EAEko Hezkuntza Sailaren Moodle 3.1.6 bertsiora migratuko dute

Ikastetxe publikoetara bidalitako mezu batean EAEko Hezkuntza Sailak jakinarazi du bere Moodle plataforma 3.1.6 bertsiora migratuko duela eta horretaz gain segurtasun handiko HTTPS sistema erabiliko duela.
Migrazioa uztailaren 10, 11 eta 12rako aurreikusi dute.

Pozgarria da ikustea aurten udako oporraldian bertsio berritzea egiteko konpromisoa aurten beteko dutela.

Martxan dagoen 2.9.3 bertsiotik 3.1.6 bertsiora egingo den jauzi horretan hainbat nobedade izango ditugu erabilgai.  Horien gaineko gainbegiratu bat emateko Moodle dokumentazioa gaztelerazko bertsioan zerrendatu eta informazioan sakontzeko aukera ematen dute. Inportanteenak 3.0 eta 3.1 bertsioen berritasunetan topatzen ahal ditugu:

Moodle 3.0 bertsioaren nobedadeak
Moodle 3.1 bertsioaren nobedadeak

Asko dira nobedadeak baina bi azpimarratzen ausartuko naiz:

• 3.0 bertsioan galdera bankurako lau galdera mota berri jarri dituzte:  testuan falta diren hitzak aukeratzeko, testuan falta diren hitzak arrastatu eta jaregiteko eta irudi baten gainean irudiak edota markatzaileak arrastatu eta jaregitekoak. Horrelako aukerak daude 3.1 bertsioan (marko barrenean aukera berriak):

• 3.1 bertsioaren nobedaderik handiena gaitasunak ebaluatzeko sistema guztiz inplementatuta dagoela.

Gaitasunen ebaluazioa bereziki interesgarria da zeren eta 2016-2017 ikasturtetik aurrera irakasleok materia kalifikatzeaz gain gaitasunak ere ebaluatu behar ditugu eta horrelako tresnak izatea funtsezkoa da.

Hona hemen gaitasunen tratamenduari buruzko lotura pare bat:
nire blogean: http://alexgabi.blogspot.com.es/2016/08/moodle-31-eta-gaitasunen-tratamendua.html
gaztelerazko dokumentazioan: https://docs.moodle.org/all/es/Competencias

Nola konpartitu zure Calibre liburutegia sare lokaleko erabiltzaileekin

Calibrek, liburu digitalen liburutegiko kudeatzailea eta irakurgailuak, 3.0 bertsioa estreinatu du.

Plataforma anitza da. Ubuntun azken bertsio hau instalatzeko ondoko  segida hau hautatu (hiru klik) kopiatu, terminalean itsatsi eta exekutatu:

sudo -v && wget -nv -O- https://download.calibre-ebook.com/linux-installer.py | sudo python -c "import sys; main=lambda:sys.stderr.write('Download failed\n'); exec(sys.stdin.read()); main()"

Behin instalatuta menuko Gehitu liburuak botoiaren bidez hautatu zure epub liburuak. Liburua irakurri, editatu, bihurtu ahal izango duzu, eta orain 3.0 bertsioarekin konpartitzen ahal duzu zure sare lokaleko beste ordenagailu, tablet, mugikorrekin. Horrek ematen dio, esate baterako, irakasleari ikasleekin bere liburutegia, edo liburu bakar bat, konpartitzeko eta ikasleek Interneteko nabigatzailearen bidez, aplikaziorik instalatu gabe, epub liburua irakurtzeko.

Horretarako:

1- Calibre duen ekipoan liburutegia konpartitu behar duzu: Konektatu/Konpartitu > Start Content Server

 Ordenagailu horretan bertan probatzeko nabigatzailean idatzi helbide hau: localhost:8080  eta Calibre liburutegia ireki ahal izango duzu:

2- Beste ekipoetatik zure Calibreko liburutegia ikusteko sare lokal berean konektatuta egon behar dute kablez edo wifiz.

Calibrea duen ekipoarekin konektatzeko Calibrea duen ekipoaren IPa jakin behar dugu. Horretarako ekipo horren sistemaren erretiluko konexioaren ikonoan klikatu eta konexioaren informazioa eskatuko diogu eta IP helbidea begiratuko dugu:

Konektatu nahi duten ekipoetan (mahaigaineko, portatila, tableta, mugikorrean) Interneteko nabigatzailea ireki eta helbidearen leihatilan idatzi  xx.xx.xx.xx:8080  non xx.xx.xx.xx Calibrea konpartitzen ari den ekipoaren IPa den. Horrela ekipo horren liburutegia ikusi eta nahi den liburua irakurri edo deskargatu daiteke.

