multimedia etiketadun mezuak erakusten. Erakutsi mezu guztiak
multimedia etiketadun mezuak erakusten. Erakutsi mezu guztiak

2022/01/05

Storyboarder: storyboard-ak egiteko aplikazioa

Baina, zer da storyboard bat? 

Wikipediak dioenez: irudi edo zirriborroen segida da; bere helburua animazio edo film bat egin aurretik horren egitura irudikatzea eta planoen ezaugarriak zehaztea da. Bineta bakoitzean plano baten irudikapena agertzen da eta kamera mugimendua badago geziz markatua agertzen da. 

Paperean egina komiki baten antza du. Zirriborroetan definitzen da plano mota, pertsonaien kokapena, kameren zein argien posizioa eta mugimendua.

Storyboard-a animazio, film eta edozein grabazioa zuzendu behar duenarentzat lan-eskema da.

Zer abantaila du storyboard-a digitala egiteak? Irudigintza digitalak dituen guztiak: tresnak, desegin-berregin, mugitu, kolore-paletak, modu digitalean gorde eta bidaltzea...

Storyboarder

Doako aplikazio multiplataforma (Linux, Mac, Windows) erraz eta intuitibo xamarra. Badirudi software libre lizentzia duela*


Ezaugarriak

Bi interfaze konbinagarriak ditu:

  • Esku hutsezko interfazea non pintzelak, koloreak, borragoma, mugitzeko eta berrenkoadratzeko aukera, fotogramak bikoiztu, ordenatu daitezke... Zirriborroaren azpian segida ikusi daiteke bere hartan edo animatzeko denbora-lerro moduan. Interfaze honetan aritzeko guztiz gomendagarria da tableta digitala erabiltzea.

https://github.com/wonderunit/storyboarder    
 


  • Open Shot Generator. Interfaze honetan 3D eszena batean pertsonaiak, objektu nagusiak, efektuak, kamerak, argiak... hautatu, kokatu, noranzkoak eskuz zein parametroen bidez zehaztu eta eszenaren argazkia egin eta aipatutako sekuentziaren interfazera gehituko dugu.

Ezkerreko panelean elementuen kokapena (pertsonaiak, kamera, argia) eta euren parametroak ikusten dira. Panel nagusian eszenaren ikuspegia eta pertsonaien gorputzak mugitzeko nodoak.

 

Hasieran hautatzen da fotogramen aspektu erlazioa.

Proiektu bakoitza karpeta batean gordetzen da era automatikoan. Bertan testu fitxategi batek biltzen ditu elementuen ezaugarriak eta irudiak eta bestelakoak azpikarpetetan gordetzen dira.

Irudien edizioa findu nahi bada zuzenean fotograma zuzenean ireki daiteke Gimp, Krita, Photoshop edo bestelako editorean.

Esportatu daiteke PDF gisako komiki antzeko dokumentu batean, GIF animatuan, bideoan, Premiere fitxategia...

 

Instalazioa

Esan bezala aplikazioa multiplataforma da eta Githubeko orri honetatik deskargatu daiteke.

Ubuntu, Linux Mint eta deribatuentzat nire gomendioa da .deb bertsioa deskargatzea eta klik bikoitza eginez instalatzea.


Oharrak

  • Badirudi MIT lizentzia duela. Informazio gehiago hemen.
  • Aplikazio honek prozesadore eta memoria dezente erabiltzen du. Ezarpenetan kalitatea murriztu daiteke aplikazioa arinago ibili dadin.

* Linuxerako nire aplikazioen bilduma hemen.

 


2021/11/16

Nola erantsi audio bat Xournal++en elementu bati

 Xournal++ aplikazioak aukera ematen du edizio elementuei (testu, elementu grafiko, irudi...) audioa gehitzeko. Dena den grabatu ahal izateko doikuntza batzuk egin behar dira, bestela Grabagailua ezin da hasi / Recorder could not be started agertuko zaigu.

Ikus dezagun nola:

1- Lehenik eta behin ezarpenetan aldaketa pare bat egin behar dugu: Editatu > Hobespenak > Audio-grabazioa, eta bertan, batetik Biltegiratzeko karpeta bat aukeratu behar duzu; bestetik Audio gailuetan System default-en ordez default jarri behar duzu. Horrekin prest dago.

 

2- Audioa sortu. Audioa sortzeko menuaren audioen kontrola grabatzeko botoi gorria sakatu behar dugu (atzeko planoa kolorea hartuko du) eta objektua sortuko dugu (testua edo marrazkia); audioa bukatzean, berriro sakatuko dugu grabazioaren botoi gorria grabazioa bukatzeko. Audioa elementu horri lotuko zaio.

