hezkuntza-aplikazioak etiketadun mezuak erakusten. Erakutsi mezu guztiak
hezkuntza-aplikazioak etiketadun mezuak erakusten. Erakutsi mezu guztiak

2024/02/27

Gcompris aplikazioak 4.0 bertsio berria atera du

 KDE proiektuko jolas didaktikoen bildumak 4.0 bertsioa eskuragarri jarri du bere webgunean.

Edozein plataforman instalatu daiteke, ordenagailu zein smartphonea, eta Luberri sisteman, noski, instalatuta dago. Hori bai, 4.0 bertsioa Luberriren hurrengo bertsioan egongo da.

Hemen kontsultatu daitezke 4.0 bertsioan sartu dituzten zortzi aktibitate berriak, horien artean bereziki interesgarriak zatikiak lantzeko aktibitate bi.

Aukera probestuz, bideo-tutorial bat prestatu dut. Ezinezkoa da begirada bat ematea Gcomprisek biltzen dituen 190 aktibitateei. Bideo honetan aurkezpen orokor bat egin dut eta erabiltzeko hainbat aholku jaso ditut.


2023/12/15

OpenBoard pantaila eta monitore interaktiboetarako arbela 1.7.0 bertsioa euskaraz atera du.

 OpenBoard arbel digital eta monitore interaktiboetan arbela lanak egiteko eta pantaila arruntetan marrak eta oharrak egiteko aukera ematen duen aplikazioak 1.7.0 bertsioa atera du eta euskaraz dago.

Aplikazio interesagarri hau krisialdia pasa du bere garapenean baina badirudi pilak jarri dituztela eta konponketa mordo bat egin dute. Tartean euskara hizkuntza berriro onartu dute.


 

Luberritik kendu genuen garapen arazo horiengatik eta antzeko funtzionalitatea duen Xournal++ jarri genuen. Agian hurrengo bertsioan tokia egongo da OpenBoard berriro sartzeko.

Berritasunen informazio zehatza eta Linux, Mac eta Windows bertsioak deskargatu daitezke bere Github orritik.



2023/11/18

Librera: mota guztietako dokumentuak irakurtzeko aplikazioa Androiden

 PDF, EPUB, ODT, DOC, MOBI, DjVu, FB2, TXT, RTF, AZW, AZW3, HTML, CBZ, CBR eta formatu gehiago dira Librera aplikazioak irakurtzen dituenak. 

Hori da bere ezaugarri nagusia: aplikazio bakarra edozein dokumentu irekitzeko.

Beste ezaugarriak:

  • Azkar irekitzen ditu dokumentuak.
  • Pantaila behin sakatuta laguntza panelak ezkutatzen dira (eta ageri).
  • Ikuspegi argia eta iluna.
  • Dokumentuak bilatu eta Liburutegian erakusten ditu (Liburutegiaren ezarpenetan zehazten ahal zaio zeintzuk karpetetan eta zer formatu bilatu).
  • Dena konfiguratu daiteke.
  • Libre eta euskalduna (8.9.58 bertsiotik)
 

Aplikazioaren webgunea: https://librera.mobi/es

Aplikazioa Androiderako da eta deskargatu daiteke Fdroid edo Google Play-tik

Ikusi Librezalen Androiderako euskaraz dauden beste hainbat aplikazio.


2023/08/18

Cryptpad.fr orain diagramak sortzea eskaintzen du Draw.io integratuta

 Cryptpad dokumentuak online elkarlanean editatzeko plataforma libre eta zifratua da. Testu dokumentuak, kalkulu orriak, kanban, aurkezpenak, formularioak, arbela... partekatu daitezke hainbaten artean osatzeko. Google Docs-en alternatiba libre eta euskalduna da.

Cryptpad Github-etik deskargatu eta instalatu daiteke zerbitzari propio batean, baina modurik errazena erabiltzeko da doan 50 megabyteko biltegiratzea eskaintzen duten Cryptpad.fr zerbitzaria erabiltzea da. Erabili daiteke erregistratu gabe baina dokumentuak hodei edo drive txiki batean gorde ahal izateko merezi du erregistratzeak.

Albistea da uda honetan estreinatu duen 5.4.0 bertsioak diagramak editatzeko aukera ematen duela. Aukera handiko diagramak gainera, izan ere, Draw.io lineako aplikazio librea integratu du. Gainera, Cryptpad-en aukera guztiak euskaraz zeuden eta Draw.io ere bai bere aldetik %100ean euskaraz zegoelako.


Hau da CryptPad.fr-ren diagrama baten itxura:


Ezker aldean ikus daiteke ni naizela diagramaren editorea, baina URLa partekatuta edozeinek edita lezake era kolaboratiboan.

Probatu nahi baduzu, sartu Cryptpad.fr webgunean, nahi baduzu erregistratu, aukeratu diagrama dokumentua eta, nahi baduzu gonbidatu norbait URLa pasata elkarlanean diagrama editatzeko.


