Potatoes-en deskarga orritik: Download Java Hot Potatoes. Ondoren deskonprimitu. Nik Java aplikazioetarako karpeta bat dut.

Joan karpeta honetara:
javahotpot/JavaHotPotatoes6.app/Contents/Resources/Java
eta hotpot6.jar fitxategiari exekutatzeko baimena eman (eskuin klik > Propietateak > Baimenak > eta markatu Baimendu fitxategia programa bezala exekutatzea.

Delako karpeta horretan barruan eskuin klik egin eta klika Ireki terminalean.
Ireki berri den terminalean itsati
java -jar hotpot6.jar
eta prest erabiltzeko nahi duzun patatan klikatuta: JCloze testuaren zuloak eztalatzeko, JQuiz galdetegia, JCross letra sopa...

Kasu honetan JClozeren bidez hutsuneak betetzeko ariketa:

Behin ariketa bukatuta gorde jcl formatuarekin. Eta Moddle ikastaro batean txertatu nahi baduzu ikastaroan egin Gehitu baliabidea edo jarduera eta jardueren artean hautatu HotPot, igo jcl formatudun fitxategia eta gorde. Kito.

Horrela ikusiko da:

Gai iluna Thunderbird posta bezeroarentzat

Pantaila ilunen zalea bazara sistemari gai iluna jartzen ahal diozu (Ubunturi Ambiance-dark esate baterako), Firefoxi ere bai (Glass-black edo antzekoa) eta Thunderbird posta bezeroarentzat TTDeepDark oso egokia da. Honelako itxura ematen dio aplikazioari:

eta hau Lightning egutegiari:

gaia probatu nahi baduzu instala dezakezu hemendik. Probatu ondoren ez baduzu gogoko, kentzeko joan Thunderbirden menura > Gehigarriak > Itxura eta kendu.

Ubuntu: nola kendu Oracle Java eta instalatu Open Java

Lehenik eta behin jakiteko zein Java duzun terminalean exekutatu
java -version




Oracle-Java baduzu eta Java librea probatu nahi baduzu aurrena desinstalatu Oracle-Java honela:
sudo apt-get purge oracle-java7-installer
java8 baduzu 7aren ordez 8 jarri.


Ondoren Open Java instalatzeko egin hiru instalazio hauek:
sudo apt-get install default-jre
sudo apt-get install default-jdk
sudo apt-get install icedtea-plugin


Javaren funtzionamendua probatu dezakezu web bidezko Geogebra, Ximd edo Manuel Sadaren matematikako appletekin.

Nola ireki edo aktibatu Gmail kontuak Thunderbird 31 bertsioan

Mezu hau zabaltzeko unean Ubuntuk Thunderbird 31 bertsioa erabiltzen du. Laster 38.era eguneratuko da.
31 bertsioak ez omen du onartzen 2014an Gmailek 2014tik erabiltzen duen OAuth2 autentifikazio sistema. Hori dela eta Thunderbirden erabiltzaileek autentifikazio arazoak dituzte Gmail kontuekin...

eta, era berean, arazoak sortzen dira Gmail kontu berri bat ezartzeko Thunderbirden:

Nola konpondu:
Gmail kontuan segurtasun gutxiko aplikazioen erabilera baimentzen. Horretarako, nabigatzailean Gmailen identifikatuta zaudela, klikatu esteka honetan  eta aktibatu segurtasun gutxiagoko aplikazioak.

 Kito.

Oharra:
Thunderbird 38. bertsiotik aurrera onartzen du OAth2 sistema, beraz aplikazioa eguneratzen denean desaktibatu ahal izango dugu egindako aldaketa.

Zikloideak marrazteko web orria

http://wheelof.com/sketch/  web orriak aukera ematen digu mota guztietako zikloideak marrazteko. Hainbat gurpil horzdun eta mugimendu ardatzak konbina daitezke formak sortzeko.

Pantailaren azpiko aldean badira hainbat kontrol: abiadura, gurpil konbinazioak, irudia erakutsi, ezabatu eta laguntza.

Eta teklatuaren bidez zenbait aldagai kontrola daitezke:
0-9 abiadura
a-g ezarpenak
Geziak: ardatzen kokalekua eta luzera
X    ezabatu
[     aldatu kolorea
<> marraren lodiera
/     alderantzikatu norabidea
-     jauzi

Aplikazioa software librekoa da eta github-etik deskarga daiteke aldatzeko.

Firefox: hobekuntzak irakurtzeko ikuspegian

Firefox 39k ekarri zuen irakurtzeko ikuspegia. Horri ezker testu luzeak hobe ikusten dira webgunearen panelak, bannerrak eta abar kenduta.

Irakurtzeko ikuspegia aktibatzeko ikonoa eta, ezkerrean, ikuspegiaren ezaugarria pertsonalizatzeko aukerak.