3- Audioa erreproduzitu. Sortutako audioak erreproduzitzeko menuan: Tresnak > Erreproduzitu objektua aktibatuko dugu eta audioa lotuta duen objektua klikatzean audioa erreproduzituko da. Menuan editatzeko elementu bat hautatzean (arkatza, nabarmengailua, testua...) objektuen erreprodukzioa desaktibatuko da.


Erreprodukzioa aktibatzean soinua duten objektuak argi ikusten dira eta soinua ez dutenak erdi garden.

Eskerreko karratuak soinua du estekatuta eta ezkerrekoak ez.


2021/08/18

Nola pasa mugikorreko argazkiak eta bideoak ordenagailura Telegram aplikazioaren bidez

Mugikorrean egindako argazkiak, bideoak eta bestelako fitxategiak mugikorretik ordenagailura Telegram aplikazioaren bidez aplikazioa eduki behar dugu bai mugikorrean bai ordenagailuan (Telegram Desktop).

Bat edo gutxi badira aski dugu mugikorreko galeriatik-edo aukeratzea eta partekatu edo bidaltzea Telegram bidez (1) gure buruari Gordetako mezuak (2) kontaktuaren bidez.

 


 
Berak proposatzen du konprimatuta bidaltzea, jatorrizkoa baino gutxienez 10 aldiz arinagoa, baina jatorrizkoa bidali nahi badugu kalitate osoa mantentzeko konprimitzearen aukera desmarkatu behar dugu.
 

Behin ordenagailuan jasota, Gordetako mezuak kontuan begiratu eta fitxategiaren gainean eskuin klik egin eta nahi duzun karpetan gorde.

Honen arazoa da fitxategiak banan bana gorde behar direla. Baina bada multzoka transferitzeko modu erraz bat: fitxategi asko transferitzeko galeriatik-edo hautatuko ditugu intereseko batean klik luzea egin eta borobiltxoak agertzen direnean interesatzen zaizkigun gainerakoak aukeratuko ditugu, edo egun horretako guztiak aukeratuko ditugu.

 


Aurrekoan bezala bidaliko ditugu Telegram bidez gure buruari Gordetako mezuak kontaktuaren bidez. Oraingoan ordea egun horretan bidalitako guztiak multzo batez gordeko ditugu. Horretarako ordenagailuko Telegramen Gordetako mezuak kontuan gaudela menua zabalduko dugu hiru puntuetan klikatu eta Esportatu txat historiala klikatuko dugu.

 

eta esportazioaren aukerak zehaztuko ditugu:

  • fitxategi motak
  • fitxategiaren gehienezko tamaina
  • bidea, alegia nora deskargatu. Deskargak/Telegram Desktop dator lehenetsita baina alda dezakegu.
  • eta bidalitako zein egunetik zein egunera. Gaur bidalitakoak esportatzeko egutegian zehaztuko dugu Hemendik: gaur, hona: gaur.


eta zehaztutako baldintzak bidalitako fitxategi guztiak zehaztutako karpetan gordeko dira.

2021/07/23

Krita euskaraz

 Krita KDE inguruneko diseinu grafikoko aplikazioa da. Oso interesgarria eskaintzen dituen posibilitateengatik, haien artean azpimarratzeko modukoa da konbinatzen dituela raster edo bitmap geruzak eta geruza bektorialak.

 Aplikazioa Linux eta Windowserako bertsioak ditu. Ia erabat euskaratuta badago ere, Linuxen ohiko instalazioa nahiko bertsio zaharra instalatzen du eta termino gehienak ingelesez.  Ikus dezagun nola instalatu azkenetariko bertsioa eta goitik behera euskaraz.

Ubuntu, Linux Mint edo deribatuak erabiltzen baduzu ireki terminala (Ctrl+Alt+t) eta itsatsi eta sartu, hurrenez hurren, agindu hauek:

sudo add-apt-repository ppa:kritalime/ppa
sudo apt-get update
sudo apt-get install krita krita-l10n

Hori eginda, mezu hau idazteko unean Krita 4.4.3 instalatzen da. Ikusten baduzu programa erdizka ingelesez agertzen dela, horrek esan nahi du hizkuntza paketea zaharkituta dagoela. Pakete hori berritzeko ireki synaptic aplikazioa (instalatuta ez baduzu sudo apt install synaptic egin) eta krita-l10n hizkuntza paketea berritzeko eskatu:

hizkuntza paketea 1.4.2.9tik 3.4.4.3-2ra berritzen

2021/03/30

Subtitle Editor euskaraz

 Probatu dut Subtitle Editor azpitituluen editorea eta oso interesgarria iruditu zait.