2023/08/16

PDF Arranger aplikazioa 1.10.0-1 bertsiotik aurrera euskaraz dago.

Uztailan argitaratu dute PDF Arranger aplikazioaren 1.10.0-1bertsioa eta berritasun azpimarragarria dakar: euskaraz dago. 


 PDF Arranger python-gtk lengoaian garatutako aplikazio arin bat da, erabiltzaileari PDF dokumentuak batu edo zatitu eta orriak biratu, moztu eta berrantolatzen laguntzen diona, interfaze grafiko interaktibo eta intuitiboa erabiliz. 

Aplikazioa Linux eta Windowsen funtzionatzen du, baina 1.10.0-1 bertsioa oraindik ezegonkor fasean dago eta linuxerako deb eta tar.xz eta Windows-erako dsc formatuan dago eskuragarri web honetan: 

https://launchpad.net/ubuntu/+source/pdfarranger

Debian, Ubuntu, Linux Minten... instalatzeko deskargatutako fitxategian klik bikoitza egin edo deskarga egin duzun karpetan terminala ireki eta:

sudo gdebi pdfarranger_1.10.0-1_all.deb

Aurreko mezu batean azaldu nuen nola sortu daitezke inprimatzeko paperezko liburuxkak aplikazio honen bidez.

 


2023/07/26

Freeplane: adimen-mapak egiteko aplikazio libre eta euskalduna

 GNU/Linux-en nahi baino aplikazio gutxiago dago eskemak eta adimen-mapak egiteko aplikazioen artean, eta gehienak hanka motz: Freemind zahartua, Xmind pagoko bertsioa eskatzen du edozein gauzatarako, Minder garatu aurretik abandonatua, Edrawmind, Mindmester eta Mindomo pribatiboak. Panorama honetan Freeplane da, nire ustez, dagoen aukerarik interesgarriena.

Freeplane aukera asko eskaintzen ditu:

  • Nodoei ikonoak, irudiak, estekak edo testu aberatseko oharrak (buletak, taulak...) erantsi.
  • Mapa batzuk eduki daitezke irekita fitxa desberdinetan.
  • Nodoen diseinuak, estiloak, ertzak, atzeko planoak, letra motak... eskuineko paneletik erraz edita daitezke.
  • Formatu askotara esporta daiteke -ur markarik gabe-. Bereziki interesgarria htlm klikagarria. 
  • Taldekatzeko hodeiak egin daiteke eta lotura testuekin. Horiek kontzeptu mapak egiteko baliatu daitezke.
  • Latex formatuko formulak onartzen ditu.
  • Zereginak, egutegia, aurkezpenak, iragazkiak eta beste eginbide asko (gehiegi agian).

Bere ezaugarrien artean hauek nabarmendu daitezke:

  • %100ean euskaraz dago.
  • Javan idatzita dago, beraz, Linux, MacOS eta Windowsen dabil.
  • Guztiz pertsonalizagarria: itxurak, pluginak...

 

Instalazioa

 Plataforma nagusiko bertsioak ditu eta Sourceforge-tik deskargatu daitezke instalatzeko.

Aipatu behar da Debian, Ubuntu, Minten kasuan, bereziki inportantea dela Sourceforge-tik deskargatutako bertsioa instalatzea, izan ere, sudo apt install freeplane komandoa erabilita 1.07 bertsio zaharra instalatzen da eta Sourceforgetik 1.11 bertsioa instalatzen da, eta alde ederra dago interfaze eta erabilgarritasunari dagokionez. Besteak beste, nodo berri bat sortzeko Tab eta Sartu erabiltzen dira, hurrenez hurren, hurrengo maila edo maila berean egiteko.


Aplikazioaren webgunea: https://docs.freeplane.org/

Beste aplikazio interesgarriak GNU/Linux


2023/01/28

Nola instalatu eta erabili Ibus-typing-booster idaztean hitzak automatikoki osatzeko Linux sistemetan

Idaztean hitzak automatikoki  osatzeko sistemak praktiko izan daitezke asko idazten duen jendearentzat edota tekleatzeko arazoak dituzten pertsonentzat. Bi kasutan sistema iragarle-iradokitzailea gutxiago tekleatzea lortzen du.


 

Zenbait aplikazio, hala nola LIbreOfficek, integratuta eta berez aktiboa du, baina 8 letra baino luzeagoak diren hitzetan soilik iradokitzen du. Hori konfigurazioaren bidez (Tresnak > Autozuzenketa > Autozuzenketaren aukerak) alda daiteke: zenbat eta letra kopuru txikiagoa jarri orduan eta gehiago iradokiko du.


Edozein modutan hitzen osaketa edozein aplikaziotan erabili nahi Badugu Ibus-typing-booster sistemaren plugina edo gehigarria erabili dezakegu.


