Luberri

Firefox : Nola antolatu laster-markak

2012-01-28T08:59:00.001+01:00

Hirugarren bertsioa arte Firefoxek bazuen menuko Laster-markak atalean berauek antolatzeko funtzioa baina bertsio berrietan kendu dute. Azken bertsioetan laster-markak antolatzeko aukerak agertzen dira eskuin-klik eginez.
Orduan azaltzen da karpeta eta marra bereizle berriak egiteko aukera bai eta laster-markak alfabetikoki ordenatzeko aukera Sailkatu izenez izenpean.

Eskola 2.0 Linuxekin

2012-01-26T23:12:00.001+01:00

Antigua-Luberri institutuan Eskola 2.0 ekimeneko arbel digital interaktiboak eta ekipo eramangarriak prestatzen ari gara Linuxekin erabili ahal izateko. Lan handiena portatilak wifi bidez Windows-en dominioan integratzen eta partekatutako karpetak automatikoki muntatzen ematen ari da. Lana bukatzen dugunean kontatuko dut nola egin dugun.

VUE kontzeptu mapak egiteko aplikazioa

2012-01-18T23:52:00.001+01:00

Gai baten eskema egiteko bi izaten dira eskema ohikoenak iherarkikoa (zuhaitza, giltzen bidezkoa...) eta buru-mapa edo kontzeptu mapa.

Lehengo kategorian bi nabarmenduko ditut: Freemind eta Xmind. Lehenengoa erraza eta euskaraz dabilena, bigarrena estetikoa eta moldakorra.

Bigarren kategorian loturen lerroak libreagoak dira eta erdian testua sartzen da. Kategoria honetan Cmap Tools ezagutzen nuen: euskaraz dago, eskemak bere datu basean gorde daiteke eta berteenak eskuratu. Interesgarria baina motel xamarra eta konplikatua instalatzeko.
Alor honetan ezagutu berri dut VUE (Visual Understanding Enviroment) Java gaineko aplikazio bat oso erraza erabiltzen eta oinarrizko aukera guztiak dituena. Estetikaren aldetik ez du saririk irabazteko modukoa baina ikasleek inolako arazorik gabe menperatu dezakete -ingelesez egon arren- zeren ikonoen bidez egiten dira ataza gehienak. Irudiak, estekak, testu kutxak... Formatu propioa du (.vue) eta esportatu daiteke web orri formatuan (html), pdf formatuan eta irudi formatuan (jpeg, png, svg) -azken hau eskalagarria-.

Software librea da. Instalatzeko VUEren web orrira joan behar da, erregistratu eta VUE.rar fitxategia deskargatu. Aurretik aipatu ditudanak bezala Linux, Mac eta Windowsen dabil. Deskargatu ondoren deskonprimitu behar da (nik karpeta pertsonalean java programentzako karpeta bat daukat) eta aipatu VUE.rar horretan bi klik eginez abiatzen da. Ubuntun abiarazle bat sortu nahi baduzu Aplikazioak atalean, bertan eskuin klik egin > Editatu menuak eta nahi duzun kategorian Elementu berria klika, izena jarri, arakatu VUE.rar fitxategia eta onartu. Funtzionatzeko prest.

Beste software interesgarria Linuxen
Software katalogoa

Linux: nola idatzi tileta

2012-01-18T04:37:00.000+01:00

Linuxen tileta ikurra asko erabiltzen da terminalean /home/zure-erabiltzailea/ karpetaren ordezkoa baita. Ikur hori idazteko Windowsen Alt+126 erabiltzen da eta Linuxen:

terminalean AvPag tekla
terminaletik kanpo AltGr+ñ

Battery Status Ubuntun aukerako bateria adierazlea

2012-01-17T22:14:00.002+01:00

Battery Status Gnomek ekartzen duen bateria-adierazlearen ordezkoa da. Gnomerena ikonoan adierazten du kargaren proportzioa baina beste hau ikonoan bertan edo ikonoan klikatzean -interfazearen arabera- kargaren ehunekoa eta estimatutako iraupena ematen du.

Instalazioa Ubuntun PPA bidez egiten da; horretarako terminal bat ireki (Aplikazioak > Gehigarriak > Terminala) eta ondoko aginduak kopiatu, terminalean itsatsi (klik saguaren gurpilean edo eskuin klik eta itsatsi touchpad-ean)

sudo add-apt-repository ppa:iaz/battery-status && sudo apt-get update
sudo apt-get install battery-status

Behin instalatuta panelean ager dadin egin behar dugu Sistema > Hobespenak > Abioko programak > Gehitu

Izena idatzi eta Komandoan ondoko hau itsatsi:

/usr/lib/battery-status/battery-status --indicator

Ubuntu Lucid eta Maverick Firefoxen azken bertsioak hartuko dituzte

2012-01-17T05:53:00.000+01:00

Irudia Genbetatik hartua

Canonicalek ohar baten bidez agindu du Firefoxen azken bertsioak Ubuntu 10.04 eta 10.10-en, alegia Lucid eta Maverick-en biltegietan jarriko dituela. Ubunturen bertsio hauek Firefox 3.6a erabiltzen dute. Firefoxen bertsio berriak hartzeko PPA biltegia ezarri behar zen mezu honetan azaldu nuenez. Gaurtik aurrera (2012/1/17) aski izango da PPA instalatu gabe zure Ubuntu eguneratzea Firefoxen azken bertsioa hartzeko.

Ubuntu eguneratzeko: Sistema > Administrazioa > Eguneraketa-kudeatzailea

Ubuntu Linux: bi hatzekin touchpaden saguaren gurpila imitatuz

2012-01-16T00:14:00.000+01:00

Ordenagailu eramangarriek eta notebookek touchpad-a dute sagurik gabe erabiltzen ditugunerako. Touchpad-ak punteroa mugitzen du eta haren azpiko ezker eta eskuin barra zanpatua saguaren arrastatzeak egiten ahal dugu eta laster-menuak zabaltzea. Baina, nola egin touchpad-ean saguaren gurpilarekin egiten ditugun korritzeak eta hurbil-urruntzeak?

Ubuntun bederen aukera hori ez dator aktibatuta. Aktibatzeko saguaren aukeretara joan behar dugu (Natty arte Sistema > Hobespenak > Sagua; Oneirick-en paneleko eskuineko erabiltzaile-izena > Sistemaren ezarpenak > Hardwarea > Sagua eta touchpad-a). Hara iritsitakoan touchpad-aren fitxa ireki eta markatu Bi hatzetako korritzea.

Hortik aurrera bi hatzak touchpad-ean jarrita gora eta behera egiten duzunean testu prozesadore edo pdf irakurtzailean testuak gora eta behera egingo du; Nautilusen eta internet nabigatzailean ere bai; argazkiak ikustean edo Google Earthen ibiltzean irudiak handitu eta txikitu egingo dira.

Bi hatzetako korritzea aktibatzeko deskribatu dudan modua erabiltzaile batentzat balio du. Ekipoaren administradorea bazara eta haren erabiltzaile guztientzat aktibatu nahi baduzu honako hau exekutatu behar duzu terminalean:

gconf-editor /desktop/gnome/peripherals/touchpad/scroll_method

2 zenbakia idatzi, eskuin klik egin eta lehenetsi, pasahitza sartu, saioa berrabiarazi eta probatu. Touchpaden zenbait modelo -zaharrak edo oinarrizkoak- ez dituzte mugimendu anitzak (multigestos) onartzen -niri Xtrem notebookarekin gertatu zait-. Funtzionatzen ez badizu hori izan daiteke arrazoia.

Bestelako mugimenduak konfiguratzeko badago programa bat TouchEgg baina ez dut probatu.

Beti arte Txillardegi

2012-01-14T19:13:00.000+01:00

Komentarioei erantzun

2012-01-12T23:22:00.001+01:00

Hemendik aurrera blog honetan, eta Blogger-en gainerako blogetan, komentarioei erantzun ahal izango zaio. Erantzunak, pentsatzen dut, komentarioaren azpian eta koskarekin agertuko dira.

Nola instalatu Adobe flash player Ubuntun tar.gz deskargatuta

2012-01-12T12:20:00.002+01:00

Firefoxek esaten badizu plugin bat behar duzula eta Adobe Flash Player orriko deskarga atalera eramaten bazaitu instalazioa egiteko urrats hauek eman ditzakezu:

1- Flash Player deskargatu hemendik: http://get.adobe.com/flashplayer/
2- Aukeren artean tar.gz bertsioa hautatu eta Deskargak karpetara jaitsi.
3- Flash zaharra desinstalatu. Software biltegira joan Flash idatzi eta desinstalatzeko esan.
4- Terminala ireki eta Deskargak karpetara sartu.
5- Bertsio berria bere tokira kopiatzeko agindu hau kopiatu, terminalean itsatsi eta exekutatu:

sudo cp libflashplayer.so /usr/lib/mozilla/plugins/libflashplayer.so

6- Firefox berrabiarazi, flasha eskatu dizun orrira joan eta egizu irribarre.

Ea html5-ek laster akabatzen du ditxosozko flasn playerrekin.

Nola lehenetsi Ubuntu Klasikoa Nattyn

2012-01-11T23:56:00.000+01:00

Eskoletara iristen ari diren ekipoetan Ubuntu Natty edo 11.04 bertsioa dago instalatuta. Nattyk bi mahaigain interfaze ditu: Unity eta klasikoa. Unity dago lehenetsita baina alda daiteke. Erabiltzaile bakoitzak egin dezake bere erabiltzaile hautatu edo idatzi ondoren azpiko barran Ubunturen ordez Ubuntu Classic jarrita.

Dena den Ubuntu sarean integratuta dugun eskoletan ekipo bakoitzak dozenaka erabiltzaile izaten ditu eta merezi du sortzen diren erabiltzaile berriak izan dezatela lehenetsita interfaze klasikoa beraiek aldatu behar izan gabe.

Nola egin?

1- Ekipoaren administradoreak egin behar du klik goiko paneleko eskuineko botoian eta bertan Sistemaren Ezarpenak hauta.

2- Sistema atalean Sistema hasteko pantaila hauta.