 Ezaugarriak

  •  GTK+3n egina GNU/Linuxen funtzionatzen du.
  • Bereziki diseinatuta azpitituluak ondo sinkronizatzeko. Integratzen dut bideo-erreproduzigailua eta soinu-uhinak erakusten ditu.
  • Soinu erreproduzigailuan azpitituluak ikusten dira. 
  • Erroreak atzematen ditu.
  • Sinkronizazio tresnak ditu. Azpitituluak zatitu eta batu ditzake.
  • Azpitituluak itzultzeko erabili daiteke.
  • Azpititulu formatu askotara esportatu daiteke.

 

Pantaila-argazkia 



Instalazioa

Debian, Ubuntu eta deribatuetan terminala ireki (Ctrl+Alt+t) eta agindu hau itsatsi:


sudo apt install subtitleeditor


Euskaraz jartzea

Lokalizazioa egina dago eta hurrengo eguneraketa, seguru aski, euskaraz egongo da baina orain dagoen bertsioa 0.54.0 euskaraz erabili nahi baduzu deskargatu dezakezu subtitleeditor.mo fitxategia, ireki terminala fitxategia duzun karpetan eta agindu hau itsatsi:


sudo cp subtitleeditor.mo /usr/share/locale/eu/LC_MESSAGES/


Erabilera

Ikastetxeei erreparatuta, bi erabilera nagusi bururatzen zaizkit:

  • Filma, dokumental edo bestelako bideoren azpitituluak eskuratu -hainbat bilduma daude- zatitu, banatu, euskaratu, batu, zuzendu eta azpitituluak.eus webgunera kargatu. Praktika honekin itzulpena lantzen da.
  • Filma, dokumental edo bideoa baten fitxategia eskuratu eta haren azpitituluak sortu. Praktika honekin lantzen da gehien bat transkripzioa, alegia hizketatik testura pasatzea (irakurketaren alderantzizko prozedura). Euskarazko bideo fitxategiak lortzeko hainbat bide daude, besteak beste: 

Landu daitezke euskalkiak, kale-hizkuntza edo erregistro informalak...  

Bideo tutorial honetan ikusi daiteke aplikazioaren oinarrizko erabilera:


2020/12/07

Gabonetako egutegia, H5P jarduera berria

 H5P jarduera berria gehitu du bere bilduman: Advent Calendar edo Gabonetako egutegia. Moodlen jada erabiltzeko moduan dago.

Jarduera honetan eguberri aurreko egunak agertzen dira eta egun bakoitza klikatzean irudi bat agertzen da eta hari lotutako testu, audio. esteka, irudi edo bideo bat abiatuko da. Ideia polita izan daiteke egun bakoitzean ikasle baten irudia jarri eta berak sortutako testu bat edo audio grabazioa jarri -kontakizuna, abestia, desira...-.


Atzeko planoan irudi bat jar daiteke, egun gehiago gehitu daitezke eta elur efektua. 

Berez, Gabonetarako pentsatuta badago ere beste egoeretan ere erabili daiteke: oporrak, korrika...


2020/10/17

UEMA: hizkuntza paisaia kartelez aberazten

UEMA erakundeak, Udal Euskaldunen Mankomunitateak, merkataritzaren, ostalaritzaren eta, oro har, zerbitzuen sektorearen hizkuntza paisaia kartelen bidez aberasteko zerbitzuari bultzada emateko ekimena abiatu du.


Ekimena aurkezteko bideo hau eta web orrian jarri duten kartelen erakusketa prestatu dute:

uema.eus/kartelak/

Merkatarientzat ez ezik eskoletarako ere material interesgarria bada, ikasleekin esate baterako janarien hiztegia lantzeko janarien inguruko kartelen bidez.

Bide batez janarien diaporama edo diapositiba pase horrek aukera ematen digu bururatzeko H5Pren slider jarduera interaktiboak, Moodleen  zer aukerak eskaintzen dituen.

Eskerrik asko UEMAri kanpainagatik eta prestatutako materialagatik.

 

 

Oharra irakasleentzat:

Gelan bideoa astiro ikusteko youtubek engranajea sakatuta bideoaren erreprodukzio abiadura kontrolatzeko aukera ematen dizu. Bestela deskarga dezakezu eta VLC ikustailearen bidez ere kontrola dezakezu erreprodukzio abiadura.