Nola instalatu

 Debian oinarriko sistemetan, hala nola Ubuntu, Linux Mint edo Luberri, ireki termiala (Ctrl+T) eta agindu hau itsatsi:

sudo apt install ibus-typing-booster

Aplikazioak bere hitzen basea sortzen du erabilitakoekin baina hiztegienak ere erabiltzen ditu. Luberrik esate baterako euskarazkoa (hunspell-eu-es) eta ingelesekoa (hunspell-en-us) instalatuta ditu, gaztelerakoa interesatzen bazaizu itsatsi: sudo apt install hunspell-es-es.

 Mezu honetan ikus daiteke nola instalatu bestelako Linux distribuzioetan.

Nola aktibatu

Ibus-typing-booster aktibatzeko:

  1. Sistemaren ezarpenetan Ibus sarrera metodoa hautatu behar da: horretarako Sistemaren ezarpenak > Sarrera metodoa eta, bertan, goiko aldeko Sarrera metodoaren framework-a: Ibus hautatu.
    Aktibazio abisua agertuko da eta onartuko dugu:
    Honako abisu hau agertuko da. Nik ez dut egin eta arazorik ez dut izan baina beste distribuzioren batean badirudi erabiltzailearen karpetako .bashrc fitxategia editatu, export hitza duten hiru lerroak erantsi eta gorde.




  2.  Ibus hobespenak zehaztu behar dira. Horretarako: klika Aplikazioak > Hobespenak > Ibus hobespenak eta bertan batetik: Sarrera metodoa fitxan Ibus-typing-booster sarrera metodoa horrela gehitu:


    Orokorra fitxan desgaitu "Erakutsi ikonoa jakinarazpen gunean" sistemaren panelean gerta daitezkeen leihoen gainjartzea saihesteko.



  3. Sistemaren panelean, gehitu behar dugu teklatuaren trepeta edo appleta Espainiera teklatutik (betetze automatikoa desaktibatuta) Typing booster teklatura pasatzeko (betetze automatikoa aktibatuta). Horretarako sistemaren panelean, ikonorik ez dagoen zona batean, eskuin klik egin eta aukeratu appletak. Bilatu teklatua appleta eta gehitu.
    Horren ondorioz, sistemaren panelaren eskuin aldean ES ikur urdina agertuko da, teklatu espainiarra aktibatuta dagoela irudikatuz. Bertan klikatu eta Beste bat -Typing Booster aukeratu.

  4. Booster aktiboa dagoela (kohetearen ikonoa) klikatuko dugu eta Setup (ezarpenak) klikatuko dugula aplikazioaren funtzionamenduaren hobespenak fintzeko. Hau pertsonala da baina nik adieraziko ditut markatu ditudan hobespenak:                                                                                                     A.-  Idazten ditugun hitzak base batean sartzen ditu eta hortik aurrera eskainiko dizkigu. Hortaz gain, hizkuntzen hiztegiak erabiltzea edo ez eta zeintzuk. Norberak erabaki behar du hiztegiak erabiltzea ala ez eta erabiltzekotan zein edo zeintzuk eta zein ordenan.
               B.- Options izeneko fitxan komeni da Use inline completion markatzea, hartara hitzak aukeratzeko goitik beherako zerrendaz gain tabuladorearekin onartzeko aukera izango dugu.

 Gogoan izan panelean beti izango dugula Booster aktibatzeko edo desaktibatzeko aukera. Hemendik aurrera erabili eta erabilera findu eta hobespenak doitu. Kontuan izan emotikonoak aktibatu daitezkeela eta orduan ingelesezko hitzak erabiliz proposatuko digula.

 

 Linuxerako beste aplikazio interesgarriak

2023/01/20

Nola sortu liburuxkak PDF Arranger aplikazioarekin

 DIN A4 dokumentu batetik DIN A5 tamainako liburuxka bat sortu nahi baduzu (edo DIN A3tik DIN A4 liburuxka) PDF Arranger aplikazioa sinple egiteko aukera ematen du.


PDF Arranger aplikazio txiki bat da erabiltzaileari PDF dokumentuak batu edo zatitzen eta orriak biratu, moztu eta berrantolatzen laguntzen diona interfaze grafiko interaktibo eta intuitiboa erabiliz.

PDF Arranger aplikazioak 2023ko uztailean argitaratutako 1.10.0-1 bertsiotik aurrera euskaraz dago. Debian, Ubuntu edo Linux Minten instalatzeko pdfarranger_1.10.0-1_all.deb https://launchpad.net/ubuntu/+source/pdfarranger webgunetik deskargatu et instalatu daiteke.  (Paragrafo hau 2023/8/18an gehitu da).

Liburuxka egiteko aukera du. Horretarako kargatu dokumentua PDF formatuan, hautatu liburuxka egiteko erabili nahi duzun orrialdeak eta panelaren eskuinean dagoen menuan Editatu > Sortu liburuxka egin.

 Jatorrizko dokumentua mantentzeko liburuxkan Gorde honela egin eta beste izen bat eman.