Firefox 40 berriak irakurtzeko ikuspegian hobekuntzak egin ditu. Orain ikuspegi horretan sartzen garenean ezkerreko aldean tira zuri bat agertzen da eta bertan bi ikono: lehenengoa ikuspegi arruntera bueltatzeko da eta bigarrena ikuspegiaren ezarpenak aldatzeko. Bertan hauta daiteke:

• letra mota: seriff edo sans seriff
• letraren tamaina
• atzeko planoaren kolorea: zuria, sepia edo iluna

Horretaz gain 40. bertsioak RAM gutxiago gastatzen du, jpeg irudiak hobe ikusten dira, bideoetan html5 lehenesten da eta beste hainbat hobekuntza ditu.

Firefox 39 bertsioak huts egiten du Fresh Player pluginekin

Uztaila osoa eman dugu Firefox 39 bertsioarekin eta Ubuntun Fresh Player plugina  instalatuta baduzu seguru nabaritu duzula Firefox noiznahi itxi egiten dela. Jakiteko plugin hori instalatuta ote duzun egin menu > Gehigarriak > Pluginak

eta Shockwave Flash 13 baduzu 11. bertsioaz gain Fresh Player duzu instalatuta eta badirudi hori dela Firefox 39 huts egiteko arrazoia.

Konponketa.
Sinpleen ematen duena da behin behinean Fresh Player desaktibatzea (goiko irudian agertzen den moduan) Firefoxen 40. bertsioa atera arte abuztuaren erdialdean. Badirudi hurrengo bertsioan arazoa konponduta dagoela eta, hala bada, orduan aktibatuko dugu.
Fresh Player desaktibatzean Flash Player (Shockwave Flash 11) desaktibatzen dela ematen duen arren ez da horrela, Flash Player martxan segitzen du beharrezkoa den unean aktibazioa eskatzen (behin behinekoa edo behin betikoa helbide horrentzat).

Eguneratzea (2015/8/11).
Abuztuaren hasieran Firefox 39.0.3 bertsio berria atera du eta egun batzuk daramat probatzen Flash Playerrekin eta ez dit arazorik eman. Beraz 39arekin arazoak badituzu probatu bertsioa berritzen.
Eguneratzea (2015/8/13)
Firefox 40. bertsioarekin ere ez dago arazorik

Kontuz Google kontuaren bidez erregistratzen

Aspaldi honetan web zerbitzu askotan erregistratzeko unean eskaintzen dute aukera Google edo Facebooken bidez besteak beste. Ba argi ibili zeren hori egiten baduzu  zure kontaktuak spameatzeko arriskuan jartzen duzu. Zerbitzu horrek zure Google kontaktuak hartu eta bere publizitatea egiteko erabili ditzake.

Hori gertatu zait niri RSSak irakurtzeko Feedspot.com zerbitzuarekin. Ondoren bere letra txikian bere buruari hori egiteko eskubidea ematen diola ikusi dut.

Zer egin daiteke hori konpontzeko?
Dudik gabe egokiena da ez erregistratzea inon kontu Google, Facebook... konturekin.
Ez erregistratu Feedspot-en (behintzat letra txikia ondo irakurri gabe).
Saiatu baja ematen (ez da erraza).
Google kontura lotutako aplikazio ez fidagarriak kendu. Hona hemen nola:

1. Sartu Gmailen.
2. Eskuin aldeko gurpil hortzdunean klik egin eta Ezarpenak hautatu.
3. Menu nagusian Kontuak eta inportazioa.
4. Google kontuaren ezarpen gehiago.
5. Saio hasiera eta segurtasuna atalean Konektatutako aplikazioak eta guneak.
6. Kudeatu aplikazioak. Eta bertatik kendu guztiz fidagarriak ez diren guztiak.

Hala eta guztiz ere batzuk esaten dute hori ez dela nahikoa lagunen spama kentzeko.
Eta, noski, barkamena eskatu zure kontaktuei.
BARKATU

Google Earth-en denbora lerroa

Google Earth-ek hegazkinetik eta satelitetik hartutako argazkiz osatzen du kartografia eta tarteka irudiak eguneratzen ditu.

Aplikazioan sartzen garenean zonaldeko dituen irudirik berrienak eskaintzen dizkigu baina baita ere irudi zaharrak ikusteko aukera. Irudi horiek ikusteko pantailaren ezkerreko beheko partean ikur baten ondoan agertzen da zona horretako argazki zaharrenaren urtea...

... eta bertan klik eginda goiko aldean agertzen den denbora lerroa erabiltzen ahal dugu zona bera garai desberdinetan ikusteko. Denbora lerro horretan marratxo bertikalez markatuta daude irudien berritzea eta lerro horretatik nabigatzen ikusten ahal dugu zonalde horrek izan duen bilakaera.

Ikus dezagun adibide bat: Oiartzungo Gurutze  auzoko Arkale harkaitzetan dagoen Beloagako gaztelua. Azkeneko bost urtean -gehien bat Nafarroako 1512ko konkistaren bostehungarren urteurrenerako- Josemari Iturrioz eta Beloaga bizirik taldeko beste kideek gazteluaren hondakinen gaineko zuhaitzak kendu eta sasiak garbitu eta horma zaharren oinarria berregiten ari dira.