2020/04/23

Nola egin ahozko azalpenak edo iruzkinak Moodlen

(Benetako irakasleen iruzkinak entzun ondoren berridatzia)

Bai zereginak deskribatzean bai horien bidalketen kalifikazioa-ebaluazioa egitean Moodlek eskaintzen du aukera fitxategiak eransteko.

Erabilera intentsiboko egun hauetan batez ere ikasle guztiei zeregin guztietan iruzkinak idaztea nekagarria da eta, batzuetan, denbora faltagatik ez dugu egiten edo iruzkinak nahi baino laburragoak egiten ditugu. Ahozko iruzkinak egitea izan daiteke aukera bat lana arintzeko, batez ere teklatuarekin trebeak ez garenontzat.

Deskripzioak zein iruzkinak egiteko Atto editorea erabiltzen badugu* , eta
goiko irudian agertzen den bezala zereginaren ezarpenetan Feedback iruzkinak aktibatuta badugu aukera izango dugu iruzkinean bertan testuarekin batera ahozko iruzkinak. Horretarako Atto editorearen tresna barran barra guztiak erakusteko botoia sakatu eta Txertatu audio grabazioa klikatuko dugu.


Baimendu nabigatzaileari mikrofonoaren erabilera, begiratu mikrofonoaren ozentasuna eta grabatu. Bi minutuko topea dauka. 

Kito

Ikasleak horrela ikusiko du.



Bi minutuko grabazioak motz geratzen bazaizkizu Audio Online Voice Recorder gehigarria instala dezakezu nabigatzailean (denek onartzen dute)
Behin instalatuta nabigatzailearen barran agertuko da bere abiarazlea eta klikatu ondoren honelako interfazea sinplea ikusiko dugu:


Start Recording eginda grabazioa hasi Stop Recording gelditzeko eta Download egindako grabazioa gordetzeko.

Orain ikusiko dugu Moodleen nola aktibatu behar den horrelako grabazioak bidaltzeko aukera;

Demagun zeregina dagoeneko diseinatuta duzula: aktibatu edizioa > sartu zereginaren ezarpenetan eta joan Feedback motak atalera. Bertan aktibatu Feedback fitxategiak (Feedback iruzkinak testukoak dira, horiek ere aktibatzea komeni da sikiera abisatzeko ikasleari audio feedbacka duela).

Zeregina zuzentzean aurretik azaldu dudan moduan grabatu eta gorde dugun audio fitxategia Fitxategiak atalera arrastatu edo txertatuko dugu. 

Irudian ikusten denez testu iruzkina erabili daiteke abisatzek ikasleari iruzkina audio fitxategian duela.














Ikasleak kalifikazioa jasotzen duenean horrela ikusiko -eta entzungo- ditu irakaslearen iruzkinak.






Modu batera zein bestera egin ahozko iruzkinak egitean tentuz jokatu behar du irakasleak, izan ere ikasleak iruzkinaren grabazioa edukiko du.





Oharra:
* Seguru aski aktibo duzun testu editorea Atto izango da, baina mezu honetan duenaren itxura oso desberdina badu izan daiteke TinyMCE editorea edukitzea. Moodleeko erabiltzaileak aukera dugu Atto edo TinyMCE erabiltzeko. Aldatu nahi baduzu zure Moodleeko profilera joan > Aukerak > Editorearen hobespenak eta bertan Atto editorea aukeratu.





2017/11/10

Audacity 2.2.0 bertsio berrian euskara zuzena jar daiteke

Laster argitaratuko da Audacity audio editore libre eta ospetsuaren  2.2.0 bertsioa, Ubuntu edo Debian familiako banaketetan probatu nahi baduzu PPA biltegia jarrita egin dezakezu:
  
Windows edo Mac bertsioak Audacityren web orritik deskarga daitezke. Debian, Ubuntu, Mint eta deribatuetan terminalean hau itsatsi:
sudo apt install audacity


Audacityren itxura berrietako bat, arina izenekoa hain zuzen
Hainbat berritasuna ditu:
  • itxura berria eta pertsonalizagarria. Aurreko irudiko itxura arina alda daiteke klasikora, ilunera, kontraste handikora edo pertsonalizatura (Edizioa > hobespenak > interfazea > itxura).
  • Menuak berrantolatu dituzte.
  • Eta euskaldunontzat garrantzitsua dena. Aplikazioak zuen euskaratze eskas ulergaitza ezin izan bada kendu ere Librezaleek egindako euskaratze zuzena ezar daiteke. Horretarako egin: Edizioa > Hobespenak > Interfazea > Hizkuntza eta Sistemarena edo Euskara-ren ordez Euskara (Espainiako)* hautatu eta Ados egin. 
  • Gainerako berritasunak Audacityren wikian kontsultatu daitezke. 
Euskara zuzenean jartzeko