Mezu hau idazteko unean aplikazioa oraindik ez dago euskaraz, laster egongo da baina bitartean zure ordenagailuan euskaraz eduki nahi baduzu deskargatzen ahal duzu pdfarranger.mo fitxategia eta, sudo-ren bidez, kopiatu /usr/share/locale/eu/LC_MESSAGES/ karpetan.

PDF Arranger aplikazioa Luberri Linux sisteman instalatuta dago.

Linuxeko beste hainbat aplikazio interesgarri.

2023/01/01

Nola gehitu lexiko familiak GCompris aplikazioan

 GCompris ume eta gaztetxoentzako hezkuntza-jolasak eta aktibitateak biltzen dituen KDE familiako aplikazio multzoa da. Bertan jolasak gaiaren arabera daude antolatuta. Bada, letra, hitzak, hiztegia familian -irudian ABC-...

... hiztegia multzoan, "Aberastu zure hiztegia" aktibitatea dago. Oso interesgarria ume txikiek edota euskara ez dakiten ume-gazteak oinarrizko lexikoa ikasteko familietan antolatuta. Hauek dira GCompris-ek, instalatu berria, eskaintzen dituen lexiko-familiak:


Familia hauek ugaldu daitezke. Horretarako aurreko irudiaren beheko partean agertzen menuan etxetxoa klikatu eta gero "Ezarpenak" adierazten duen giltza ingelesa.

Bertan korritu konfigurazioren pantaila "Zama-jaitsi hitzen irudi multzo osoa" ikusi arte, bertan klikatu...


eta famili lexiko berriak deskargatu eta instalatuko dira:




Prest jolasteko eta lexikoa aberasteko.

 

 

Oraindik GCompris ez baduzu kontuan izan edozein ordenagailu plataformarako deskargatu eta instala dezakezula: https://gcompris.net/downloads-eu.html

Android tableta edo mugikorrean bertsio osoa instalatu ahal izateko hobeto F-Droidetik edo apk bidez instalatuta.

2022/11/13

Lumi, H5P jarduerak sortzeko aplikazioa eta webgunea

 Lumi H5P jarduera interaktiboak sortu, editatu eta partekatzeko aukera ematen duen aplikazioa da. Software librea da eta euskaraz dabil.


 H5P berrogeitik gora eduki eta ariketa interaktiboak sortzeko tresna da, Moodlen integratua eta Wordpress, Jomla eta beste plataformetan plugin bidez erabili daitekeena.

Helburua

Zer zentzua du H5P eduki edo ariketak sortzeko aplikazio bat instalatzeak?

  • Moodle irakasle rolean erabiltzen baduzu, zure ikasleek eduki interaktiboa ikusi eta ariketak egiten ahal dituzte baina agian interesatuko zaizu zure ikasleek eduki edota ariketak sortu ahal izatea, hala nola, denbora-lerroak, puntu beroak dituzten irudiak eta abar, eta Moodlen ikasleek ez ohi dute horretarako eskubiderik. Lumi duen ikasleak jarduera interaktiboak sortu, h5p formatuan deskargatu eta Moodlen irakasleari bidaltzen ahal dio; irakasleak interesgarria iruditzen bazaio ikasleen jarduerak argitaratzen ahal dituzte.
  • Moodle ez baduzu, edo bestela ere, agian interesatzen ahal zaizu jarduerak sortzea Lumin eta htlm formatuan deskargatu eta postaz, Telegramez edo web orri bidez zure ikasleei bidaltzea.

Lumi bidez sortutako htlm fitxategi bat Telegramen.
 

 

Instalazioa

Lumik Github-en duen deskarga lekura joan eta komeni zaizun bertsioa (Linux, Windows, Mac..) deskargatu eta instalatu. Ubuntu, Debian, Linux Minten..., une honetan,  lumi_0.10.0_amd64.deb bertsioa.

Aplikazio hau nahiko berria da, hala eta guztiz ere euskaraz dago. 

 

Erabilera

Eduki eta ariketa interaktiboak H5P bidez sortzeko klika editorean.


Ondoren aukeratu H5P-k eskaintzen dituen jardueren artean interesatzen zaizuna. Ezagutzen ez badituzu ikusten ahal dituzu adibideak h5p.org webgunean. Orain arte jarduera hori erabili ez baduzu deskargatu beharko duzu Lortu botoia sakatuta. Behin jarduera editatu duzunean menuan: Fitxategia > Gorde .h5p formatuan gordetzen du. Erne!, gordetzeko leihoa bigarren planoan agertzen da eta, beraz, bilatu behar da. Behin gordeta Moodlera kargatu daiteke.