3- Desblokeatzeko eskatu eta pasahitza idatzi.
4- Saio lehenetsi gisa Ubuntu Classic hauta eta kito.

Zigote Body gorputza arakatzen

2012-01-11T19:09:00.001+01:00

Gogoratzen duzu Google Body? Google-k proiektua bertan bera utzi zuen baina agindu zuen irudien hornitzailea den Zigote-k aurrera segituko zuela proiektuarekin. Zenbait hilabete eta gero martxan dago zygotebody.com.

Bertan gizon baten eta emakume baten irudia ikus daitezke eta azaletik hasi eta barreneko muinerano: azala, giharrak, hezurdura, organoak eta, azkenik, odol, linfa eta nerbio sistemak.

Gorputzak ikusteko WebGL duten nabigatzaileak behar dira, hala nola Firefox eta Chromium-Chrome.

Gorputzatik nabigatzeko saguaren gurpilak hurbildu eta urrundu egiten du, eskuin klika sakatura biraketak eta mugimenduak eta ezkerreko barran gora eta bera eginez biluztuko dugu gorputza edo markatzaileekin zehaztuko dugu zeintzuk sistema nahi ditugu ikusgai. Nerbio, gihar, organo, hezur batean klikatuta bere izena -ingelesez- ageri da eta etiketa jar dezakegu.

Oharra. Goiko animazioa Google Body zaharrarena da, Zigote Bodyn animazioaren eskuin aldean ageri diren tresnak, momentuz behintzat, ez daude. Irudien karga lehen baino motelagoa dela iruditu zait. Dena den anatomia ikasteko balio handikoa tresna da. Eskerrik asko Zigote.

Aktak egiteko hainbat baliabide

2012-01-08T12:41:00.000+01:00

Bileren aktak egitea eta zabaltzea lan nekosoa baina sarritan beharrezkoa da. Lan hori errazteko baliabide batzuk aurkeztuko ditut: pare bat formatuari dagozkio eta hirugarren bat hizkuntzari.

Formaturako pare bat ideia:

Lehenengoa aktak egiteko blog bat sortzea da. Blogak eskaintzen digu aukera informazioa gordetzeko eta informazio hori edozein tokitik kontsultatzeko aukera. Blogaren egitura ondo egokitzen da akten kontsultetarako: azken akta ageriko da bloga zabaltzean eta haren atzetik aurrekoak. Albo batean aurkibide kronologikoa jar dezakegu eta hitzen bidezko bilaketa-leihoa.
Ez dut gomendatuko plataforma zehatzik baina oso kontuan hartu beharreko puntua da nolako zabalkundea eman nahi diogu aktei. Aukera bat da guztiz publikoa egitea, bilatzaileek informazioa topatzeko aukera ematea eta erakundearen web orrian estekatzea bloga.
Beste muturreko aukera litzateke bloga pribatua egitea eta soilik batzordearen partaideei ematea akta kontzultatzeko haien helbide elektronikoa zehaztuta. Bi aukera horien artekoak hainbat badira, hala nola publikoa izatea baina bilatzaileen arakatzeetatik kanpo eta web orrian estekatu beharrean intranetean jartzea lotura. Edozein kasutan akta bakoitzak mezu bat eta mezuaren izena bileraren data izatea komeni da. Baloratu daiteken posibilitate bat da deialdia bera sartzea -eta bilerarako dokumentazioa estekatzea- eta bilera eta gero deialdiaren mezua ezabatzea.

Bigarren aukera, tradizionalagoa, paperetik hurbilagoa, testu prozesadorea erabiltzea eta sare-lokalean gordetzea, horretarako dokumentu eredua edo akta-txantiloia jaitsi, zure beharretara egokitu eta erabiltzen ahal duzu. Dokumentu txantiloia forma bateko dokumentuak sortzeko erabiltzen da. Txantiloia hemendik jaits dezakezu. LibreOffice eta OpenOfficerako ott formatua du eta bertan klikatzean forma bereko dokumentu arrunta edo odt sortzen du. Dokumentu eredua aldatu nahi baduzu ott formatuarekin gorde behar duzu. Behin akta bukatua berau zabaltzeko pdf formatura esportatzea komeni da (Fitxategia > Esportatu pdf gisa) edozein ekipotik irekitzen den eta editagarria ez den formatura alegia. Ondoren pdf-dokumentua postaz bidaliko dugu edo eskuragai jarri sareko edo hodeiko karpeta batean.
Txantiloiaren edukia euskadi.net-etik hartu dut.

Idazketarako hainbat gomendio:

Edorta España Ocio, Uribe Kostako Zerbitzu Mankomunitateko itzultzaileak IVAPeko Administrazioa euskaraz aldizkariko 73. alean idatzi zuen Aktak idazteko hizkuntza-baliabideak - Esaldiak eskuinera luzatzeko trikimailuak izeneko artikuluan akten idazketa erraztu eta irakurketa ulergarriagoa egiteko oso aholku interesgarriak ematen ditu. Hona hemen artikulua pdf formatuan.

LibreCAD 1.0.0 eskuragai

2012-01-05T00:54:00.000+01:00

LibreCAD bi dimentsiotako CAD marrazkiak egiteko aplikazioa da.
Aplikazio hau QCad community edition-ean oinarritzen da baina haien artean zenbait diferentzia daude: LibreCAD-ek Qt4 interfazea erabiltzen du eta QCad-ek Qt3; autogordetze sistema du, DXF fitxategiak hobeto irakurtzen omen ditu eta plataforma nagusietan dabil (Linux, Mac OSX eta Windows).
Dokumentazio propiorik ez du baina QCad-ena erabili daiteke.

Bertsio hau da egonkor kontsidera daitekeen lehenengoa eta badirudi proiektuak aurrerapen handiak egiten ari dela.

Ubuntun instalatzeko software biltegitik egin daiteke baina azken bertsioa eduki nahi baduzu hobe duzu terminaletik horrela instalatzea:

sudo add-apt-repository ppa:librecad-dev/librecad-stable
sudo apt-get update
sudo apt-get install librecad

Beste Linux distribuzioetan, Windows edo Mac OSX-n instalatzeko jo LibreCAD-en web orrira.

Instalatu dut eta itxura ona du. Bigarren Hezkuntzan marrazketa teknikoa lantzeko oso kontuan hartzeko aplikazioa iruditzen zait. Software librekoen artean agian egokiena izan daiteke. Drafsight ere kontuan hartzekoa da, libre izan gabe doakoa da bigarren hau.

Beste software gomendagarria web honetan.

Fagor galdararen eskuliburua euskaraz

2012-01-02T16:40:00.001+01:00

Ez luke albistea izan behar baina bitxia iruditu zaidalako ekarri dut blogera.
Gas galdara erosi dut, Fagor FE-24NOX hain zuzen ere; txikia, merkea, bertan egina delako eta haren gainean ongi hitz egin didatelako. Instalatzen problemarik ez, martxan jartzeko arazorik ez, isila, konfiguratzeko erraza eta errendimendu onekoa (izan dadila urte askotarako). Deigarriena ordea SATaren arreta, Fagorren teknikoarena eta eskuliburua euskaraz eskaintzea. Eredugarria. Hainbatetan kontrako kasuak ekartzen ditugu argitara, oraingoan ordea Fagorrek doako propaganda merezi izan du.

2012rako Librezaleen egutegia

2012-01-01T18:38:00.001+01:00

Lehengoan kalkulu orri batean oinarritutako 2012rako egutegi zuria aurkeztu nuen mezu honetan, gaurkoan ordea aurkezpen batean oinarritutako bat aurkeztuko dut. Gorka Azkaratek sortu du Librezale.org sustatzeko eta lan txukuna egin du alajaina. Hilabete bakoitzean agertzen dira hilaren hainbat izen, aurreko eta ondoko hilabeteen miniaturak, eta sasoiarekin zerikusia duen esaera zahar bat.

Hona egutegia Slidesharen ikusteko eta pdf formatuan deskargatzeko.

Egutegia jaisteko Download klikatu behar da:

Egutegia editatu nahi baduzu hobe duzu odp formatuan jaistea. Irekitzeko LibreOffice edo OpenOffice behar duzu.

Musique musika erreproduktore elegantea

2011-12-25T20:04:00.000+01:00

Beste batzuen aldean -Rythmbox, Amarok, Banshee... - soila da Musique, ez du irratirekin konektatzen, ez du podcastak hartzen... Zure ordenagailuan dagoen musika erreproduzitzen du soilik baina oso interfaze elegante, erraza, arina eta praktikoa du.

Kontrako aldean erreprodukzio zerrendak ezin dira gorde, musika karpeta bakarra onartzen du eta ez dago euskaraz.

Linuxen instalatzeko biltegia erantsi eta biltegi zerrenda eguneratu behar da:

sudo add-apt-repository ppa:nilarimogard/webupd8 && sudo apt-get update

Eta, ondoren, instalazioa egin:

sudo apt-get install musique

Aplikazioa Soinua eta bideoa atalean ageri da. Martxan jartzen duzun aurreneko aldian galdetuko dizu zein karpetan duzun musika. Adierazi ondoren, konexioa baduzu, last.fm-ren datu basera joko du karatula eta irudien bila.
Hiru kategoria agertzen dira: artistak, albumak eta karpetak. Bilatzeko leiho bat ere baduzu eskuin aldean. Entzun nahi dituzun abestiak eskuin aldeko erreprodukzio zerrendara eraman eta play sakatu.

Gustukoa ez baduzu desintala dezakezu.

sudo apt-get remove musique
sudo ppa-purge ppa:nilarimogard/webupd8

Atzo Scratch Txopirekin

2011-12-17T23:18:00.001+01:00

Atzo Donostian ospatu ziren Slun11 jardunaldietan Pablo Garaizarrek Scratch tailerra eman zuen, ondo eman ere.

Byzanz bidez egindako atzipena

Scratch inguru multimedia batean programatzeko aplikazioa da. Ume eta gaztetxoentzat pentsatuta dago baina helduak jolasteko -eta programazioa ikasteko- primerakoa da. Lengoaiez programatu beharrean puzzle moduan estekatzen diren fitxen bidez programatzen da. Hainbat fitxa mota dago: mugimendu, itxura, soinua, arkatza, kontrola, sentsoreak, eragiketak eta aldagaiak.