Audacityk bi euskara bertsio ditu: eu bersioa troll batek egina eta kalitate eskasa duena, eta eu(es) Librezalek egina. Bigarrena aktibatzeko hobespenetan aukeratu behar duzu: Editatu » Hobespenak » Interfazea » Hizkuntza » Euskara (espainako)

Interfazea euskara zuzenean jartzeko bidea

 

* barregarria bada ere eu bertsioa momentuz ezin ordeztu eta eu(es) bertsioa gehitu behar izan da ordezko euskaratzea eskaini ahal izateko. Horregatik euskara (espainiako). Espero dezagun hurrengo bertsiorako bertsio zuzena garatzaileek eskainiko duten bakarra izatea.

Ordenagailuak erabiltzaile ugari baditu guztiek egin behar dute hobespenetako aldaketa. Bada beste modu bat denei ondo agertzeko eta mezu honetan azaltzen da.

2017/11/09

Kroma efektua OBS aplikazioan

OBS ikastetxeetan geroz eta gehiago erabiltzen den grabazio eta transmisio aplikazioa da. Honen bidez bideo-tutorialak, irrati transmisioak, albistegiak, antzerkiak... eta, oro har, ahozkotasuna eta gorputzaren adierazmenak lantzeko jarduerak egin daitezke.

Aukera asko duen aplikazioa da eta horietako batzuk, erabilera ez oztopatzearren, ezkutu samarrean gordetzen dira, hala nola audio eta bideo iragazki, filtro edo efektuak.

Tartean kroma iragazkia. Kroma (chroma key) iragazkia efektu bisual bat da bi geruzarekin jolasten duena. Lehenengo geruza bideo geruza izaten da eta kolore uniforme baten -gehienetan berde intentsua duen-  atzeko planoan filmatzen da. Kroma iragazkiak atzeko planoan erabilitako kolorea kendu egiten du eta horren ondorioz lehenengo geruzaren atzeko planoa gardena izanik bigarren planoko geruza ikusten da. Bigarren geruza hori irudi finkoa edo bideoa izan daiteke.



Harira. OBS aplikazioan kroma iragazkia nola erabili daitekeen azaltzen duen bideo-tutoriala duzue hau:



Bideo-tutoriala ez luzatzearren ez dut azaldu iragazkiaren aukerak. Irudi honetan ikus daitezke:

Kroma iragazkiaren aukerak


Interesanteena kolorea hautatzeko aukerak dira. Gehienetan saturazio handiko koloreak erabiltzen dira (berdea, urdina edo magenta), berdea usu giza azalaren kolorea egoera arruntetan berdetik gutxi duelako. Custom aukeran pertsonalizatu daiteke kolorearen tonua, batez ere pick up kolore hautatzailearen bidez.
Komeni da Antzekotasuna kontrolarekin jolastea atzeko planoa guztiz desagertu arte eta pasatu gabe aurreko planotik deus ez gardentzeko.

Hona hemen adibide bat nola erabili daiteke OBSeko kroma efektua bideo-tutorial batean: https://www.youtube.com/watch?v=z5cGrUyLGOQ





2017/10/18

Nola erabili daiteke mikroskopio digitala Linux sistemetan

Badira salgai hainbat mikroskopio edo lupa digital x60 eta x1000 bider handitzen dutenak eta 8 ledeko argia eta USB konexioa dutenak. Ez dut markarik eta saltzailerik aipatuko baina 18-30€ artean ibiltzen da bere prezioa -euskarriaren arabera, gehien bat-.


Mikroskopio hauek oso interesgarriak dira ikasgelarako oihalen egitura, intsektuak, orbela, ilea, ur-putzuen fauna...  Web-kamera dute, beraz ez da lagina xaflatu behar, mikroskopioa urbildu fokatze distantzia doitu arte eta gozatu.

USB bidez konektatzen da ordenagailura eta bertatik hartzen du elikadura elektrikoa. Portatil txiki bati lotuta mendian erabiltzen ahal da ederki asko.

Mikroskopio hauek Microsoft-erako kontrolatzaileak eta aplikazioa ekartzen dute baina Linux-en erabiltzen ahal dira web-kamera ikusteko edota grabatzeko aplikazioen bidez, hala nola:

A.- Cheese edo Guvcview: Nik Guvcview probatu dut eta oso ondo. Ikusi argazkiak zein bideo kapturak egin daitezke.

Guvcview-ren tresnak eta kontrolak ezkerrean eta atzitutako irudia eskuinean.