Moodle ez baduzu, jarduera htlm formatura esportatu eta argitaratu edo, errazago, Lumi Cloud Hubera (0.10 bertsiotik aurrera edo web bidez) kargatu eta partekatzeko esteka sortu eta ikasleei bidali edo web batean eskaini. Ikasleek nabigatzailean ikusten ahal dutel. Horrela adibidez:

 Zukatik Nokara hutsuneak betetzeko ariketa

Bertsio berritze horrekin batera aukera dago ere deus instalatu gabe jarduerak online egiteko gune honetatik:

https://app.lumi.education

Instalatuta hobeto funtzionatzen du baina ondo dago aukera hau gurea ez den ordenagailu batetik jarduerak sortu ahal izateko edo geureak editatzeko.


Luberri sisteman Lumi instalatuta dago ikasleek erabili ahal izateko. 


Beste aplikazio interesgarriak Linux-en.


2022/11/03

Katahots TTS testuak irakurtzeko aplikazioa

 Gontzal Uriarte Gomez irakasle eta informatikariak dislexia eta, oro har, irakurketarako arazoak dituzten ikasleei laguntzeko Katamotz izeneko web eta programa multzoa eskaintzen du.

Multzo horretan dago Katahots, TTS (Text To Speech), testuak ahots sintetiko baten bidez irakurtzeko aplikazioa.

 

 Aplikazioak Aholab UPVko hizkuntzen teknologiarako laborategiaren teknologia erabiltzen du, software librea da eta Linux eta Windowserako bertsioak ditu.

Instalazioa:

Aplikazioaren orrira joan eta behar duzun paketea deskargatu. Linuxerako kasu gehienetan 64 biteko .deb bertsioa beharko dugu. Behin deskargatuta klik bikoitza egin fitxategian eta instalatuko da.

Erabiltzeko modua:

Erabilera erraza du. Hezkuntza aplikazioetan bilatu eta martxan jarri.

 

 

Irakurri beharreko testua euskaraz edo gaztelaniaz dagoen aukeratuko dugu.

Ondoren, testua goiko koadroan idatzi edo itsatsi dezakegu baina modurik errazena arbeleko irakurlea aktibatzea da eta, horrela, aski da irakurri nahi dugun testua kopiatzea eta haren irakurketa hasiko du.

Irakurle digitalarekin alderatuta Katahotsek hainbat abantaila ditu:

  • ez du interneteko konexiorik behar. Ez da nabigatzailea erabili behar.
  • irakurri beharreko testua interneteko nabigatzailean ez ezik edozein aplikazioan egon daiteke, hala nola testu prozesadorean, PDF irakurgailuak...
  • egindako azken irakurketa erabiltzailearen karpeta nagusian gordetzen da wav formatuan Output-katahots.wav izenarekin. Fitxategi horri izena aldatu eta nahi dugunerako erabili dezakegu.

Eta desabantaila pare bat:

  • ahots bakarra du, emakumerena, ez ezin da irakurketa abiadura aldatu.
  • ez du bistaratzen unean irakurtzen ari den testu zatia.

 

Aplikazio honek aukera handiak ematen ditu irakurtzeko zailtasunak dituzten pertsonentzat: ikusteko zailtasunak, dislexia eta abar.

 

Linuxerako beste aplikazio interesgarriak.


2022/08/21

Crow Translate testuak itzultzeko aplikazio arina eta adimentsua

 Ulertzen ez duzun testu bat euskarara -edo beste hizkuntzara- itzultzeko edo euskarazko testu bat erdararen batean emateko hainbat web orri erabiltzen dira. Crow Translatek, ordea, aplikazio baten bidez itzultzea proposatzen du, eta hain da arina sistemaren abioan jartzen baduzu, edozein aplikazioan zaudela, nabigatzailea, pdf irakurgailuan, testu prozesadorean zaudela, martxan jarri (Ctrl+Alt+E) eta segituan eskainiko dizu nahi duzun itzulpena.


 


Ezaugarriak

  • Google Translate, Yandex, Bing, Libre Translate -euskaraz ezin- edo Lingva -software librekoa- bidez itzultzen du.
  • 125 hizkuntza onartzen ditu.
  • Memoria kontsumo oso txikia (~20MB).
  • GNU/Linux eta Windowserako bertsioak ditu. 

 Instalazioa

 Ubuntu, Linux Mint eta deribatuetan PPA bidez instalatu daiteke terminalean agindu hauek hurrenez hurren exekutatuta:

sudo add-apt-repository ppa:jonmagon/crow-translate
sudo apt update
sudo apt install crow-translate

Bestela Deb paketea deskargatu daiteke bere Github Releases orritik.

GNU/Linuxeko bestelako distribuzioetan edo Windowsen instalatzeko kontsultatu proiektuaren web-orria.

 KDE ez diren ingurunetan aplikazioaren ikonoak ikusi ahal izateko zure ordenagailuan Qt konfiguratzeko qt5ct aplikazioa abiatu behar duzu eta -pazientziarekin-  eta Icon Theme fitxan zure sisteman erabiltzen duzun mahaigaineko gaia edo antzekoa hautatu behar duzu.