Eguneratzeak: Zim Wiki 0.67-rc2 eta Peek 1.0.3

Gaurko  software-eguneratzeen artean bi berritasun txiki interesgarriak:

Zim Wiki-k  0.67 bertsioaren rc2 atera du, gehien bat hainbat errore zuzentzen duena eta, horien artean, estekaren zuzenketa; izan ere, aurreko bertsioan testua hautatu eta fitxategi batekin estekatzeko Browser edo arakatzailea ez zebilen eta orain zuzendu dute.

Gaurko bigarren nobedade Peek-ek ekarri du, hain zuzen aurreko GIF animatua egiteko erabili dudan aplikazioa. Peek aplikazioak 1.0.3 bertsioak atera du eta berrikuntzarik nabarmenena grabatu behar den leihatilaren tamaina eta forma errazago aldatzea. Orain arte bezala beheko panelean Peek-ean eskuin klik egin eta Aldatu tamaina egingo dugu...

...baina orain leihatilaren kontrola askoz hobea da:

Eguneratze hauek disfrutatzeko Zim eta Peek instalatuta eduki behar dituzu eta sistema eta aplikazioak eguneratu behar dituzu. Horretarako irekin terminal bat (Krtl+Alt+T) eta exekuta itzazu hurrenez hurren bi aginduok:

sudo apt-get update sudo apt-get upgrade

Nautilus: nola eskuratu karpeta baten bide-izena

Ubunturen fitxategi-nabigatzailea den Nautilus aplikazioa Gnomeko garatzaileek sinplifikatzera jo dute eta lehen begi bistan ziren hainbat aukera orain ezkutuan daude. Horietariko bat da karpeta edo direktorioen bide izenak ikusteko modua aldatzea.

Bi dira bide-izenak ikusteko moduak:

• Nabigazio-haria, ingelesez breadcrumb edo ogi-apurren bidea ohiko ikuspegia da. Ikuspegi honetan oinarriko edo arbaso karpetek esteka dute eta oso erosoa da atzera-aurrera nabigatzea.

• Bide-izena edo path. Ikuspegi hau ez da hain erabilgarria baina lantzean behin erabiltzen da, batez ere terminalean edo sistemako tresnetan.

Nautilus nabigazio-haritik bide-izena eskuratzeko modua laster-tekla hauen bidez egiten da:

Ktrl + L

Helbide taula baten kokapena Google Maps-en

Google Maps zerbitzuan egin mapa propioak egin daitezke eta, nahi izanez gero, kokatu beharreko elementuen datuak taula baten bidez inporta daiteke.
Nola egiten den ederki azaltzen du Kike Clemente Gazteizko Berritzeguneko IKT aholkulariak bideo-tutorial honetan.



Jarraibide horietan oinarritua Oarso aldeko eta Bidasoa Beherako ikastetxeen mapa prestatu dut titularitate eta ikasketa moten araberako kategoriak dituena. Taula LibreOffice Calc-en egina eta mapara inportatuta.

Besteak beste izenak eta helbideak dituen taula eta sortzen dituen markatzaileak.

Behin mapa sortua web moduan edo, behekoa bezala, web batean kapsulatua  ikus daiteke.

Calibre: nola konfiguratu Harluxet euskara euskara hiztegia

Epub eta bestelako formatuko liburu digitalak irakurtzeko ebook gailua, tableta, smartphone handia edo ordenagailua erabil ditzakegu.Gailu eta sistema eragile guztietarako irakurgailuak badira.

Gaur komentatu nahi dudana, Calibre hain zuzen ere, ordenagailuetan erabiltzen da hainbat formatuko liburu digitalak irakurtzeko eta liburuen bilduma kudeatzeko, formatuak aldatzeko, editatzeko eta bestelako zereginetarako.

Calibre Linux, Windows eta Mac bertsioak ditu. Aurrerago azalduko dut nola instala daitekeen Linuxen.


Calibrearen berezitasuna liburuen kudeaketa da baian gaur lanak aparte lagata irakurgailuari (E-book viewer-ari) erreparatuko diot...

... eta, bereziki, bere hitzak hiztegian kontsultatzeko aukerari.

Testuan hitz bat ulertzen ez badugu aukera dugu -Internetera konektatuta bagaude- hitz horren lema -hitzaren erroa, deklinaziorik gabeko zatia- hautatu eta eskuin klik eginda hiztegian kontsultatzeko.