Goiko arrainaren gidoia

Eszenak eta jolasak programa daitezke, bai eta tramankuluak mugitu Lego Wedo, Arduino edo PicoBoarden bidez.

Scratch Linux, Mac eta Windowsen dabil. Instalatzeko bere web orrira joan behar da, aplikazioa jaitsi eta instalatu. Bertan informazio gehiago eta bideo-tutorialak topa ditzakegu.

Gaur Blender WiliRoarekin

2011-12-16T23:31:00.000+01:00

Gaur Donostian ospatu diren Slun11 -Software librea unibertsitatean- jardunaldietan Guillermo Roak... esatera nihoan Blender irakatsi digula baina, tira, ordu t'erdian Blenderren burua sartzen irakatsi digu. Gaurko saiorako animazio eder bat prestatu du non Blenderren hainbat funtzionalitate ikusten den.

Blender - SLUN11 from WillyRoa on Vimeo.

Bideo hau eta Blenderrez egindako irudi eta animazio gehiago Willy Roaren blogean: bad3di.blogspot.com

Linux: Out of Range pantaila

2011-12-14T22:31:00.000+01:00

Linux duten ekipoen abioa Grub pantailarekin hasten da -instalatutako sistemen artean aukeratzeko erabiltzen dena-; bada zenbait ekipotan Grub pantaila ez da ikusten, haren ordez pantaila beltza agertzen da honako errore mezuarekin: Out of Range. Behin Linuxen sartzen denean arazoa desagertzen da baina arazoa da Grub ikusten ez badugu ezin dugula beste sisteman edo aukerak baliatu.

Kontua da, nik ezagutu ditudan kasuetan bederen, delako Grub pantaila hori 600x480 pixelen bereizmena duela eta hainbat txartel grafikok ezin dute pantaila handietan bereizmen hori erakutsi. Hortik errore mezua.

Egoera horretan bazaude hona nola konpon daiteken:

Lehenik eta behin Abio-kudeatzailea instalatuko dugu, software-biltegitik edo terminalean, Ubuntun bazaude, horrela:

sudo apt-get install startupmanager

Programa hau horrela abiaraziko dugu Sistema > Administrazioa > Abio-kudeatzailea. Gehienetan programa hau erabiltzen da zehazteko zein sistemarekin abiatu behar den ekipoa eta zenbat segundo itxaron behar du bestelako aukera hartu ahal izateko. Baina oraingoan egingo duguna da Grub-aren bereizmena aldatzea, horretarako Bereizmena atalean 640x480ren ordez 800x600 jarriko dugu.

Ondoren Aurreratuak fitxara joango gara eta bertan gauza bera egingo dugu.

Aplikazioa itxi. Berrabiarazi. Eta egizu irribarre.

Nola instalatu Smart arbel digitala Ubuntun

2011-12-13T23:08:00.001+01:00

Egun hauetan instalatzen ari dira Eskola 2.0ko arbel digitalak bigarren hezkuntzako institutuetan eta hasi naiz begiratzen nola instalatu Ubuntun.
Deskribatuko dut instalazioa Ubuntu eta Debianen oinarritutako distribuzioetarako balio du. Beste distribuzioetarako ere badira paketeak.
Instalazio honetan Notebook aplikazioa eta arbela ibiltzeko behar diren kontrolatzaile edo driver-ak instalatzen dira, euren mendekotasunak barne.

Lanera

Lehenik eta behin Smart-en web orritik paketea deskargatuko dugu. Horretarako orriaren bukaerara joko dugu, Debian Downloads zabaldu eta

SMART Notebook 10.2 SP1 software for Linux (Debian plain files) atalean Download klikatuko dugu. Formulario bat irekitzen da, bete eta deskarga hasiko da (pazientzia piska bat) deskarga bukatzean fitxategi kudeatzailea irekiko da deskonprimitzeko (bestela Deskargak karpetara joan eta bertan klik bikoitza egin). Galdetzen duenean non erauzi esango diogu zein tokitan nahi dugun eta bertan sortuko dugu pasarte honetan letra lodiz agertzen den SMART... izeneko karpeta dena bildua gorde dadin.

Orain karpeta prest dago. Kopiatuko dugu USB memoria batera eta instalatu behar dugu ekipoaren Mahaigainera kopiatuko dugu eta hasiko gara instalatzen:

Terminal bat ireki, cd komandoaren bidez mahaigaineko karpetan sartu eta ondoko agindu hau itsatsi:

sudo dpkg -i nwfermi-0.4.5_i386.deb smart-common_10.2.559.1-1_i386.deb smart-gallerysetup_1.2.559.1-1_i386.deb smart-hwr_10.2.335.1-1_i386.deb smart-languagesetup_1.0.514.1-1_i386.deb smart-activation_1.0.504.1-1_i386.deb smart-activation_1.0.504.1-1_i386.deb smart-activation_1.0.504.1-1_i386.deb

Instalazioa bukatzen denean berrabiarazi ekipoa eta pantailaren ezkerrean tresnak agertuko zaizkizu, panelean Smart-en ikonoa eta Aplikazioetan Smart Technologies izeneko atala eta bertan kontrol panela konektatzeko morroiarekin eta pantaila doitzeko tresnarekin.

OHARRAK

- Sartzen zaren bigarren egunean CD-KEYa eskatuko dizu produktua aktibatzeko. Frogako aldia 30 egunekoa da. Eskolan horrelako arbela baduzu Premiari edo berritzegunean galdetu.

- Hornitzaileak bertsioa aldatzen badu terminaleko agindua aldatu beharko zenuke.

- Desinstalatzeko terminaleko agindu berbera erabili beharko zenuke baina -i jartzen duen tokian -r jarrita. Bestela Synaptic ireki smart bilatu eta berdez ageri diren 7 paketeak markatu desintalatzeko eta onartu.

- Instalazioa horrela egitean arazoren bat baduzu edo instalatzeko modua hobe daitekeela uste baduzu idatzi mesedez komentario bat.

2012 egutegia

2011-12-10T23:34:00.001+01:00

2011 azkenetan dago eta 2012an pentsatzen hasi behar dugu.
Hemen duzu 2012ko egutegi zuria kalkulu orria formatuan. Egutegi hau egokia da, besteak beste, inprimatu eta oharrak idazteko; inprimatu aurretik jaiak, urtebetetzeak eta egun bereziak marka ditzakezu.

Egutegia jaitsi

Lehenengo orrian urte osoko ikuspegia dago:

eta azpian agertzen diren fitxetan urteko 12 hilabeteak:

Fitxategia ods formatuan dago. Irekitzeko LibreOffice edo OpenOffice behar duzu.

Mahaigaineko inkestaren emaitza

2011-12-08T08:56:00.001+01:00

Lehenik eta behin eskerrik asko inkesta bete duzuen hamaika lagunei. Hamaika ez hizkuntz figura moduan baizik eta 11.
Hemen duzue ematza:

Laginak ez du ematen konklusio handirik ateratzeko. Argi ikusten dudan gauza bakarra da jendeak Linux eskaintzen duen askatasunaz baliatzen dela eta kolore guztietako interfazeak eta mahaigainak erabiltzen direla; susmoa dut Canonicalek
Unity atera zuenetik inoiz baino gehiago.

Zer iruditzen zaizu?

Nola instalatu LibreOffice-ren gaztelerako hiztegia LinuxenibreOfficen

2011-12-04T18:32:00.001+01:00

Gehigarrien gaia oraindik berde samar dago LibreOfficen eta ez toki ofizialean oso material gutxi dago. Esate baterako gaztelerako (gaztelania espainol) hiztegirik ez dut bertan topatu.

Bilatzailean kontsulta egin ondoren funtzionatzen dute bi aukera topatu ditut:

Lehenengoa aplikatzeko ekipoko administratzailea izan behar duzu. Hala bada terminal bat ireki eta honako hau itsatsi:

sudo apt-get install myspell-es

Bigarrena. Administratzailea ez bazara beste aukera hau erabil dezakezu:

Gaztelerako gehigarria jaitsi: http://extensions.services.openoffice.org/en/project/Spanish
Konprimitutako karpeta bat da. Ez deskonprimitu, gorde eta ondoren egin eskuin klik, aldatu izena eman eta izenari .oxt erantsi.
Ondoren klik bikoitza egin gainean eta LibreOffice irekiko da eta gehigarri edo hedapen zerrendan erantsiko da.

OHARRAK
Bata zein beste erabiliz gero baliteke ekipoa berrabiarazi behar izatea zuzentzailea martxan jartzeko.
LibreOfficen euskara lehenetsita izango duzu, beraz, testua -edo testu zati bat- espainolez badago berau hautatu behar duzu eta status barran -beheko barran- euskara jartzen duen tokian klikatu eta Gaztelania edo Gehiago... klikatu eta Gaztelania hautatu beharko duzu espainol zuzentzailea ibil dadin.

Gaztelera xuxentzailea status barran

Linuxen mahaigaineko interfazeen afera

2011-11-30T22:29:00.001+01:00

Azken hilabeteetan Linuxen munduan agertu diren mahaigaineko interfaze berriek eztabaida bizia sortu dute erabiltzaileen artean. Blog honen irakurleen artean ere odola bor-bor jarri zaigu gaia aipatzean. Ez dadila odolik isuri. Inkesta honen bidez ikusiko dugu zein den gogokoena. Marka ezazu zure gogokoena eta ondoren klika Submit botoian.
Bozka egiteko epea gaur hasi eta gaur zortzi -abenduaren 7an- bukatuko da.