Konfigurazioa eta erabilpena

Behin martxan jarrita eta ikonoak ikusgai ezarpenak konfiguratzeko beheko barran engranajearen ikonoa klikatu eta horrelako leihoa irekiko da:

 Fitxa hauetan hainbat parametro konfigura daitezke. Nire aholkua da aktibatzea abioan martxan jartzea, minimizatua eta ikono bat jarrita sistemaren erretiluan (irudiko azken hiru kontrol laukiak markatzea alegia). Hartara zure saioan sartzen zarenean isil-isilik martxan jarriko da eta itzuli nahi duzun testua hautatu eta Ctrl+Alt+E egiten baduzu di-da batean itzuliko dizu. RAM kontsumo txikia duenez eta azkar irekitzen denez merezi du.

 


Itzulpena kopiatu (kopiatzeko ikonoa sakatuta), behar duzun tokian itsatsi, beharrezkoak diren zuzenketak edo egokitzapenak egin. Leihoa itxi lasai.

Hizkuntzen barran editatzeko arkatza sakatuta jatorrizko eta helburu gisa gehien erabiliko dituzun hizkuntzak hautatu daitezke.


Aplikazioaren euskaratzea

2023ko uztailean 2.10.6 bertsioarekin aplikazioa euskaraz instalatzen da.


Linuxerako aplikazio interesgarri gehiago.

 

 


2022/08/16

Fsearch Linuxen fitxategiak eta karpetak azkar bilatzeko aplikazioa

 Fsearch ordenagailuko fitxategiak eta karpetak azkar bilatzeko aplikazioa da eta 22ko abuztuaren 16tik bere 0.2 bertsioa euskaraz dago.


 Fitxategien arakatzaileek -Nemo, Nautilus, Dolphin...- bilaketak egiteko tresnak dituzte baina Fsearch aplikazio independenteak arakatzaileen bilatzaileak baino askoz azkarrago egiten ditu bilaketak. Badaramat denboraldi bat erabiltzen eta, askotan, bilaketarako terminoa idazten bukatu baino lehen topatu izan du.

Ezaugarriak

  • Software libreko aplikazioa da.
  • Bakarrik GNU/Linux-erako dago eskuragarri.
  • Terminoa bilatzen du fitxategiaren izenean zein gordetzen duten karpeten izenetan.
  • Komodinak eta adierazpen erregularrak (RegEx) onartzen ditu.
  • Bilaketen emaitzak iragazi daitezke: guztia, fitxategiak, karpetak, aplikazioak, dokumentuak, audioak, irudiak, bideoak, artxibo konprimituak.Luzapenetan oinarritutako iragazki pertsonalizatuak sor daitezke.

  • Bilaketaren emaitza zerrendan ikusten da, informazioa zutabeetan: izena, bidea, luzapena, tamaina eta aldaketa-data, eta horien arabera ordenatu daiteke azkar.
  • Bilaketa egiteko indexaketa erabiltzen du. Ezarpenetan zehazten ahal da zer indexatu behar duen edota zein direktorio ez dituen indexatu behar. Indexazioaren progresioa leihoan ikusten da. Erabiltzaile arruntarentzat karpeta pertsonala nahikoa izan daiteke eta aurreratuak agian sistema osoan bilatu nahi du. Hobespenetan, Datu-base atalean, gehitu edo kendu daitezke indexatu behar dituen karpetak.
  • Bilaketa bereziak egiteko sintaxia erabili daiteke.
  • Interfazea pertsonaliza daiteke (gai iluna edo argia, menu barra edo ez, leihoaren tamaina gogoratzea, zutabeen konfigurazioa...).
  • Fitxategi edo karpeta batean eskuin klik eginda, menu azkarra agertze da eta bertan: irekin, ireki honekin, ireki karpeta eta abar.
  • Oso dependentzia gutxi ditu eta toki txikia betetzen du diskoan zein memorian.
  • Cn idatzita dago eta GTK3n oinarritzen da.

 

Instalazioa

Ubuntu, Mint eta deribatuentzat, PPA bidez, terminalean hurrenez hurren hauek itsatsi eta exekutatuta:

sudo add-apt-repository ppa:christian-boxdoerfer/fsearch-daily 

sudo apt update 

sudo apt install fsearch 

Bestelako distribuzioetan instalatzeko kontsultatu hemen.

Probatu ondoren desinstalatu nahi  baduzu:

sudo add-apt-repository -r ppa:christian-boxdoerfer/fsearch-daily

sudo apt remove fsearch
 

Informazio gehiago behar baduzu aplikazioaren web orrira joan.

 

 

Oharrak:

Gerta daiteke sortu fitxategi sortu berriak kostata topatzea izan ere.

Aplikazio hau ez da faltako laster kaleratuko den Luberri_22.04 sisteman.

Linuxerako beste aplikazio interesgarriak.