Kontsulta hori funtziona dezan Calibreri esan behar diogu zein hiztegi erabili. Ingeleserako Wordnik.com konfiguratuta du eta gaztelera eta euskararako wiktionary. Wiktionary Wikipediaren motore eta filosofia bera erabiltzen duen hiztegia da. Euskarazko bertsioak aurrera egiten ari da baina oraindik berde xamar dago. Alde horretatik une honetan funtzionalitate handia duen euskara-euskara online hiztegia bakarra (?) dugu: Harluxet hiztegi entziklopedikoa.


Nola lehenetsi Harluxet gure hiztegi bilaketetan.

1- Calibre irakurgailuaren ezarpenak ireki. Ezker aldeko ikonoen artean gurpil
horzdunak dituena.

2. Ezarpenetan Dictionaries fitxara joko dugu. Bertan web orri bat gehitzeko esango diogu: Add website.  Bertan hizkuntzen artean euskara hautatuko dugu eta URL edo helbide hau itsatsiko dugu:

http://www1.euskadi.net/harluxet/hiztegia1.asp?sarrera={word}

Ondoren Ados egingo dugu onartzeko.

Erabilera:

Aurrekoa eginda aski dugu testuan ulertzen ez dugun hitzaren lema hautatu, alegia hitzaren erroa deklinazioa hautatu gabe, eskuin klik egin eta agertzen diren aukeren artean Bilatu hiztegian klikatu edo zuzenean Ktrl+L egin eta Harluxetera joko du esanahi eta adibide bila azpiko irudian ikus daitekeenez.

Harluxet hiztegi entziklopedikoa denez hitza arruntez gain toki edo pertsonai famatuez ere egin dezakegu galde.

Calibre liburu digitalen gestorea Ubuntu eta antzeko GNU/Linuxetan instalatzeko software zentroan bilatuta egingo dugu edo terminalean hau itsatsita:

sudo apt install calibre

OHARRAK:
Harluxeten ordez nahiago baduzu Elhuyarren Zientzia eta Teknika Hiztegi Entziklopedikoa hau da jarri behar duzun helbidea:
https://zthiztegia.elhuyar.eus/terminoa/eu/{word}

Polonia, testu liburu irekien nazio mailako programa

Hezkuntza Baliabide Irekiak (HBI- OER Open Educational Resources) lizentzia irekiak dituzten ikasteko eta irakasteko materialak dira. Material hauek libreki erabili daitezke behin eta berriz eta hobetu libreki osatu edo hobetu daitezke. Eskola eta familientzat aurrezki handia dira eta irakasleek euren beharren arabera moldatu ditzakete.

Poloniako gobernuak testu liburu digitalen sorkuntzara bideratu du aurretik paperezko liburuen erosketa laguntzeko erabiltzen zen dirua (24 milioi € inguru). HBIak sustatzeko Poloniak jorratu duen bidea interes handia sortu du inguruko gobernuetan.

Ondoko estekan klikatuta ikus dezakezu material libre hau:

Testu-liburuak

 Materialak lau etapatan banatzen dira:

Barnean hainbat materiatan antolatutako testuak, diagramak, animazioak,
bideoak, eskemak eta galdetegiak daude.


Informazio-iturria: https://www.opensocietyfoundations.org/voices/poland-pioneering-worlds-first-national-open-textbook-program

Nola instalatu mahaigaineko Telegram Luberrin

(2025/9/7an eguneratua)

Telegram Desktop mezularitza aplikazioaren ordenagailurako bertsioa da. Bere ezaugarrien artean hauek nabarmendu daitezke:

• Whatsapp-ena ez bezala aplikazio natiboa da. Nabigatzailea martxan jarri gabe ibiltzen da, are gehiago, konektatzeko telefono mugikorraren zenbakia eskatzen du, baina erabiltzeko ez du mugikorra aldean edo piztua behar.
• Audio deiak egin daitezke ordenagailutik mugikorrera eta alderantziz edo ordenagailutik ordenagailura. 
• Linux, Windows eta Mac-erako bertsioak daude, Android eta IOS gain jakina.
• Aplikazioa zerbitzariaren aldetik ez da librea, bezeroen aldetik bai.
• Oraindik ez du euskara hizkuntza integratzen baina euskaratuta dago eta erraz jartzen da euskaraz bai mugikorren bai mahaigainean. 

Instalazioa Ubuntu eta deribatuetan.