&lt;p&gt;&amp;amp;amp;amp;lt;p&amp;amp;amp;amp;gt;&amp;amp;amp;amp;amp;amp;amp;amp;lt;p&amp;amp;amp;amp;amp;amp;amp;amp;gt;Loading...&amp;amp;amp;amp;amp;amp;amp;amp;lt;/p&amp;amp;amp;amp;amp;amp;amp;amp;gt;&amp;amp;amp;amp;lt;/p&amp;amp;amp;amp;gt;&lt;/p&gt;

Gnome 2.x eta KDE mahaigaineko gogokoenak

2011-11-29T00:08:00.001+01:00

MuyLinux-ek egindako inkestaren emaitza

MuyLinux blogak egindako inkesta baten berri eman du. 2500 irakurlek erantzun diote "zein da zure Linux mahaigaineko gogokoena?" galderari eta emaitzek argi eta garbi hitz egiten dute Gnome 2.x eta KDE mahaiganekoen alde eta nabarmena da Unity-ren emaitza kaskarra. Ubuntu kudeatzen duen Canonical enpresari oso denbora gutxi geratzen zaio erabiltzaileen eskaerei erantzuteko LTS izango den hurrengo bertsioan.
Blog horretan bertan distroen artean Ubunturen arraskasta jaisten ari dela kontatu digute pasa den astean.

Frantziako gobernuak beste pausu bat eman du sofware librea administrazioan sartzen

2011-11-23T23:30:00.001+01:00

Frantziako gobernuak administrazioak erabiliko duen software librearen mantenuaz arduratzeko esleipen publikoa argiratu du. Kontratuak hiru urteko iraupena izango du eta bi miloi euro inguruko diru kopurua suposatzen du.
Kontratuak 22 ministerio eta erakundetan aplikatuko da eta barnean hartzen du Linuxen distribuzioak (Debian eta CentOS), bulego-aplikazioak (OpenOffice) eta eta abar, denetara hamar arloko softwarea.

Ez da Frantziako gobernuak ematen duen lehenengo urratsa norabide horretan, 2004an 1500 zerbitzari migratu baitzituen Windows-etik Linux Mandrakera, Gendarmeriak 1912rako 70.000 ekipo Linuxen izango ditu eta Asanblea Nazionalean ere 1200 lanpostu Ubuntun ari dira.

Iturria: LeMondeInformatique

Google Reader-en espazioa nola kudeatu

2011-11-15T23:50:00.001+01:00

Google Reader espazio zuriak txikituta eta titulua-barra kendu ondoren

Duela aste batzuk Google-k Greader-en itxura berritu zuen. Greader edo Google Reader RSS, jario edo harpidetzak irakurtzeko web orria da. Aldaketa horretan espazio zuriak handiek pantaila jaten dute, batez ere notbook eta tabletetan. Ikus dezagun nola konpondu arazo hori Firefoxen:

Google Reader Absolutely Customizable script-a bat instalatu behar da. Delako script-a instalatu ahal izateko aldez aurretik GreaseMonkey gehigarria instalatu behar dugu. Firefox berrabiaraziko dugu. Ondoren aipatu script-aren orrira joan eta install botoia klikatuko dugu. Berriro ere berrabiaraziko dugu Firefox eta GReader-en espazio zuriak dagoeneko ez dira ageriko.
Informazio area maximizatzeko ezkerreko zutabean Subscription-en eskuinean dagoen ikonoa klikatuko dugu eta zerrendaren bukaerako Customize-n klikatuko dugu. Ageriko zaigun leihoan hainbat atal ezkutatzeko aukera ematen du eta gu Logo eand Search bar markatuko dugu. Nik bide batez ezkerreko albo panela pixka bat zabaltzeko probestu dut -175-etik 200 pixelera-.

Horrekin askoz toki gehiago izango dugu informazioa irakurtzeko. Aipatutako scripta Chrmoium-Chromen ere funtzionatzen omen du -zuzenean, Grease Monkey gabe-.

EGUNERAKETA 2011/11/21ean
Gaur jakin dut Google-k jarri berri duela aukera espazio zuriak txikitzeko Google Reader-en ezarpenetan. Horretarako GReader-en ezkerraldeko goiko partean agertzen den gurpil horzdunean klik eginez sartuko gara ezarpenetan eta bertan Confortable modutik Compact modura pasako gara. Dena den logoa eta bilaketa barra kentzeko eta alboko panelaren zabalera kontrolatzeko segitu behar dugu egiten goiko mezuan azaltzen den moduan.

Zientzia eta teknikako euskara arautzeko gomendioak

2011-11-14T08:09:00.001+01:00

Ikasmaterialetako hizkuntzaren egokitasun-irizpideak finkatzeko Aholku Batzordearen eskutik eta EIMA programaren barruan Jose Ramon Etxebarria koordinatu duen taldeak Zientzia eta Teknika alorretako "unibertsitatera iritsi arteko irakaskuntzako testugintzan ageri diren zenbait arazo espezifikori buruzko aholku-gomendioak biltzen dituen liburua argitaratu du Eusko Jaurlaritzak.

Gomendio hauek irakasleentzat ez ezik alor hauen inguruan idazten edo lan egiten duen ororentzat dira interesgarri. Batetik atal orokorrak jorratzen ditu, hala nola sinboloak, zenbakiak eta laburdurak, eta beste aldetik zenbait alor zehatzen arazoak: fisika, matematika, kimika, biologia eta informatika.

Kontsulta liburua da dudarik gabe baina erraz asko eman daiteke aren gaineko begirada orokorra. Paperezko liburua salgai dago eta pdf formatuan hemendik jaitsi daiteke.

Informatikari dagokionean gomendioen artean bik nabarmenduko ditut -betetzen ez nituelako jakina-. Lehenengoa neurrien gainekoa: kilo edo mila adierazten duen k hain zuzen minuskulaz idazten dela, kb, kB -kilobit eta kilobyte- eta haren gainekoak -mega, giga, tera eta abar- maiuskulaz. Bigarrena ingelesen antzera ahoskatzen ohi dugun hainbat izenen gainekoa, hala nola Google eta Apple; izan ere "l"-z ahoskatzeko ohitura dugu baina idazterakoan irizpide fonetikoaren ordez ortotipografikoa aplikatu behar da eta deklinatzean Google-k, Google-ren, Apple-k, Apple-rentzat... idatzi behar da.
Esamoldeen aldetik neurtu aditzaren erabilerari gomendioak nabarmenduko nituzke: "Leirek irudia neurtu du eta 800 pixel zabal da "tankerakoak egokiak dira eta ez "irudiak 800 pixel neurtzen ditu" modukoak.

Eskerrik asko parte hartu duten guztiei, batez ere, nabaritzen ez den arren, irakasle izan ditudan Jose Ramon Etxebarria eta Juankar Hernandez-i.

Linux: bidali dokumentua LibreOffice-tik

2011-11-13T23:21:00.001+01:00

Errore mezua bidaltzen saiatzean

LibreOffice-k (eta OpenOffice-k) tresna barran dokumentua zuzenean bidaltzeko aukera ematen duen botoia dute -goiko irudian markatua- baina konfiguratu gabe eta horregatik goiko irudiko mezua agertzen ohi da.

Botoi hori klikatzean posta bezeroa ireki behar da eta berau konfiguratzeko honela egiten ahal dugu: Tresnak > Aukerak > Internet > Posta elektronikoa eta agertzen den leihoan idatziko dugu: /usr/bin/thunderbird -edo Evolution edo erabiltzen duzun posta bezeroa-.

Mint Gnome Shell Extension

2011-11-07T01:01:00.000+01:00

Ubuntuk saltsa ederra dauka interfazeekin. Azken bertsioan (11.10 Oneiric Ocelot) lau interfaze eskaintzen ditu eta, nire ustez, bakar batek ere ez du ematen 11.04ren Ubuntu Clasic interfazearen maila. Nire aholkua, beraz, argia da: zalantzan bazaude gera zaitez 11.04 bertsioan.

Honezkero bertsio berritzea egin baduzu eta aukerak probatu nahi badituzu Gnome Shell eta Ubuntu klasikoaren bertsio deskafeinatu bat instala ditzakezu horrela:

sudo apt-get install gnome-shell

Interfaze berriak erabiltzeko amaitu saioa eta erabiltzailearen kutxako gurpiltxoan klikatu:

Zerrenda horretan GNOME Gnome Shell da eta GNOME Classic aurreko bertsioaren Ubuntu klasikoaren imitazio txar bat.

Gnome Shell ibiltzeko azelerazio grafikoa behar du eta Classic azelerazio grafikorik gabeko alternatiba moduan eskaintzen du. Edonola ere badirudi Gnomek lortu duela Gnome Shell azelerazio grafikorik ibiltzea eta litekeena da Ubunturen hurrengo bertsioak klasikoa ez erabiltzea.

Linux Mint Ubuntun oinarritutako distribuzioak Unity eta Shell interfazeekin gustura ez eta Gnome2ko interfaze klasikoaren alde egiten du. Horretarako bi lineatan lan egiten ari da: batetik Gnome2ko fork-a den Mate proiektua bultzatzen du eta bestetik Gnome3ko Shell interfazeari Gnome2ko itxura eta prestazioak emateko gehigarriak prestatzen ari da: Mint Gnome Shell Extension. Bigarren linea horretan aurrerapausoak egin ditu eta dagoeneko probatu daitezke horietako gehigarri batzuk Shell interfazean. Horien bidez lor daiteke:

Beheko panela aktiboak dauden atazen adierazleekin.
Aplikazioen menu klasikoa.
Lekuak, hau da gogoko karpetak agerian. Azken bi hauek eskuineko txokoko Menu-an.

Hona irudi adierazgarri bat:

Zehaztasun gehiago nahi baduzu egin klik irudia zabaltzeko.

Irudian ikus daiteke beheko panela -bi ataza irekita dituela- eta txokoan dagoen Menu klikatuta ageri dira abiarazle-multzo edo dock-a, aplikazio taldeak eta beheko Places botoian klikatuta agertuko litzateke karpeta nagusiak.

Probatu nahi baduzu Gnome Shell-erako gehigarri multzo hau batetik instalatu behar dituzu terminalean ondoko aginduak exekutatuz:

sudo add-apt-repository ppa:webupd8team/gnome3 sudo apt-get update sudo apt-get install mgse-bottompanel mgse-menu mgse-windowlist

Bestetik abiatu behar duzu gehigarri edo extension hauek: abiatu Advanced Settings aplikazioa eta Shell extensions atalean aktiba itzazu instalatutako hiru gehigarriak (Botton panel, Menu eta Windows list):

Bukatzeko aldaketa hauek aktibatzeko saioa berrabiarazi behar duzu.