2021/11/24

Linux: nola instalatu Scratch-Desktop

 Scratch MITek programazioa era dibertigarrian ikasteko sortutako aplikazioa da. Linean erabili daiteke ezer instalatu gabe edo mahaigaineko aplikazioa instalatuta Internetik gabe ere erabili ahal izateko.

Kontua da proiektu ofizialak ez duela eskaintzen Linuxerako bertsioa, baina komunitateak erremedioa jarri dio. Scratux izeneko saiakera bat egon zen baina 1.4.1 bertsioan gelditu zen. Orain Redshade Robotics enpresak Scratch Desktop edo Mahaigaineko Scratch izeneko aplikazioa garatu du eta Scratch 3.3.0 bertsioa eskaintzen du.

Scratch Desktop-en logoa

 Scratch zure Linux ordenagailuan instalatu nahi baduzu joan Github-eko gune web-orri honetara:

https://github.com/redshaderobotics/scratch3.0-linux/tree/3.3.0

eta zure distribuziora dagokion instalatzailea deskargatu. 

Luberri, Ubuntu, Mint, Debianerako scratch-desktop_3.3.0_amd64.deb

Deskargatu duzun karpetara joan eta, toki librean eskuin klik egin, ireki terminalean eta bertan:

sudo gdebi scratch-desktop_3.3.0-amd64.deb

edo

sudo dpkg -i scratch-desktop_3.3.0-amd64.deb

Aplikazioa Hezkuntza atalean agertuko zaizu Scratch Desktop izenarekin. Abiatzeko klikatu eta, erabiltzen duzun aldiro, euskaraz jartzeko paneleko lurraren ikurrean klikatu eta Euskara hautatu.

 

Lineako aplikazioarekin alderatuta bertsio honek ez du Internet behar eta ez du wifi buxadurarik sortzen. Sb3 luzapeneko proiektuak ordenagailuan gordetzen dira eta etxean erakutsi edo osatzeko USB batean edo hodeian gorde behar dira.

Kontuan izan bertsio berriagoak ateratzen direnean lehen aipatutako Github-eko webgune horretan jarriko dituztela.


Linux-GNU beste aplikazio interesgarriak

2021/03/30

Subtitle Editor euskaraz

 Probatu dut Subtitle Editor azpitituluen editorea eta oso interesgarria iruditu zait.

 Ezaugarriak

  •  GTK+3n egina GNU/Linuxen funtzionatzen du.
  • Bereziki diseinatuta azpitituluak ondo sinkronizatzeko. Integratzen dut bideo-erreproduzigailua eta soinu-uhinak erakusten ditu.
  • Soinu erreproduzigailuan azpitituluak ikusten dira. 
  • Erroreak atzematen ditu.
  • Sinkronizazio tresnak ditu. Azpitituluak zatitu eta batu ditzake.
  • Azpitituluak itzultzeko erabili daiteke.
  • Azpititulu formatu askotara esportatu daiteke.

 

Pantaila-argazkia 



Instalazioa

Debian, Ubuntu eta deribatuetan terminala ireki (Ctrl+Alt+t) eta agindu hau itsatsi:


sudo apt install subtitleeditor


Euskaraz jartzea

Lokalizazioa egina dago eta hurrengo eguneraketa, seguru aski, euskaraz egongo da baina orain dagoen bertsioa 0.54.0 euskaraz erabili nahi baduzu deskargatu dezakezu subtitleeditor.mo fitxategia, ireki terminala fitxategia duzun karpetan eta agindu hau itsatsi:


sudo cp subtitleeditor.mo /usr/share/locale/eu/LC_MESSAGES/


Erabilera

Ikastetxeei erreparatuta, bi erabilera nagusi bururatzen zaizkit:

  • Filma, dokumental edo bestelako bideoren azpitituluak eskuratu -hainbat bilduma daude- zatitu, banatu, euskaratu, batu, zuzendu eta azpitituluak.eus webgunera kargatu. Praktika honekin itzulpena lantzen da.
  • Filma, dokumental edo bideoa baten fitxategia eskuratu eta haren azpitituluak sortu. Praktika honekin lantzen da gehien bat transkripzioa, alegia hizketatik testura pasatzea (irakurketaren alderantzizko prozedura). Euskarazko bideo fitxategiak lortzeko hainbat bide daude, besteak beste: 

Landu daitezke euskalkiak, kale-hizkuntza edo erregistro informalak...  

Bideo tutorial honetan ikusi daiteke aplikazioaren oinarrizko erabilera:


2021/02/14

Sweet Home 3D euskaraz

Sweet Home 3D etxeak eta bestelako lokalak diseinatzeko aplikazio libre, plataforma anitza, sinple eta atsegina da.

Erabiltzeko modua oso erraza da. Gela edo etxea 2D plano batean diseinatzen da eta aplikazioak automatikoki 3D itxura erakusten du beheko leiho batean.