Hainbat modu daude instalatzeko. Nik hau proposatzen dizut.

1- Joan Telegram Desktopen  webgunera eta klikatu Get Telegram for x64 konprimatutako fitxategia deskargatzeko.

2- Joan deskargatu duzun tokira eta tsetup fitxategia ireki eta bertan erauzi. Telegram izeneko karpeta ageriko da.

3- Administratzaile rolarekin karpeta hori /opt/ karpetara kopiatuko dugu. Karpeta horretatik. Bertsio berritzea bada aurretik zaharra ezabatuko dugu:

sudo rm -R /opt/Telegram

edozein kasutan, kopiari ekingo diogu:

sudo cp -r Telegram/ /opt/

4-  Abiarazlea sortuko dugu. Horretarako ireki testu-editorea eta hau kopiatu

[Desktop Entry]
Name=Telegram Desktop
GenericName=Telegram mahaigainean
Exec= /opt/Telegram/Telegram %F
Type=Application
Icon=
Categories=Network;
Keywords[eu]=komunikazioa
Terminal=false
 

Gorde telegram.desktop izenarekin eta kopiatu lasterbideen karpetara

sudo cp telegram.desktop /usr/share/applications/

Denbora baduzu  bilatu dezakezu Telegramen ikonoa, gorde eta aurreko  fitxategian zehaztu non jarri duzun ikonoa Icon= lerroan.

Telefonoarekin qr bat eskaneatzea edo  mugikorraren zenbakia eskatuko dizu eta bertara bidaliko dizu kode bat. Kode hori idatzi eta horrela egiaztatuko duzu identitatea.
Erabiltzeko prest dago.


Idatzi zure buruari: gordetako mezuak 

• Oso aukera interesgarria da zure buruari mezuak bidaltzeko:
•  ohar bloka moduan
• fitxategien biltegia edo hodeitxo moduan
• argazkiak eta bestelako dokumentuak mugikorretik ordenagailura edo alderantziz pasatzeko.

Aukera honetaz baliatzeko  goiko bilatzailean zure izena jarri eta Gordetako mezuak agertuko zaizkizu. Hortik bidali behar diozu mezuak zure buruari.

Telegram euskaraz jartzeko
kopiatu ondoko esteka, zure buruari bidali eta ondoren klik egin gainean eta baimena eskatuko dizu aplikazioa euskaraz (beta) jartzeko:

https://t.me/setlanguage/eu-beta


Ezarpenak

Menuan klikatu eta Ezarpenetan konfigura dezakezu aplikazioa zure gustura, itxuraz zein funtzionamenduaz:

Egunerokoan erabili behar baduzu baloratu ezarpenetan konfigurazio hauek aktibatzea:

• aktibatzea mezuak bidaltzean Ktrl+Sartu bidez (edo gezi urdina) puntu eta aparteak egin ahal izateko.
• Aurreratuetan, aktibatu Bistaratu ikonoa erretiluan. Abiarazi sistema hasten denean.
• Desaktibatu Erabili zuzentzaile ortografikoa (oraindik ez baitago prest euskararako eta aktibatuta badago hitzak azpimarratuak agertuko dira).

Kanalak eta taldeak

Whatsapp-en aldean Telegramek kanalak ditu. Kanalak informazioa norabide bakarrekoak dira, informazioa bidaltzeko erabiltzen ahal dira informatzailea badira eta, gehienetan, informazioa jasotzeko erabiltzen dira. Kanalak bilatzeko aski duzu Telegrameko bilatzailean bere izena jartzea eta onartzea.

• ARGIA
• BERRIA egunkaria

Taldeetan ordea parte har daiteke. Software librearen zalea bazara bi talde hauek interesatzen ahal zaizkizu:

• Librezale
• Hezkuntzan ere Librezale

2017-2018 ikasturteko egutegia

2016-2017 ikasturteko egutegia

Datorren ikasturteko plangintzak egin behar badituzu agian ondo etorriko zaizu 2017-2018 ikasturteko egutegia LibreOfficeko kalkulu orrian egiteko oinarria.

Deskarga

Lehenengo orrian ikasturte osoa ikus daiteke:

eta hurrengoetan hilabetez hilabete zuen aurreikuspenen zain.

 

Argitaratzeko, behin moldatu ondoren, pdf formatura pasa dezakezu edo pantaila argazkiak eginda png formatura.

Firefox: korritze automatikoa

Web orri bat luze bat irakurtzean -edo gainetik begiratzean- nekagarri eta zaratatsua izaten da saguaren gurpilari behin eta berriz eragitea.