Compact menu Firefox nabigatzailean

2011-11-05T18:20:00.002+01:00

Menua Compact menuaren botoian klikatzean zabaltzen da

Pantaila txikietan nabigatzailea erabiltzen dugunean inportantea da web orriak ahalik eta tamaina handiena hartzea. Horretarako oinarrizko tresna da F11 tekla, alegia pantaila osoa ikustea eta behar beharrezkoak diren barrak baino ez ikustea. Bigarren alor horretan interesgarria suerta dakizuke Compact menu gehigarria; martxan dagoela menua ezkutuan dago eta helbide barraren botoi urdinean klikatzean zabaltzen da. Firefoxen instalatzeko egin klik hemen

Portugalen GNU/Linux aurrera

2011-10-30T20:42:00.000+01:00

Portugalgo gobernuak eskola publikoetako 50.000 ekipoetan software pribatiboko lizentziak ez berritzea erabaki du. Ekipo hauek GNU/Linux sistema eragilearekin funtzionatuko dute. Neurri honen bidez gobernuak 1.16 milioi euro aurreztuko du.

Kuriosoa da austeritate garaiotan gainerako gobernuek berez justifika-ezinak diren lizentzia horietako gastuak ezabatzen dituzten bitartean Eusko Jaurlaritzak diru murrizketak irakasle gutxiago kontratatuz egiten dituzte eta Eskola 2.0 programan Windows-en lizentziez gain software libreko LibreOffice kendu eta haren ordez Microfsoft Office 2010eko lizentziak erosi dituzte.

Iturria: Publico

HiztegiBar Chromium/Chrome nabigatzailean

2011-10-28T23:53:00.004+02:00

Chromium, Chromeren bertsio libres, frogatu nahi nuen. Horretarako Ubunturen software-biltegian bilatu eta instalatu dut.
Inpresio ona eman dit. Firefox baino azkarragoa abiatzen da; memoria gehiago gastatzen du baina ez hainbeste; lastermarkak sinkronizatzen ditu -Google kontuaren bidez-; polita eta erabilgarria da; euskaraz dago eta euskara lehenetsi eta zuzentzen du (Hobespenak>Aurreratua>Web-edukia>Hizkuntza eta ortografia-egiaztatzailearen ezarpenak>Gehitu>Euskara). Gehigarriak instala daitezke, tartean Euskalbarren antzekoa den HiztegiBar.

Hori guzti hori ikusita Firefox baztertu eta Chromiumera pasako al naiz? Ba, ez. Nahiago dut segundo hamarren bat gehiago itxaron abiatze bakoitzean baina geratzen Firefoxekin eta Euskalbarrekin.

Leihoetako beheko botoiak nola ikusi

2011-10-28T10:59:00.000+02:00

Blog honetako mezuek maila teknikok handirik ez dute baina oraingo hau tentelkeri hutsa da. Baina zenbat denbora galtzen dugu honelako tentelkeriengatik?
Harira.

Arazoa:
Batzuetan irekitzen dira pantailan sartzen ez diren leihoak eta hauen azpiko aldea pantailatik kanpo geratzen da. Leihoaren parte horretan geratzen dira besteak beste Utzi, Onartu, Gorde eta tankera horretako botoiak. Hau batez ere pantaila panoramikoetan eta portatil txikietan gertatzen da.


Leihoaren beheko botoiak ez dira ikusten eta korritze-barrarik ez dago.

Irtenbidea:
Sinplea. Leihoaren aplikazio barrako kontroletan leihoa maximizatzeko aginduko diogu eta pantaila osoa hartzean beheko botoiak agerian geratzen dira.

Lehengo leiho bera baina maximizatuta. Orain beheko botoiak ageri dira.

Linux: Nola partekatu inprimagailuak

2011-10-28T00:19:00.001+02:00

Etxean edo lantokian baldin badaude hainbat ekipo Linux dutenak eta horietako batek inprimagailua badu hemen ikusiko dugu nola konfiguratzen ahal den beste ekipoek inprimagailu hori erabili ahal izateko.

Hasiko gara inprimagailua duen ekipoarekin.

Administrazio atazetan "Inprimatzea" irekiko dugu (suposatuko dut inprimagailua instalatuta dagoela). Inprimagailuaren izena bere marka eta modeloa izango da seguru asko. Etxean horrela utziko dugu baina lantokian inprimagailua ondo identifikatzen duen izen bat jarriko diogu (departamentua, bulegoa, ikasgela...). Horretarako eskuin klik egin eta "berrizendatu".

Egiaztatuko dugu inprimagailua aktiboa (Enabled) eta partekaturik dagoela.

Bertako menuan Zerbitzaria > Ezarpenak klikatuko dugu eta honako aukera hauek markatuko ditugu: "Publish shared printers connected to this system" partekatutako inprimagailua beste ekipoetatik ikusi ahal izateko eta eta , nahi izanez gero "Allow remote administration" beste ekipoetako erabiltzaileek eurek bidalitako dokumentuen inprimaketa kontrolatu ahal izateko.

Orain beste ekipoetara joango gara, partekatutako inprimagailua erabili nahi duten horietara eta Sistema >Administrazioa > Inprimaketa egingo dugu. Bertako menuan Zerbitzaria > Ezarpenak egingo dugu eta honako aukera hau markatuko dugu: "Show printers shared by other systems", hau da erakuts dezala beste ekipoek partekatutako inprimagailuak.
Hori eginda eta, noski, inprimagailua konpartitzen duen ekipoa eta inprimagailua bera piztuta badaude inprimagailuen leihoan ikusiko dugu eta erabiltzeko prest egongo da.

Irudi honetan ikusten da Antigua-Luberri institutuko ekipoek inprimatzeko dituzten aukerak: sareko inprimagailua lehenetsita dago eta mintegietakoak aukeran.

Ubuntu: nola berreskuratu leihoetako kontrolak

2011-10-27T22:41:00.002+02:00

Aplikazioaren barran ixteko, minimizatzeko eta maximizatzeko kontrolak desagertu bazaizkizu berreskura ditzakezu terminal batean ondokoa itsatsita:

nohup metacity --replace

Nola berreskuratu Grub

2011-10-27T22:17:00.000+02:00

Arazoa:
Ekipo batean Grub pantailara ez da iristen, batzuetan honelako mezua ager daiteke:

GRUB loading
Error: unknown filesystem
grub rescue>

Konpontzeko:
Abiatu ekipoa Linux liveCD batez -instalazio diskoa alegia- eta saiatzeko edo instalatzeko aukerara iristean euskara eta saiatu aukera ezazu.
Kontsola bat ireki eta ondoko aginduak kopiatu eta bertan itsatsi:
   sudo su          (supererabiltzaile baimenak izateko)
   fdisk -l              (ikusteko ekipoaren partizioak, begiratuko dugu zein den Linux sistema duena)
   mount /dev/sdxy /mnt (non x diskoaren letra den eta y Linux partizioaren zenbakia. Honen bidez Linuxen partizioa muntatuko dugu)
   mount --bind /dev /mnt/dev (gainerako gailuak muntatzeko)
   chroot /mnt    (CDaren Linuxean root moduan sartzeko)
   grub-install --recheck /dev/sdx (non x lehenengo diskoaren letra den. Garrantzitsua partizio zenbakirik ez jartzea, soilik sda edo hda -lehengo zerrendan begiratu-). Bukatzen duenean halt idatzi eta return berrabiarazteko.

Ktouch aplikaziorako ariketa berrituak

2011-10-24T16:40:00.000+02:00

Dagoeneko milaka zarete mekanografia ikasteko Ktouch programaren ariketak euskaraz blog honetatik deskargatu dituzuenak - bueno agian ez hainbeste-. Zuetako batzuk aspaldi jaitsi zenuten ariketa-fitxategia eta, aitortu behar dut, lehenengo bertsioak akats mordo zeukan; besteak beste landu gabeko hizkiak zituzten hitzak.
Honezkero hainbat zuzenketa egin ditut eta oraingo bertsioa akatsgabea denik ezin badut segurtatu ere, aurrekoak baino txukunagoa da.

Azken bertsioa: Euskara.Ktouch.xml.zip

Deskargatu ondoren non eta nola kokatu hemen deskribatzen da.

gLabels, etiketak egiteko aplikazioa

2011-10-23T01:01:00.002+02:00

gLabels etiketak egiteko aplikazio jantzia eta erraza da. Linux eta Mac sistemetan lan egiten du. Ubuntun software biltegitik instala daiteke, beste distribuzioetarako eta Mac-entzako bere orritik jaits daiteke.

Etiketak editatu eta inprimatzeko datu baseak erabili ohi dira. Gure kasuan, datu basea erabili nahi ez badugu edo dugun datu baseak etiketak inprimatzeko aukera grafiko nahikorik eskaintzen ez badigu gLabel erabil dezakegu etiketa txukunak egiteko. Ikus dezagun, gainetik bada ere, nola erabiltzen da:

Aplikazioa martxan jarriko dugu (Ubuntun Bulegoa atalean) eta proiektu berria irekiko dugu (File > New); une honetan adieraziko diogu aplikazioari zein etiketa modelo erabiliko dugu -haren araberakoa izango da etiketaren tamaina-. Ondoren etiketa editatuko dugu:

Tresna barran ikus daitekeenez hauek dira etiketan erabili daitezkeen elementuak: testua, laukizuzena, marra, elipsea, irudia eta kode-barra.

Testua idatzi ondoren formatua ematen ahal diogu (aurreko irudiaren beheko barran ikus daitekeenez). Baina batez ere interesgarria den aukera hau da: datu taula bat erabili daiteke etiketen datu-iturri moduan. Horretarako datuen taula osatuko dugu kalkulu orri batean eta ondoren CSV formatuarekin gordeko dugu. Ondoren tresna barrako azken ikurra den "fusio-propietateak" sakatuko dugu -eskuineko irudian gorriz markaturik- eta bertan zehaztuko dugu zein CSV formatodun fitxategian dauden datuak eta dauden datuetatik zeintzuk inprimatu nahi ditugun.