Google Earth-ek aukera ematen digu ikusteko harkaitza begetazioz estalita eta 2012 eta 2015eko egoera hainbat garbiketa eta berreraikuntza lan eginak.

Hona hemen gaztelua eta proiektuaren gaineko informazioa:
Gazteluaren informazioa: https://sites.google.com/site/beloagagaztelua/
Proiektuaren informazioa: http://www.oiartzuarrak.org/Beloagabizirik

Paseo erraza bada ere oraindik ez dago seinaleztatua, beraz, hemen dago paseoaren ibilbidea gpx formatuan.
Gpx fitxategia GPSean kargatzen ahal duzu edo smartphonean Orux Maps edo Wikiloc app-rekin erabiltzeko. Ordenagailuan ikusteko Viking edo antzeko aplikazioa erabiltzen ahal duzu.

S3 Google Translator Firefox eta Thunderbirdentzat

Lehengo astean segurtasun arrazoiak direla kausa Mozillak Quick Translator gehigarria segurtasun arrazoiengatik ez erabiltzea gomendatzen zuen eta nik Google Translator for Firefox erabiltzea gomendatu nuen baina ez nau gogobete eta beste batzuk probatuta S3 Google Translator iruditu zait hobea. Eskaintzen duen itzulpena bera da baina, batetik jatorrizko testua mantentzen du ikusgai eta, pantailaren beheko partean irekitzen du leihatila bat itzulpenarekin, bestetik erraz aldatzen ahal da euskaratik gaztelerara lehenengo itzulpenak gogobetetzen ez bagaitu.

Instalatzeko modurik errazena da bai Firefoxen bai Thunderbird-en menuan Gehigarriak > Eskuratu gehigarriak eta bilaketa eremuan S3 Google Translator idatzi; behin topatzen duenean instalatzeko agindu.

Behin instalatuta hobespenetan komeni da aukeran ematen dituen hizkuntzen zerrendetatik erabili behar ez ditugunak kentzea.

LibreOffice Writer dokumentuak EPUB formatura

Badira gutxienez bi modu LibreOffice Writter testu prozesadoreko dokumentuak liburu elektronikoan (e-book) irakurtzeko: epub formatuan edo pdf formatuan.
Zertarako? dokumentu luzeak ordenagailuko pantailan irakurri beharrean hobeto irakurtzen dira liburu elektronikoan itzalean dagoen parkeko bankuan.

epub formatura.

Hau da modurik egokiena. Liburu elektronikorako formatua da eta aukera ematen digu letra handitu, txikitu, bertikalean edo horizontalean jartzeko. Testua pantailara egokitzen da beti.
Odt fitxategia bihurtzeko LibreOfficerako Writer2epub gehigarria edo hedapena instalatuko dugu LibreOfficen. Estekan klikatu eta LibreOffice-rekin irekitzeko esango diogu. Instalatu ondoren LibreOffice itxi eta bihurtu nahi dugun dokumentua irekiko dugu. Testu prozesadorearen barra estandarraren ezkerreko aldean gehigarriaren botoiak ikusiko ditugu.

Lehenengoa klikatu eta dokumentuaren fitxa beteko dugu. Bertan titulua, egilea, hizkuntza... jarriko dugu eta lehenengo orri bezala irudiren bat jarri nahi badugu eskuin aldean hautatu dezakegu. Ok sakatu eta...

jatorrizko dokumentua dagoen tokian agertuko da epub formatukoa. Ordenagailuan ikusi nahi badugu Firefoxentzako EPUBReader erabil dezakegu.

Liburu elektronikora kopiatu eta parkera irakurtzera.
Bihurketa bukatuta puska batean erabili behar ez baduzu menuko Tresnak > Hedapenen kudeatzailean desgaitu dezakezu gehigarria barra estandarretik kentzeko.
Irudiak mantentzen dira. Taulak ez dira ondo ikusten eta dokumentua oso konplexua bada edota hainbat prozesadoretan egindako puskak baditu baliteke ez funtzionatzea.
Horrelako kasuetan B plana izan daiteke...

pdf formatura.

Ez da hain egokia zeren eta formatua ezin da egokitu liburu elektronikoaren pantailara. Baina abantaila bezala kontsidera daiteke irudiak, taulak eta abar eta formatuak ordenagailuko modu berean ikusiko dugula.
Ordenagailua eta liburu elektronikoaren pantailen aldeak kontuan izanda, pdf bihurtu baino lehen dokumentua egokituko dugu liburuaren pantaila txikira. Horretarako LibreOfficen jarriko dugu (balioak indikatiboak dira):

Orrialde formatuan:
Formatua > Orrialdea DIN A5
Kendu goi-buruak eta orri-oinak
Ezker-eskuin marjinak 0,5 cm
Paragrafo formatuan
Lerroartea 1
Letra tamaina 18

Ondoren, bihurtzeko menuan Fitxategia > Esportatu PDF gisa...
Liburura kopiatu eta kito.
Hona hemen PDF liburu bat aipatutako ezaugarriekin:
IKKI Ikaskuntza kooperatiboa Pere Pujolàs eta José Ramón Lago