Horren ordez Firefoxek badu korritze automatikoa izeneko aukera bat: haren bidez saguaren gurpilean klik egiten dugunean (esteka batetik kanpo, jakina) borobiltxo bat agertzen da eta aski da -sagua klikatu gabe- erakusle edo punteroa borobiltxoaren azpira mugitzea testua -sagua askatuta ere- automatikoki korritzeko behera. Korritze abiadura erakusle eta borobiltxoaren arteko distantziak markatzen du. Erakuslea gainean jarriz gero goraka egingo du.

Pixka bat praktikatu behar da teknika menperatzeko baina aisa kontrolatzen da.

Korritze automatikoa aktibatzeko Firefoxen menuan klika > Hobespenak > Orokorra fitxa > Korritze automatikoa gaitu.

Probatu eta gustukoa ez baduzu aski duzu desaktibatzea.

Zim wiki orain euskaraz

Zim wikia oharrak hartzeko eta zereginak kudeatzeko aplikazio librea 0.66 bertsiora eguneratzearekin batera euskaraz instalatzen da.
 

Bertsio-berritze honen beste berrikuntza aipagarriak:

* Added translations for: Amharic, Arabic, Basque, and Portuguese

Bertsioaren berrikuntza eta errore-konponketen zerrenda hemen.

Zim wikia erabiltzen baduzu  euskaratzeko egin behar duzuna da softwarea eguneratzea (PPA bidez instalatu bazenuen) edo aplikazioaren azken bertsioa instalatzea.

Zim wikiaren Windows bertsioa, une honetan 0.69 da baina -agian ofizial ez izanagatik- ez dago euskaraz.

Zim wikiaren gaineko informazio gehiago blogaren mezu honetan.

Nafarroako administrazioaren lehenengo urratsak software librerantz

Nafarroako Parlamentuaren eskariz Informatikaren, Telekomunikazioen eta Berrikuntza Publikoaren Zuzendaritza Nagusiak administrazioan egun erabiltzen informazio sistema eta plataforma pribatiboen software librerako migrazio progresiboari hasiera emango dio. Horretarako laguntza teknikoko kontratu baterako deialdia zabaldu du.

Deialdiaren zehaztasunak hemen. PDFaren 7. orritik aurrera.

Pl@ntnet: lore eta landareen identifikatzailea

Zer lore da hau? zer landare da hau?
Egiozu argazkia eta Pl@ntnet lagunduko dizu identifikatzen. Bi eratara erabili daiteke:
Web orritik: 
http://identify.plantnet-project.org
edo Androiderako aplikazioa instalatuta:
https://play.google.com/store/apps/details?id=org.plantnet

Batean zein bestean lore edo landarearen argazki batetik abiatuko gara (mugikorrean unean egin dezakezu edo galeriatik aukeratu),

 

Pl@ntnet-ek galdetuko du argazkia hosto, lore, fruitu edo zurtoina den eta bere datu basean antzekoak bilatuko ditu eta hiruzpalauren artean hautatzeko aukera ematen dizu haren argazkiak erakutsita.

Behin identifikatuta haren gaineko informazioa ematen du argazkien bidez eta Wikipediaren bitartez.

Aplikazio honi esker liburuen bidez identifikatu ezin izan nuen hainbat lore erantsi ahal izango diot koloreen bidez sailkatutako loreen gaineko web honi: http://loretan.weebly.com/

Peek, pantailatik gif animatuak egiteko tresna erraza

Peek Linuxerako pantailaren bideo grabagailu sinple bat da. Ffmg eta Imageclik erabiltzen ditu grabazioak egiteko. Irudiak GIF animatu moduan grabatzen ditu edo, nahi izanez gero, soinurik gabeko Webm edo MP4 bideo formatutan.
Bideo grabazioak egiteko OBS edo bestelako aplikazio hobeak daude baina Peek bereziki interesgarria da gif animatuak egiteko bere erraztasun eta sinpletasunagatik.

Erabilera

Martxan jartzen dugunean leihatila garden bat agertzen zaigu, itxuraz menurik gabea, markoaren barrenean duena grabatzeko prest. Itxuraz esan dut zeren eta aplikazio barraren ezkerrean agertzen den P logoan klikatua menu txiki bat agertzen da hobespenak aldatzeko aukera ematen duena.