Datuok etiketan kokatzeko testu erreminta hauta eta "Key" koadroan adieraziko diogu zutabea eta ondoren "Insert merge field" klikatuko dugu. Horrela zutabe guztiekin.

Aipatu behar dut ere barra-kodeak sartu daitezkeela etiketetan; horretarako GNU barcode aplikazioa erabiltzen du.

Etiketa eredua bukatutakoan, proiektua gorde -nahi beste aldiz erabili ahal izango dugu eta baita aldatu ere- eta ondoren etiketak inprimatuko ditugu.

Xmind korritze-barrekin

2011-10-16T23:25:00.000+02:00

Xmind eskemak adierazteko aplikazio interesgarri bat da (lehengo batean aurkeztu nuena). Kontua da zenbait Linuxetan -gutxienez Ubuntu Natty eta Oneiric-en- korritze-barrak ez dutela funtzionatzen. Gora behera egiteko ez dago arazo handirik zure saguak gurpila badu baina ezker eskuin egiteko ez dut modurik asmatu.

Sarean bilatuta irtenbide bat topatu dut: Xmind abiatzea bere korritze-barrekin eta ez sistemaren Overlay korritze-barrekin. Horretarako ondoko agindua kopiatu eta terminal batean itsatsi.

LIBOVERLAY_SCROLLBAR=0 /usr/local/xmind/xmind

Tamalez ez dut lortu funtzionaraztea aplikazioen menuan ez eta agindu honekin abiarazlerik sortzea, beraz, Xmind abiarazi nahi duzun bakoitzean terminalean jarri behar da agindu hau. Bestela Xmind abiatzen da baina korritze-barrarik gabe.

Nola moldatu panelak Oneiric Oceloteren Gnome klasikoan

2011-10-16T00:46:00.002+02:00

Goiko eta beheko panelak moldatuta Oneirik Ocelote-ren Gnome klasiko interfazean.

Aurreko mezuan komentatu dut Gnome klasikoaren panela blokeatuta zegoela baina trasteatzen topatu dut soluzio bat panelak Oneiric-en pertsonalizatu ahal izateko.

Dock bat erabili beharrean gehien erabiltzen dituzun bizpahiru aplikazioen abiarazleak panelean jartzeko orain ezin da aplikazioan eskuin klik egin eta "erantsi panelera" egin baina saguarekin klikatu eta herrestan eraman daitezke.

Bestetik goiko panelari ohiko elementuak eransteko edota tokiz aldatzeko panelean eskuin klik egin beharrean egizu Alt+eskuin-klik egin. Era berean beheko panelari propietateak aldatzeko edota Mahaigaina erakutsi edo Paperontzia eransteko eta euren ohiko tokian jartzeko ere Alt+eskuin klik egin.

Bestetik Nautilusean zuhaitza ikuspegia lekuak ikuspegia baino gogokoagoa baduzu bertako menuan egin Ikusi > Albo panela > Zuhaitza. Bestetik ikono, zerrenda eta ikuspegi trinkoa aldatzeko aukera kendu badute ere lehenetsita datorren ikono ikuspegia alda dezakezu Nautilusen Editatu > Hobespenak.

Oneiric Ocelot, lehen inpresioa

2011-10-15T21:27:00.002+02:00

Etxean bi ekipo ditut, mahaigainekoa eta netbooka. Txikian instalatu dut Ubuntu 11.10a eta hau da hartu dudan inpresioa.

Instalazioa oso ondo joan da. Mahaiganekoan torrent bidez jaitsi dut irudia eta abio-USB memoria prestatu dut. Haren bidez instalatu dut. Nobedade bezala datuak mantenduz instalatzea eskaini dit aukeren artean eta ondo eta azkar egin du.

Interfazeena bukaerarako utziko dut.

Gauza positiboen artean, aipatutakoaz gain, Flash Player eta Dropbox kideen biltegitik instalatzen direla eta Thunderbirden integrazioa sisteman, bai bere leihoan bai paneletik. Eta besterik ez.

Negatiboen artean Gnome3 da inpresio txarren egin didana, sinplifikatzeko asmoz edo pertsonalizatzeko eta kontrolatzeko aukera gehienak kendu dizkiote. Goiko panela blokeatuta dago, ez bakarrik Unity eta Gnome Shell-en, baita Gnome klasikoan ere. Nautilusen tresna barrari aukera gehienak kendu dizkiote: fitxategiak ikono moduan, zerrendan edo era trinkoan ikusteko aukera, zooma eta abar. Egitura ikusteko aukera ere ezkutatu dute (lekuak, zuhaitza eta abar). Nik uste dut hurrengoan arakatzailea bera kenduko dutela.
Bestetik goiko paneletik leihoak itxi, minimizatu edo aldatzeko ikonoak ezkutatu dituzte (sagua gainean jartzean agertzen dira). Beste zailtasun bat.
Software-biltegia, Oneiric-en software-zentroa, motel baino motelago dabil eta irekitzen denean Canonical-ek salgai dituen aplikazioak ageri dira beste ezer baino lehen. Eskubide guztia dute baina... Google Earth , momentuz bederen, ezin da bertsio honetan instalatu.
Itxura aldatzeko aukerak ia desagertu dira, bai eta pantaila-babeslea kudeatzekoa. Compizconfig-settings-manager (ccsm) ez omen du funzionatzen eta usten du sistema panelik gabe.

Interfazeak direla eta lehenik eta behin instalazioarekin batera datorren Unityak probatu ditut eta ez diet aurrerapenik ikusten. Aplikazioak topatzea -dock-enak aparte noski- abentura handia da. Iragazkiak jarri dituzte kategoriak hobeto ikusteko baina kategoriek beraiek kentzen diete tokia aplikazioen ikonoei eta gainera behera egiteko kontrolik ez da agertzen. Bilaketak egiteko aplikazioak, fitxategiak edo musika kategoriak jarri dituzte baina bilatzailea oso gaizki dabil.
Ez diot aurrerapenik ikusi Unity-ri. Beheko panela eta menuena kenduta irabazten den pantaila da duen abantaila bakarra, tableta eta netbook-entzako jakina.

Gnome Shell eta Gnome klasikoak aukeratu ahal izateko instalatu egin behar dira:

sudo apt-get install gnome-shell

Gnome Shell probatu dut eta, oro har Unity baino finoago badabil ere, ez zait batere praktikoa iruditzen, paneleko ikonoak eta mezuak gaizki ikusten dira eta gainera deustarako balio ez duen eta pantaila jaten duen barra zuri bat agertzen da aplikazio guztietan. Itzaltzeak ere lanak ematen ditu¡

Dezepziorik handiena Gnome klasikoa izan da. Lehen aipatu dudan bezala oraingoan Gnome klasikoa ez da Gnome2 Gnome3 baizik eta horren ondorioz goiko panela ezin da konfiguratu -Firefox eta gehien erabiltzen ditugun aplikazioen abiarazleak ere ezin dira jarri-, Nautilus, lehen esan dudan bezala lehen zenaren itzal bat da.

Hau dena ikusita momentuz Oneric nire netbook-ean geratuko da Unity 2Drekin eta mahaigainekoan, puska baterako behintzat, Natty geratuko da Gnome2-rekin eta Virtual-Box instalatuko dut Ubunturen ondokoa zein izango den frogatzeko. Momentuz lehen hautagaiak Linux Mint eta KDE erabiltzen duen dristroren bat.

Bideoa ia hogei aldiz txikiagoa

2011-10-08T23:32:00.000+02:00

Bideoak konpartitzeko posta elektronikoa erabiltzen dut. Ez dut gustuko etxeko bideoak hodeira igotzea (Youtube, Vimeo...). Kontua da bideoak oso astunak direla postaz bidaltzeko. Bideoak konprimitzeko beste batean aipatu nuen Arista Transcoder aplikazioa erabiltzen dut Ubuntun. Gaur berriro ekarri dut blogera komentatzeko nola egin daiteke ohiko konpresioa baino handiagoa kalitateak kalte larririk hartu gabe.
Aristak eskaintzen dituen formatuen artean WebM formatuak oso emaitza onak ematen ditu. 0.9.7* bertsiotik aurrera konpresio moten ezarpenak aldatzeko aukera dago kalitate eta pisuarekin jolastuz. Aldaketa horiek egiteko klikatuko dugu Create Conversion eta konbertitu nahi dugun diskoa, fitxategia edo karpeta eta konbertsioaren norakoa zehaztu ondoren hautatuko dugu konbertsio mota, gure kasuan WebM, eta eskuineko irudian ikusten den i botoian klikatuta konbertsioaren ezarpenak agertzen dira. WebM formatuako konpresioak Aristaren ezarpenetan kalitate maila 6 du eta horrekin irudietan galerarik ez da atzematen eta konpresioaren emaitza bost bat aldiz txikiagoa da gutxi gora behera.

Ezarpenak aldatzen baditugu eta kalitatea demagun 4ra jeitsita (quality=6 ren ordez 4 jarri) konpresioak ia 20 aldiz txikitzen du bideoaren tamaina kalitate-galera txiki xamarrarekin.

Ondoko adibidean ikus daiteke argazki-kameraz ateratako minutu bateko bideoak 56 MB pisua du eta WebM formatura kalitatea pixka bat galtzen 3.1 MBetan geratzen da; posta elektronikoz bidaltzeko tamaina prudentea alegia.

Jatorrizko bideoa eta konprimitutako bertsioen pisua.

Konpresioa egin eta gero posible dugu lehenetsitako kalitatea 4ean utzi edo 6ra bueltatu.

* Aristaren bertsioa ikusteko klika Laguntza > Honi buruz eta 0.9.7 baino zaharrago baduzu azken bertsioa instala dezakezu ppa biltegia zehaztuta. Horretarako terminala ireki eta hurrenez hurren hiru agindu hauek exekuta itzazu:

sudo add-apt-repository ppa:webupd8team/arista
sudo apt-get update
sudo apt-get install arista

Oharra: mezu hau 2012/1/5ean berritu dut.