Ordena logikoa izaten da zorua marraztea, kontuan izanik saretaren karratu handiek metro bat dutela, ondoren hormak, gero ateak eta leihoak, eta bukatzeko berogailuak, altzariak, objektuak, argiak, landareak eta etxetik kanpokoak katalogotik hartu eta 2D planora arrastatuko ditugu.

Elementuak mugitu eta biratu daitezke, eta klik bikoitza eginda agertzen den koadroan bere neurriak, testurak, distirak eta abar zehaztu daitezke.

Etxeak solairu bat baino gehiago badu behar dituenak joango gara gehitzen eta osatzen.

Internetetik kargatu daitezke etxe modeloak eta altzari eta osagarrien bildumak.

Behin etxea prest dagoenean nahi dugun ikuspuntutik argazkiak ateratzen ahal ditugu edota bideoa grabatu markatu dezakegun ibilbide baten zehar.

Bideo honetan aplikazioaren hornitzaileak laburbiltzen du etxea osatzeko prozesua.


Aplikazioa Linux, Windows eta Mac-en erabili daitezke. Hemen dago deskargatzeko web orria: https://www.sweethome3d.com/download.jsp

Debian, Ubuntu eta deribatuetan instalatu daiteke terminalean agindu hau itsatsita:

sudo apt install sweethome3d

Instalatzean aplikazioa erdaraz agertuko da -ingelesez sistema euskaraz baduzu-. Euskaraz jartzeko urrats hauek eman behar dituzu:

S
  1. Joan aplikazioaren Itzulpenen orrira eta deskargatu "Other translation supported" atalean dagoen Euskara fitxategia (bertako estekan klik egiten baduzu deskargatuko da ere).


  2. Sistemak proposatuko dizu deskargatu berri duzun basque-6.4.sh3l fitxategia SweetHome3D aplikazioaren bidez irekitzea.

    Ados klikatu onartzeko eta aplikazioa hemendik aurrera euskaraz azalduko da.
 

 


Erabilera ikastetxeetan.

Aplikazioa hau oso interesgarria da lehen hezkuntzatik hasita, institutu eta unibertsitateraino. 

Hain da erraza ez dela ezagutza teknikorik behar. Gazte gaztetatik erabili daiteke. Esate baterako, ikasleei eskatzen ahal zaie bere logelako planoa paper koadrikulatuan marraztea -neurriak hartuta bada hainbat hobe- eta gero, irakaslearen laguntzaz, ordenagailuan diseinatu. Tresna ederra neurriak, eskalak eta matematika orokorrean lantzeko, baita kolorea, diseinua, testurak, argiak eta abar. 

Bereziki interesgarria da, behin oinarrizko erabilera kontrolatzen dutenean, haiek sortzea gogoko logelak, etxeak, lokalak, ikasgelak eta abar.

 

Sweet Home 3D Luberri sisteman integratuta dago eta haren hurrengo bertsioan, noski, euskaraz mintzatuko da. Baina zuk aplikazioa instalatuta baduzu ez duzu itxaron behar, hizkuntza-paketea deskargatu eta inplementatu.

Linuxeko beste aplikazioak kontsultatu ditzakezu.

2020/08/12

VokoscreenNG bideo-tutorialak egiteko aplikazioa orain euskaraz

Lineako eskolak emateko hezkuntza-plataformak, bideo-konferentziak eta bideo-tutorialak egiteko aplikazioak oinarrizko elementuak dira.

 Bideo-tutorialak zein zuzeneko transmisioak egiteko OBS Studio da aukera osatuenak eskaintzen duen aplikazioa. Berarekin batera beste izar bat dago: VokoscreenNG, aurrekoa baino aukera gutxiago eskaintzen baditu ere nahikoa izaten da, oso sinplea da erabiltzen eta kalitate handia eta tamaina txikia duten bideoak sortzen ditu.

Albistea da VokoscreenNG aplikazioa -lehen Vokoscreen izena zuena- orain itxura berritu duela (QT eta Gtreamer erabiltzen du) eta euskaraz dagoela.

Bideo-tutorial honetan ikusten ahal da bere itxura eta nola konfigura daitekeen:


 

Instalazioa

Aplikazioa Linux zein Windows-en funtzionatzen du. Windows bertsioa hemendik deskargatzen ahal duzu. 

Ubuntu, Linux Mint edo deribaturen bat erabiltzen baduzu aplikazioa instalatzeko ireki terminala (Ctrl+Alt+T) eta, hurrenez hurren, exekutatu agindu hauek:

sudo add-apt-repository ppa:ubuntuhandbook1/apps

sudo apt update

sudo apt install vokoscreen-ng

 

Oharra:

Bideo-tutorialak egiteko edozein aplikazioarekin produzitzen hasi aurretik probatu behar dira ezarpenak, besteak beste audioren bolumena eta abar. Egin proba txiki batzuk eta, dena zure gustura dagoenean, hasi produzitzen.

Proiektuaren webgunea.

Beste aplikazio interesgarriak Linuxerako.