B-  OBS-Studio grabazio eta transmisiorako aplikazioa -informazio gehigarria mezu honetan eta instalazioa web honetan-.

Bideo batez deskribatu dut  nola prestatu eszena bat web-kameran oinarrituta eta nola ikusi ordenagailuan pantaila osoan:



Zure ordenagailua portatila bada web-kamera propioa edukiko du eta bideoak deskribatutako prozesuan ekipoarena baztertu eta mikroskopioaren web-kamera hautatu beharko duzu.

Behin OBS-en ezarrita dugula mikroskopioa egiten ahal dugu pantaila argazki arruntak Imp Pant teklaren bidez edo edizio elementuak Ksnip-en bidez. Argazki segidak eginez gero stop motion moduko bideoa egin dezakegu OpenShot-en bidez.

Neurketak egiteko Screen Ruler erabili dezakegu, beti ere proportzioak kalkulatuta.


C- VLC erreproduzigailuarekin pausu hauek emanez:  Multimedia > Ireki kapturagailua > Kapturatze modua: Video camera
Bideo-gailuaren izena: portatila bada /dev/video0 ekipoaren webcama izango da eta mikroskopioa /dev/video1


Pantaila beltza ateratzen bada menuan Tresnak > efektuak eta iragazkiak > v4l2 kontrolak > Berrezarri lehenetsiak

Pantaila osora erreproduzitzen ahal dugu, grabatu bideoa (Erreproduzitu > Grabatu) eta fotogramen argazkiak egin (Bideoa > Atera argazkia)



Ikasleek -edo seme-alabek- gauzen eta bizidunen izaera aztertzea bultzatu nahi baduzu gailu oso interesgarriak dira.

Hona hemen Berritzegune Nagusiak mikroskopio-lupa digitala LH-en eta DBH-en erabiltzeko prestatutako hainbat jarduera interesgarri:

Bukatzeko bideo honetan ikus dezakegu honelako lupa digital baten bidez etxean edo ikasgelan nola azter dezakegun mendiko putzu baten bizitza.



2017/04/14

Peek, pantailatik gif animatuak egiteko tresna erraza

Peek Linuxerako pantailaren bideo grabagailu sinple bat da. Ffmg eta Imageclik erabiltzen ditu grabazioak egiteko. Irudiak GIF animatu moduan grabatzen ditu edo, nahi izanez gero, soinurik gabeko Webm edo MP4 bideo formatutan.
Bideo grabazioak egiteko OBS edo bestelako aplikazio hobeak daude baina Peek bereziki interesgarria da gif animatuak egiteko bere erraztasun eta sinpletasunagatik.

Erabilera

Martxan jartzen dugunean leihatila garden bat agertzen zaigu, itxuraz menurik gabea, markoaren barrenean duena grabatzeko prest. Itxuraz esan dut zeren eta aplikazio barraren ezkerrean agertzen den P logoan klikatua menu txiki bat agertzen da hobespenak aldatzeko aukera ematen duena.

Peek-en hobespenak

Bertan, besteak beste, grabazioa GIF, WebM edo MP4 formatuan egiteko aukera ematen du (kontuan izan soinurik ez duela grabatzen). Behin hobespenak zehaztuta, grabatu nahi dugunaren gainean jarriko dugu.

Leihatilaren tamaina aldatu nahi badugu leihoaren izkin batera joko dugu izkinaren adierazlea agertu arte eta orduan saguan klikatuta arrastatuko dugu nahi dugun tamaina izan arte. Leihatilaren erdian agertzen da, pixeletan neurtua, haren zabalera eta altuera. Kontu izan leihatila oso handia jartzen  baduzu GIF fitxategia oso astuna bilakatu daitekeela -batez ere web batean jartzeko asmoa baduzu-.


Grabazioa hasten den momentuan leihatila ezin da tokiz aldatu.

Grabazioa gelditzean proposatuko ditu Bideoak karpetan gordetzea gif formatuarekin.


Grabatzen duzun bitartean teklatuarekin edo saguarekin zer egiten duzun ikustea nahi baduzu Key-mon aplikazioa erabil dezakezu haren paneltxoa grabazio leihatilan sartuta.


eta zertarako erabiltzen ahal dugu?

Idatzizko web-tutorialetan erakutsi nahi duguna laburra eta erraza den kasuetan.


 Bideoko  mikro-sekuentziak sentimenduak, ekintzak eta abar adierazteko




Istorioak animazioez ilustratzeko. Erakusten ahal dugu, HotShots aplikazioaren laguntzaz, Korrika 20ren azken kilometroen ibilbidea:


Istorioko pertsonaia Miarritzetik Erromara hegan egin zuela.