Nola instalatu Crescendo CD-ROMa Linuxen

2011-10-06T23:31:00.002+02:00

Pearson Alhambra argitaletxeak DBHn musika ariketak eta hainbat audio dituen CD-ROMa kaleratu du. Teorian Windows, Mac eta Linuxen funtzionatu behar du baina Linuxen, onean ez dabil -nik behintzat ez dut lortu-. Nola konpondu?

CDaren edukia karpeta batera kopiatu -lokala edo sarekoa-. Karpetari Crescendo izena jarri.
Crescendo karpetako exeWin.exe fitxategia exekutagarria bihurtu (eskuin klik > Propietateak > Baimenak > Baimendu fitxategia programa bezala exekutatzea.
Windows-programak Linuxen exekutatzen dituen Wine aplikazioa instalatu -software biltegitik-.
Karpetako exeWin.exe klikatuta abiatuko da aplikazioa. Nahi izanez gero abiarazle bat sortzen ahal diozu mahaigainean (mahaigainean eskuin klik > Sortu abiarazlea, izena: Crescendo, komandoa: araka ezazu karpetako exeWin.exe.

Audio Recorder: grabatu mikrofonotik edo soinu txartelatik Ubuntun

2011-09-28T01:27:00.000+02:00

Ubunturekin batera instalatzen den Soinu-grabatzailea aplikazio erraza eta praktikoa da baina ez berak ez soinu hobespenek ez dute aukerarik ematen soinu txartelatik ateratzen diren soinuak grabatzeko, soilik mikrofonotik sartzen direnak graba daitezke. Nola grabatu pelikula baten audio zati bat, bideo konferentzia bat, entzuten ari garen irrati emisio bat edo edozein audio?

Lehengo batean arazo honi irtenbide bat bilatu nion eta mezu honetan azaldu nuen. Gaurkoan ordea, errazago eta erabilgarriagoa den soluzio bat topatu diot: Audio Recorder aplikazioa.

Ezaugarriak:

nire ustez interesgarriena da aukera ematen duela hautatzeko grabazio iturria, eta bertan mikrofono eta bertan Internal Audio Analog Stereo, alegia soinu txartelaren soinua. Horretaz gain mikrofonoa, webcam, Rhythmbox, Skype...
Automatikoki has daiteke grabatzen ordu zehatz batean edo soinua hastean eta gelditu hainbat denbora pasata edo isiltasuna egiten denean.
Onartzen dituen formatuak: ogg, flac, mp3, mp2, spx eta wav.

Ubuntun instalatzeko bere PPA edo biltegi propioa aktibatu behar dugu (Ubuntu 10.10, 11.04 eta 11.10 bertsioetan). Terminal batean hurrenez hurren exekuta ezazu:

sudo add-apt-repository ppa:osmoma/audio-recorder
sudo apt-get update
sudo apt-get install audio-recorder

Aipatu formatu guztiak erabili ahal izateko egiazta ezazu plugin hauek instalatuta dituzula:

sudo apt-get install gstreamer0.10-plugins-base gstreamer0.10-plugins-good gstreamer0.10-plugins-ugly gstreamer0.10-plugins-ugly-multiverse gstreamer0.10-plugins-bad gstreamer0.10-plugins-bad-multiverse

Aplikazioaren launchpad-orria.
Iturria Web upd8

LibreOfficerako sinonimoen tresna

2011-09-27T14:41:00.000+02:00

UZEIk plugin bat sortu du LibreOffice eta OpenOfficen sinonimoak kontsultatu eta erabiltzeko.

Linuxerako bertsioa instalatu nahi baduzu aski duzu bertan klik egin eta aukerak agertzean LibreOffice edo OpenOfficekin irekitzeko esan; gehigarriaren instalazioa onartu eta bukatzean aplikazioa itxi eta ireki berriro. Oneiric-en aurrekoetan arazorik ez baina Ubuntu 11.10ean ez dut lortu instalatzea.

Albistean sakondu nahi baduzu Sustatura jo. Windowserako bertsioa edo Word-ena nahi baduzu hemendik jaits dezakezu.

Nola instalatu Java JRE Ubuntun

2011-09-27T11:58:00.000+02:00

Mezu honetan azalduko dut nola instalatu Oracle (Sun) Java JRE, batez ere Geogebrako appletak ikusteko arazoak dituzuenentzat -edo antzekoak-.

Oracle (Sun) Java Runtime Enviroment (JRE) ez dago Ubuntu 10.04ko softare biltegi ofizialetan software librea ez delako. Horren ordez OpenJDK paketea eta IcedTea plugina instalatzen dira. Orokorrean ondo dabiltza baina Geogebraan oinarritutako appletak ibiltzeko arazoa dute. Aipatu arazoa edo antzekoa baduzu horrela egin dezakezu JRE instalatzeko eta OpenJDK kentzeko. Administratzailelea izan behar duzu.

1- Canonical-en kideen biltegia aktibatu: Sistema > Administrazioa > Sinaptic > Ezarpenak > Biltegiak > Beste softwarea eta bertan aktiba ezazu lehenengoa den Canonikal-en kideak. Leihoa itxi eta eguneratuko dugu.

2- Terminal batean instalazioa egingo dugu ondokoa exekutatuz.

sudo apt-get install sun-java6-jre sun-java6-plugin sun-java6-fonts

Instalazio baldintzak onartu behar dira (tabuladorez pasa).

3- OpenJDK eta IcedTea plugina instalatuta baditugu berauek kentzeko, terminalean hau exekutatu:

sudo apt-get remove --purge openjdk-6-jre

Orain Geogebrako appletak frogatu nahi baduzu Manuel Sadaren orria erabil dezakezu.

Zenbat pixel? Zer kolorekoak? Screen Ruler eta Gcolor2

2011-09-24T17:02:00.000+02:00

Kaptura Byzazn aplikazioarekin egina.

Linuxen bi tresna txiki aurkeztu nahi dizut.

Screen Ruler

Aplikazio honek leiho, zutabe, ikono, irudi edo ordenagailuko pantaila beraren neurria hartzen lagunduko dizun erregela da. Eskuineko izkinan hobespenak aldatzeko botoia duzu; bertan klika eginez erregela zutitu edo etzan, eta neurria pixeletatik, zentimetro, hazbete, pika, puntu edo ehunekora pasatzeko aukera duzu.

Instalatzeko Ubunturen software-biltegitik egin dezakezu edo terminalean hau exekutatuz:

sudo apt-get install screenruler

Gcolor2

Aplikazio honen bidez pantailako edozein pixelaren koloreari buruzko informazioa ematen dizu, besteak beste kolorearen osagaiak RGB -gorri, berde, urdin- sisteman eta kolorearen izena (sistema hamaseitarrekoa). Irudi bat editatzen ari bazara eta pantailako edozein pixelaren kolorea erabili nahi baduzu egin klik aukeragailuan -picker- eta hauta ezazu gogoko pixela, kopia ezazu kolorearen izena -color name- eta itsatsi koloreztatzeko tresnan. Programa batzuk badute (Gimp, Pinta..) beste batzuk ordea ez (Inkscape, Libreoffice Draw...).

Instalatzeko Ubunturen software-biltegitik egin dezakezu edo terminalean hau exekutatuz:

sudo apt-get install gcolor2

Eskerrak garatzaileei: Ian Mcintosh eta Justin Spadea.

Nola aldatu audio baten erreprodukzio abiadura VLC aplikazioan

2011-09-22T22:19:00.002+02:00

VLC software libreko multimedia erreproduzigailu ezaguna da. Asko erabiltzen da bideo eta DVDak erreproduzitzeko, batez ere formatu eta codec guztiak menpean hartzen dituelako.

Audioak erreproduzitzeko interesgarria da ere; izan ere, play list edo erreprodukzio zerrenda gestionatzeaz gain erreprodukzioa kontrolatzeko hainbat tresna ere eskaintzen ditu. Gaur ikusiko dugu nola alda daitekeen erreprodukzio-abiadura.

Zertarako azkartu edo moteldu erreprodukzioa? Demagun instrumentu bat jotzen duzula eta diskoarekin batera jo nahi duzula baina oraindik ez duzula pieza menperatzen eta ihes egiten dizu; edo atzerriko hizkuntza ikasteko audioa aditzen ari zara baina zure burmuinaren prozesamendu abiadura indigenen hizketa abiadura baino txikiagoa dela.

VLC erreprodukzio abiadura kontrolatzeko aukera ematen dizu. Lehenik eta fitxategian eskuin klik egin, "ireki honekin" klikatu eta VLC media player hautatu. Erreproduzitzen hasita moteltzeko -edo azkartzeko- hiru modu daude:

a- + eta - tekla zapalduta azkartu eta motelduko da erreprodukzioa proportzio hauetan : ...0.33, 0.50, 0.67, 1, 1.50, 2.00... (1 erreprodukzio abiadura arrunta dela).

b- Menuan Irakurketa atalean dugu abiadura azkartu eta moteltzeko aukera. Azkarrago eta azkarrago aurreko puntuan aipatutako jauziak egiten ditu, "zehatza" esaten duena 0,10 puntuko aldaketak egiten ditu, txikiagoak alegia.

c- Egoera barraren eskuinean, bolumenaren ezkerrean agertzen den zenbakia erreprodukzio abiadura erakusten du. Bertan klik eginez gero abiadura aldatzeko barratxo bat agertzen da.

VLC instalatu behar baduzu jakizu hiru sistema nagusietarako bertsioak dituela. Ubuntun Software-biltegitik instala daiteke. Euskarako bertsioa badago ere uste dut oraindik ez dagoela biltegi ofizialean; Ubuntun euskara daiteke honela.

LibreOficce-k gehigarri eta txantiloien biltegia sortu du

2011-09-19T17:18:00.000+02:00

Gehigarriak (edo hedapenak) aplikazioen kapazitatea zabaltzen duten programatxoak dira. Ohituak ginen gehigarrien bidez nabigatzailea tuneatzen; Thunderbird ere gehigarri interesgarriak eskaintzen ditu. Orain LibreOffice gehigarriak era zentralizatu batean eskaintzeko orria sortu du: Extensions Center.
Bestetik txantiloi-biltegia ere sortu dute: Template Center. Txantiloiak osatzeko idazki egitura aurrefabrikatuak dira.