Peek-en hobespenak

Bertan, besteak beste, grabazioa GIF, WebM edo MP4 formatuan egiteko aukera ematen du (kontuan izan soinurik ez duela grabatzen). Behin hobespenak zehaztuta, grabatu nahi dugunaren gainean jarriko dugu.

Leihatilaren tamaina aldatu nahi badugu leihoaren izkin batera joko dugu izkinaren adierazlea agertu arte eta orduan saguan klikatuta arrastatuko dugu nahi dugun tamaina izan arte. Leihatilaren erdian agertzen da, pixeletan neurtua, haren zabalera eta altuera. Kontu izan leihatila oso handia jartzen  baduzu GIF fitxategia oso astuna bilakatu daitekeela -batez ere web batean jartzeko asmoa baduzu-.

Grabazioa hasten den momentuan leihatila ezin da tokiz aldatu.

Grabazioa gelditzean proposatuko ditu Bideoak karpetan gordetzea gif formatuarekin.


Grabatzen duzun bitartean teklatuarekin edo saguarekin zer egiten duzun ikustea nahi baduzu Key-mon aplikazioa erabil dezakezu haren paneltxoa grabazio leihatilan sartuta.


eta zertarako erabiltzen ahal dugu?

Idatzizko web-tutorialetan erakutsi nahi duguna laburra eta erraza den kasuetan.

 Bideoko  mikro-sekuentziak sentimenduak, ekintzak eta abar adierazteko

Istorioak animazioez ilustratzeko. Erakusten ahal dugu, HotShots aplikazioaren laguntzaz, Korrika 20ren azken kilometroen ibilbidea:

Istorioko pertsonaia Miarritzetik Erromara hegan egin zuela.

Erroman aipatuta, Google Earth-en laguntzaz, Coliseoan har dezakegu lurra.

Okurritzen al zaizkizu beste erabilpenak? Uzten ahal duzu zure ideiak iruzkinetan.


Instalazioa

Hasieran esan bezala aplikazioa Linux sisteman dabil bakarrik. Ubuntun PPA bidez instala daiteke terminalean honako hauek hurrenez hurren itsatsi eta exekutatuta:

sudo add-apt-repository ppa:peek-developers/stable sudo apt update sudo apt install peek

Proiektuaren gaineko informazio gehiago eta beste distribuzioetan instalatzeko erak azalduta daude Peek-ek Githuben duen orrian.



Hori bai Luberri erremasterizazioa erabiltzen baduzu kontuan izan 16.04.4 bertsiotik aurrera Peek aplikazio grafikoen atalean dagoela instalatuta.
Peek software librea da eta horri esker euskaraz dago 1.0 bertsiotik.


Beste aplikazio interesgarriak Software-bilduman eta Linux-aplikazioetan.

Her filmaren euskarazko azpitituluak

2013an estreinatutako film hau informatika gaia duen filma bat baino amodiozko filma goxo bat da baina etorkizuneko sistema eragileez edota etorkizuneko gizakiez zer pentsa eta eztabaidagaia eskaintzen du.


Filmaren oinarrizko datuak eta jatorrizko bertsioaren erreferentziak, eta Open Data Euskadik eskainitako euskarazko azpitituluak azpitituluak.com web orrian daude deskargatzeko.

Moodle: jardueren inportazioa "Gaiak fitxetan" formatuko ikastaroetan

Gaur saiatu naiz "Gaiak fitxetan" formatua duen ikastaro batera beste ikastaro baten jarduera bat inportatzen eta "inportazioa ondo egin da" mezua erakusten zidan Moodle baina nik inportatutako jarduera ikusi ez.

Proba hemendik, proba handik, azkenean ikastaroaren ezarpenetan  "Gaiak fitxetan" formatutik "Gai-formatu"ra pasatu dut eta hara non agertu den inportatutako "Jarduera umezurtzak" izeneko bloke berri batean.

Hortik zegokion gaira herrestan eraman eta ikastaroari bere jatorrizko "Gaiak fitxetan" formatura ekarri dut.

Beraz, "Gaiak fitxetan" formatua duen ikastaro batera jarduerak inportatuz gero kontuan izan inportatutako elementuak ikusteko ikastaroaren formatua aldatu beharko duzula.

Oharra:
Akats hau Moodle 2.9.7an atzeman dut

Openshot bueltatu da Luberri sistemara

Bideo editorearen 2.2 bertsioa Luberri sisteman ez zebilen -hobe esanda, ez zen ikusten- baina atera berri duten 2.3 bertsioa bai.