Erroman aipatuta, Google Earth-en laguntzaz, Coliseoan har dezakegu lurra.




Okurritzen al zaizkizu beste erabilpenak? Uzten ahal duzu zure ideiak iruzkinetan.


Instalazioa

Hasieran esan bezala aplikazioa Linux sisteman dabil bakarrik. Ubuntun PPA bidez instala daiteke terminalean honako hauek hurrenez hurren itsatsi eta exekutatuta:

sudo add-apt-repository ppa:peek-developers/stable
sudo apt update
sudo apt install peek

Proiektuaren gaineko informazio gehiago eta beste distribuzioetan instalatzeko erak azalduta daude Peek-ek Githuben duen orrian.



Hori bai Luberri erremasterizazioa erabiltzen baduzu kontuan izan 16.04.4 bertsiotik aurrera Peek aplikazio grafikoen atalean dagoela instalatuta.
Peek software librea da eta horri esker euskaraz dago 1.0 bertsiotik.


Beste aplikazio interesgarriak Software-bilduman eta Linux-aplikazioetan.

2016/10/13

MuseScore, PDFen inportazioa


MuseScore software libreko partituren editorearen garatzaileek partiturak paperatik MuseScorera inportatzeko modua ezarri dute; gutxi gora behera testurako OCR edo testuen errekonozimendu optikoaren parekoa; hau da,  partituren errekonozimendu optikoa.



MuseScore taldeak partiturak hodeian gordetzeko eta partekatzeko musescore.com web orria sortu zuten eta bertan funtzionalitate berri hau jarri dute:PDF Converter.

Ikus dezagun zeintzuk diren prozesuaren urratsak:

1- Paperezko partitura eskaneatu eta PDF formatuan gorde. Nik proba egin dut argazkia aterata eta emaitza ez da ona izan.

2- Sartu musescore.com orrian; lehenengo aldia bada erregistratu zaitez (Sing in > Create new account) , eta sartu (log in).

3- Ondoren sartu azpi-orri honetan:


Arakatu eta hautatu eskaneatutako PDFa.


4- Minutu baten inguruko prozesamenduaren ondoren deskargatzeko aukera emango digu mscz formatuarekin. Fitxategi hori entzun eta editatzeko MuseScore doako aplikazioa erabiliko dugu. Hemen duzu MuseScoreren gaineko informazioa.


Hau eta beste web-aplikazio interesgarriak eskuineko paneleko estekan.

2016/07/03

OBS Studio software librea bideoen grabazio eta transmisiorako

 Open Broadcaster Software Studio audio eta bideoen grabazio eta transmisioa (streaming) egiteko software libreko aplikazioa da. Linux, Windows eta Mac-erako bertsioak ditu.


Oro har, aplikazioa erraza eta intuitiboa da. Dena den aukera asko ematen dituenez konplexutasun puntu bat du eta postprodukzioa ekidin nahi baduzu hobe duzu aurretik probak egitea.

Funtzionalitateak:
  • Bideo-tutorialen grabazioa.
  • Aurkezpen, hitzaldien eta bestelakoen transmisioa eta grabazioa.
  • Eskolako irratia edo telebista...

Instalazioa:

Aplikazioa plataforma-anitza da. Proiektuaren web orrian azaltzen da nola instalatu sistema bakoitzean.
Ubuntu eta Debian oinarrikoetan terminala ireki eta agindu hau itsatsi:

sudo apt install obs-studio


Ezarpenak:

Hasi baino lehen komeni da Fitxategia>Ezarpenak egin eta bertan begiratzea zein diren aukerak: Orokorretan aplikazioa euskaraz jar dezakegu -hala ireki ez bazaigu-, gai argia edo iluna aukeratu..., Irteeran helburu-karpeta, formatuak, bereizmenak, bit-ratioak zehaztu ditzakezu eta Laster tekletan jar dezakezu grabazioa eta transmisioa tekla konbinazio baten bidez abiatzea (nik Ktrl+G eta Ktrl+T jarri dut hurrenez hurren -argi ibili zeren eta momentuz ez du indikatzailerik-).

Funtzionamendua:

Grabazioa edo transmisioa hasi aurretik eszena(k) diseinatu behar d(it)ugu.