Gainera berritasun interesgarri batzuk ekarri ditu. Hona hemen, labur deskribatuta, deigarrienak:

• Eraldatzeko tresna (Transform Tool): haren bidez klip batean eskuin klik eta "Eraldatu" hautatzean ikusteko leihoko fotograman nodoak agertzen dira eta klipa txikiagotu (Ctrl sakatuta proportzioa mantendu nahi baduzu) eta pantailaren edozein tokitan koka daiteke. Erreproduzitzeko markatzailea beste puntu batean kokatu eta bertan tokiz edo lekuz aldatzen baduzu bertan marka bat egiten du eta erreproduzitzean tamaina edota kokapena aldatuko du.
• Hobekuntzak zoom tresnan: Orain denbora-eskala alda daiteke klipak hobe kontrolatzeko  Ctrl tekla eta saguaren gurpil aurrera (handiagotu) eta atzera (txikiagotu) eginez eta, hori egitean, fotograma aktiboa ez da galtzen eta zentratuta geratzen da.
• Labana tresna (razor tool) edo klipak ebakitzeko artazia tresna barrara bueltatu da.
• Hobekuntzak tituluetan: titulu motak orain koadro txikitan agertzen dira sareta batean eta tituluaren izena eta testuak fitxa bakarrean agertzen dira.

Bideo honetan ikus daiteke nobedade hauen demostrazio bat:


Beste berritasunak eta konpondutako akatsak ikusteko, eta aplikazioa deskargatzeko jo proiektuaren blogera.


Oharrak:

• Probak egiten proiektua itxi da. Badirudi egonkortasuna aplikazio honen puntu ahula izaten segitzen duela, batez ere proiektua tamaina eta efektuak hartzen dituen neurrian. Hori kontutan izanda proiektu bat hastean egin behar dugun lehenengo gauza proiektua gordetzea eta izen bat ematea da. Horretaz gain sarri gordetzea komeni da edota hobespenetan gordetze automatikoa sarriago egitea agintzea -nik minutu bat jarri dut-.
• Luberri 16.04.5 bertsioan, noski, Openshot-ek bere tokia edukiko du (Kdenlive-en ondoan).

Ubuntu eta deribatuetan PPA bidez instalatzeko irekin terminala (Crtl+Alt+t) eta azpiko aginduak banaka kopiatu eta terminalean exekuta itzazu:

sudo add-apt-repository ppa:openshot.developers/ppa sudo apt update sudo apt-get install openshot-qt

Euskal blogosfera...

           ... ez da berdina izango zu gabe, Hasier.

Eskerrik asko eta beti arte.

Nola lausotu edo pixelatu irudi baten edo bideo baten area

Eskolan ikasleen argazkiak egin edo bideoak filmatzean argi ibili behar gara eta senaz jokatu.

 Ikasleek ez dute dantzatu edo antzeztu behar euren irudiak erakusteko. Filmatzean ikusezin izaten saiatu behar dugu ekintza ez baldintzatzeko. Lehenengo planoak ekidin behar dugu. Barregarri edo iraingarri izan daitezkeen irudiak ezabatu behar ditugu eta, funtsean, zuhurtziaz jokatu behar dugu.

Ikasleren baten irudiak argitaratzeko baimenik ez badugu saiatuko gara irudietan ez ateratzen, baina, beti ere, ikaslea baztertuta sentitu gabe. Aukera bat izan daiteke berak ateratzea argazkiak.

Talde osoa ateratzen bada irudian aukera bat da ikaslearen burua lausotzea edo pixelatzea ezagutu ahal ez izateko.

Hainbat aukera daude, nik proposatzen ditudanak software libreko aplikazioak dira: irudietarako Gimp eta bideoetarako Kdenlive.

Irudiaren kasuan Gimp editorearen bi tresna erabil ditzakegu: zirriborroa edo difuminatzailea eta pixelatzeko iragazki edo filtroa.


Bideoaren kasuan Kdenlive editorea  proposatzen dizut automaskara efektuaren bidez:


.

Irudia eta oinarria den bideoa Virtual Tour of Grove Children's Preschool haureskolako Creative Commons lizentzia duen bideoa da.

Ubuntu: ekipoa piztean web bat irekitzea automatiko

Ordenagailua Ubuntuko saio bat hastean automatikoki web bat irekitzea nahi baduzu horrela egin daiteke:

Aplikazioak > Sistemaren tresnak > Preferences > Abio aplikazioak

Bertan ikusten dugu, erabiltzaile partikular moduan, zein aplikazio ireki behar diren automatikoki saioa hastean. Beste bat gehitzeko esango diogu eta fitxa bat irekiko da non abiarazleari izen bat jarri behar diogun eta iruzkinean, nahi izanez gero, azalpentxo bat jar dezakegun eta, garrantzitsuena, Komandoa atalean zehaztu behar diogun zein aplikazio abiarazi behar den eta, kasu honetan, web orriaren helbidea parametro moduan:

firefox http://ezdakitzer.eus

Gorde eta probatu.

Gustukoa ez baduzu edo, dena denagatik, kendu behar baduzu Abio aplikazioen zerrendan hautatu eta ezabatu.

2017-2-10ekon ilargi eklipsea

Atzo ilargi eklipsea izan zen bertako gaueko hamaika eta erdietan eta lau orduz, izan ere lurrak, eguzkia eta ilargiaren artean kokatuta, itzala egin zion ilargiari. Ilargi-eklipseari penunbra-eklipsea ere esaten zaio.

Ez nuen aukerarik izan erreala ikusteko baina, zenbaitetan, txirrindulari-lasterketetan gertatzen den bezala, teknologiari ezker hainbat fenomeno hobeto ikusten dira etxeko sofatik.

Bideoa egiteko software libreko bi aplikazio erabili ditut: batetik Stellarium eklipsea ikusteko eta bestetik OBS Studio pantailatik grabatzeko.

Lehenengoak pazientzia pixka bat eskatzen du fenomenoa ikusteko:

1. bilatzailearen bidez "ilargia" astroa bilatu
2. zentratu pantailan denbora pasarekin mugi ez dadin
3. eklipsearen unea kokatu (atzera eginez hilaren 10 arte, gaueko hamarrak arte esaterako -kontuan izan  eklipsea GMS 0 ordutan gutxi gora behera hasi zela 4ak arte-) 
4. eman erreprodukzioa azkartzeko botoiari hiru aldiz.

 

Eta hona hemen bideoa:

Kontuan izan 17 segundotan lau bat orduko prozesua ikusten dela, alegia 15 bat aldiz azeleratuta dagoela.
Hasieran ikusten da nola itzala zabaltzen den eskuinetik ezkerrera eta astroa nola iluntzen den. Bukaeran, ordea, eskuinetik ezkerrera argitasuna zabaltzen da.

Luberri sistema: nola egin administrazio lanak erabiltzaile arrunt baten saioan

Luberri sisteman erabiltzaile arrunt baten saiotik ekipoaren administrazio lanak, softwarea edo inprimagailuak instalatu, erabiltzaile-altak eman eta halakoak egin daitezke. Eragiketa egitean eskatuko digu administratzailearen pasahitza.

Bestetik terminalean sudo erabili nahi badugu badira bi aukera: erabiltzaile hori administratzailea egin edo, egokiagoa, terminalari esan administratzailea garela. Horretarako terminala ireki (Ctrl+Alt+T edo arakatzailean eskuin klik eta Ireki terminalean) eta komando hau idatzi: su administratzailearen-izena

su  = switch user, alegia aldatu erabiltzailea.

Erabiltzailearen saiora bueltatzek terminala itxi edo exit komando exekutatu.

Oharra:  ez eman inoiz inori administratzailearen pasahitza.

Ergonomia ordenagailu eramangarriekin eta smartphonekin

Hona hemen ordenagailua eta smartphonea erabiltzeko jarrera eta ohitura osasungarri batzuk biltzen dituzten pare bat bideo interesgarri Kanadako  iCHAPEAU elkarteak eginak.

Thunderbird mezuak kolorez markatu

Oso ohikoa da posta bezeroan mezu bat irakurri eta pentsatu gero bueltatu behar garela mezu horretara polikiago irakurtzeko edo datuak hartzeko.

Mezu hauei erreferentzia bat jartzeko Thunderbird posta-bezeroak metodo erraz bat dauka: markatu nahi dugun mezuan jarri eta 1 eta 5 zenbakien bitarteko tekla bat sakatuz gero mezua kolore desberdin bat hartuko du:

1- gorria

Sakatako teklak Screenkey aplikazioaren bidez ikusten dira

2- laranja
3- berdea
4- urdina
5- morea
0 sakatuz gero kolorea kentzen da.







Nik normalean kolore bakarra erabiltzen dut baina afizioa hartzen baduzu jakin kolore bakoitzak baduela etiketa edo esanahi bat eta esanahi hori edita daitekeela Thunderbirden hobespenetan azpiko irudian ikusten den moduan.

Koloreen etiketak editatzen.