Eszenak

Eszenan zehazten dira ikusiko eta entzungo diren elementuak. Hainbat eszena diseina dezakegu eta grabazio-transmisioan batetik bestera pasa dezakegu.
Eszenetan erabili daitezkeen elementuak hauek dira:
- Bideoak:
  • pantailaren kaptura
  • leiho kaptura 
  • web-kamera
  • beste bideo kapturak
  • bideo fitxategia
- Irudia bat edo irudi segida bat,
- Testua
- Audioak:
  • Jack sarrera
  • mikrofonoa (kanpokoa, ekipokoa, web-kamerarena...)
  • audio irteera
  • audio fitxategia
Adibide honetan ikus dezakegu bi eszenaz sortutako grabazio bat.




Grabazioa eta transmisioa.

Aplikazio honen abantaila handi bat da postprodukzioa ekiditen duela. Ondo prestatuz gero eta bitartean istripurik eta hitztripurik gertatzen ez bada grabazioa bukatu eta editatu gabe kargatu edo erabil dezakegu.

Beste aukera bat, hitzaldi, urrutiko eta zuzeneko klaseak eta telebista saioetarako da zuzenean transmititzea (streaming). Horretarako hainbat aukera daude: aplikazioak zenbait transmisio zerbitzu eskaintzen ditu eta aparte zuk bestelako bat jar dezakezu.


Nik Youtube.com-en kanalak (bideo kudeatzailean) eskaintzen duena probatu dut eta oso ondo dabil. Kanalak transmisio gako bat ematen du eta OBSen jarri behar da, aplikazioak transmisioa ikusteko URL bat ematen du ikusleen artean zabaldu behar dena -web bidez esate baterako-. Arazo bat egon daiteke transmisio horretan erabat librea ez den musika jartzen badugu -nahiz atzeko planoan egon- Youtubek detektatu, abisatu eta transmisioa itxiko baitu.


Behin transmisioa bukatzen denean bideoa grabatuta geratzen da zure kanalean.
https://www.twitch.tv  zerbitzuak ere ondo funtzionatzen du.

Oharrak:
  • Juan Luis Fernández, Jenofonte, blogariak OBSren gainean hainbat bideo-tutorial oso interesgarriak prestatu ditu. Ikusteko bilatzailean jarri "unade25 OBS" 

Beste aplikazio interesgarriak Software-bilduman
Linuxeko hainbat aplikazio interesgarrien katalogoa.

2016/06/16

Hainbat proiektu mota eta tresna digital Plastika materian lantzeko

Errenteriako eskola batean galdetu didate ea nola landu daiteke Plastika tresna digitalen bidez.

Buelta pare bat eman diot eta eskematxo bat egin dut. Bertan materia horretan tresna digitalen bidez egin daitezke hainbat lanketa eta horiek egiteko erabili daitekeen softwarea jarri dut. Eskeman aipatzen diren aplikazioa gehienak offline motakoak dira, libreak eta Luberri distribuzioan daude. Horietaz aparte bi webgune jarri ditut (weebly.com eta canva.com) offline aplikazioetan parekorik topatu ez dudalako.

Hona hemen eskema:


Eskertuko nuke zuen ekarpenak komentarioetan eskema osatze edo zuzentze aldera.

Bestetik eskema baliatu nahi baduzue posible duzue hemendik deskargatzea Xmind bidez editatzeko: http://www.xmind.net/m/fR6i



2016/05/23

Nola sortu stop-motion bat OpenShot bideo editorean

Stop-motion-ak eta argazkien bidezko time-lapse-ak sortzeko gakoa irudiak sekuentzia moduan inportatzea eta denbora-lerroan ere sekuentzia eran kokatzea da. Ikus dezagun nola egin daitekeen:

1- Deskargatu argazkiak ordenagailura.
2- Ireki OpenShot eta fitxategi-arakatzailea. Hautatu argazkiak arakatzailean, arrastatu eta jaregin OpenShoten proiektuaren fitxategien kutxan.

3- Editoreak galdetuko digu ea sekuentzia moduan inportatu nahi dugun: BAI.

(agian editoreak esango digu lehenengo irudia ez dela baliozko irudia, bideoa edo audioa. OK, onartu).

4- Hautatu argazki guztiak proiektuaren fitxategien kutxan Ktrl+A eginda.

5- Hautatutako argazkien gainean eskuin-klik egin eta agindu gehitzeko denbora-lerrora


6- Argazkiak nola gehitu behar diren ezartzeko leihoa irekiko da:

Bertan zehaztuko dugu hasiera-unea, pista eta irudien iraupena segundotan. Kasu honetan 0,20 segundo jarrita bideoan segundoko 5 fotograma izango ditugu. Zuk erabaki tartea.

7- Hortik aurrera nahi izanez gero tituluak, musika...eta esportatu bideoa.