Bien egitura eta bilaketa tresnak txukunak eta ondo egituratuak ematen dute, baina horixe da, oraingoz, dena zeren eta euren edukia oraindik urria da (9 gehigarri eta 33 txantiloi).

Gehigarrien artean batek tilin egin dit: Gallery of dangers sings, galerian arrisku seinaletika oso bat txertatzen duena. Instalatzeko hemendik jaitsi, gorde eta gero LibreOfficen egin Tresnak > Hedapenak > Gehitu... bilatu eta ireki jaitsitako fitxategia eta gero erabiltzeko... begira azpiko animazioari.

Oso interesgarria iruditu zait, batez ere lantokietako arrisku-prebentzioan ardura dutenentzat.

Frantziako gobernuak gardentasuna eta formatu libreen erabilera sustatuko omen du

2011-09-15T23:36:00.000+02:00

Frantziako Aurrekontu, Kontu Publiko eta Estatuko Erreformaren ministro eta gobernuko bozeramaleak datu publikoen zabaltzeaz eta data.gouv.fr atariaren sortzeaz dokumentu bat aurkeztu du.

Dokumentu horren arabera interneten erabilerak bultzatu du datu publikoen zabaltzea, datu hauek libreki eta dohainik berrerabili ahal izateko. Zabaltze horrek zerbitzuaren kalitatea handitzeaz gain erabiltzaileek instituzioetan duten konfiantza indartzen du. Horretaz gain zabaltze horrek onura ekonomikoak ekarriko omen du berrikuntza eta enplegua sustatuko baitu.

Dokumentu honen bidez gobernuak administrazio osoa gonbidatzen du datu publikoak zabaltzen data.gouv.fr plataformaren bidez, horretarako formatu libre eta irekiak erabiltzen.

Jatorrizko informazioa: http://www.gouvernement.fr/gouvernement/la-mise-a-disposition-des-donnees-publiques

Aurkezpenak.net zure aurkezpenak igotzeko tokia

2011-09-15T17:09:00.001+02:00

Mikoleta euskara elkarteak eta Bitarlan zerbitzu enpresak Aurkezpenak.net webgunea plazaratu dute. Web-zerbitzu hau Slideshare.com-ekin lotua dago eta aurkezpenak igotzeko eta zabaltzeko aukera ematen du. Odp, ppt, pdf... formatuko aurkezpenak igotzeko erregistratu behar da, aurkezpenak ikusi eta deskargatzeko ez.

Ikusi
Postaz bidali, estekatu...
Pantaila osoan ikusi
Kaptsulatu zure web orria edo blogean.
Erregistratu eta saioa hasi (aurkezpenak igotzeko).
Aurkezpenak atalka.
Aurkezpenaz etiketen arabera.

Oso itxura oneko zerbitzua euskarazko aurkezpenak ipintzeko eta bilatzeko.

Nola ikusi bideoak Gthumb aplikazioan

2011-09-14T00:19:00.000+02:00

Gthumb irudiak ikusteko eta haien gainean edizio txikiak egiteko aplikazioa da. Ubuntuk lehenesten duen irudi-gestorea Shotwell da orain, lehen F-Spot.

Nire gogokoa Gthumb da besteak beste ez zaituelako behartzen irudiak katalogatzen eta irudiaz gain bideoak ere ikus daitezkeelako eta nik argazkien artean bideotxoak tartekatzen ditut sarritan.Frogatu nahi baduzu Ubuntun software-biltegitik instala dezakezu. Irudien ikustaile moduan lehenesteko irudi fitxategietan (jpeg, png, gif...) egin ireki honekin eta Gthumb markatu.

Kontua da bideoak ikusteko VLC instalatu nuenean Ubunturen film-erreproduzitzaile lehenetsia -Totem- desinstalatu nuela eta ordutik Gthumb-ek ez zituen bideoak erakusten. Gthumb-ekin bideoak ikusi ahal izateko hiru gauza behar dira:
- Totem instalatua.
- Bideoak erreproduzitzeko scripta aktibatuta. Gthumb-en Editatu > Hobespenak > Hedapenak

- Beheko aldeko erakutsi dialogoan Pertsonalizatu jarri eta irekitzen den koadroan markatu behar da fitxategi denak edo, gutxienez, Multimedia fitxategiak.

Horrela argazkien artean dauden bideoak ikusi ahal izango dituzu.

Gora Jaizkibel

2011-09-09T00:42:00.000+02:00

Jaizkibel konpainiak beste behin egin dio aurre tradizionalismo matxistak jarritako oztopoei aldarrikatuz emakumeek, lanean eta ikasketetan bezala, jaietan parte hartzeko gizonen haina eskubide izan behar dutela.

Gora zuek!

Nola sinkronizatu Thunderbirden egutegia eta Google Calendar

2011-09-09T00:08:00.000+02:00

Lightning da Thunderbirden egutegia. Ez dator instalatuta posta bezeroarekin baina erraz eransten zaio Tresnak > Gehigarriak > Lighning bilatu eta instalatzeko esanda.
Behin instalatuta komeni da sinkronizatzea interneteko egutegi batekin, hartara batetik Thunderbird hainbat ordenagailutan badugu (etxean, lanean, elkartean...) denak sinkronizatuta izango ditugu, eta bestetik gurea ez den ekipo batean bagaude gure egutegia kontsultatu eta editatu ahal izango dugu web bidez.
Hori lortzeko hainbat web-egutegi daude. Lehengo batean Icalx.com bidez nola sinkroniza daitekeen azaldu nuen mezu honetan.
Gaur azalduko dut nola sinkronizatu Thunderbird-Lighning eta Google Calendar.
Lehenik eta behin Thunderbirden Google Calendar Hornitzailea gehigarria instalatuko dugu (Tresnak > Gehigarriak > Eskuratu gehigarriak).
Interneteko nabigatzailean Google Calendar orrira joango gara. Sartu eta eskuineko goiko iskineko gurpil horzdunean klik egin eta egutegiaren ezarpenetan sartuko gara (calendar settings), bertan bigarren fitxan, alegia Calendars fitxan, sartuko gara eta zerrendan gure egutegia hautatuko dugu. Irekitzen den fitxan Calendar Adress atalean honelako ikur multzoa ageriko da:

XML ikurrean klikatu eta agertzen den gure egutegiaren helbidea kopiatuko dugu.
Ondoren Thunderbirden egutegiaren fitxa irekiko dugu, ezkerreko panelean eskuin klik egin eta egutegi berria sortuko dugu:

Galdetuko digu ea gure ordenagailuan ala sarean nahi dugun, sarekoa eskatuko diogu eta aurrera. Ondorengo aukeretan Google Calendar markatuko dugu eta Helbidearen leihoan GCalendarren kopiatu dugun helbidea itsatsiko dugu. Izena eta koloreak hauta eta prest lanerako.
Lehen esan bezala Thunderbird hainbat ekipotan badugu guztietan errepikatuko dugu operazioa haien artean sinkronizatzeko. Thunderbird ez dugun ekipo batean bagaude Google Calendarren bidez kontsultatu, sortu eta editatu ahal izango ditugu gure hitzorduak.

Nola irakurri eta berrerabili Accessen MDB datu base baten datuak Linux sisteman

2011-09-03T08:18:00.001+02:00

Lehenik eta behin azaltzea ez dudala modurik ikusi inportatzeko Accessen .mdb base bat LibreOffice edo OpenOfficera Linuxen. Windowsen bertsioek inportazioa, mugekin bada ere, egin dezakete baina Linuxen ez. Beraz, aritu naiz bilatzen .mdb fitxategi baten taulen datuak, datu-baseak eskaintzen dituen hainbat aukera galduta bada ere, nola berrerabili.

1. urratsa: mdb fitxategiaren datuak ikusi eta testu formatuan esportatu.
Horretarako MDB Viewer aplikazioa erabiliko dugu. Ubuntun instalatzeko software-biltegitik egin dezakezu. Behin instalatuta .mdb fitxategia irekiko dugu. Datu basea osatzen dute elementuak ikusi ahal izango ditugu: taulak, kontsultak, formularioak, txostenak, makroak eta moduluak.

Behin irekita data-basearen taulak ikusiko ditugu.

Taula bat hautatuta ezkerreko botoiekin posible dugu ikusi haren eremuen ezaugarriak eta datuak baina, erne, datuok berrerabiltzeko testu moduan esportatu behar ditugu eta azpiko taulako ezaugarriak galduko dituzte.

Taulen esportazioari ekingo diogu. Taula bakoitzeko fitxategi bat sortuko du. Karpeta eta izena zehaztu behar dugu. Izenean .txt luzapena jartzea komeni da.

2. urratsa: Libreofficekin sortutako taulak inportatu.

LibreOffice abiatuko dugu (instalatuta ez badago Ubuntun software-biltegitik eskura dezakezu). Araka ezazu esportatu dituzun .txt fitxategien karpeta, ireki eta datu-baseari izen bat jarri. Une batean datu base erregistratzea eskainiko digu eta baietz esango diogu. Karpeta horretan dauden .txt fitxategiak datu-basearen taulak bihurtuko ditu, hori bai, taulen arteko harremanik ez dago, taula horien eremu guztiak character edo testu eremuak dira eta ezin dira erregistro gehiago erantsi. Muga horien barnean datu-basea erabili daiteke kontsultak, formularioak eta txostenak egiteko.

Muga horiek ikusita aukera bat da interesatzen zaizkigun taulekin kalkulu orriak egitea. Orri horiek, datu-pilotoa dutela datu-base bera baino erabilgarriagoak izan daitezke. Taulatik abiatuta kalkulu-orria datu-pilotodunak egiteko horrela joak dezakegu:

kalkulu orri berri bat ireki.
Datuak > Datu-pilotua > Hasi > LibreOfficen erregistratutako datu-iturburua > Datu-base atalean sortu berri duzun datu-basea hauta; Datu-iturburuan kalkulu orria bihurtu nahi duzun taula aukeratu eta Mota atalean Orria hauta. Hurrengo leihoan kalkulu orrirako interesatzen zaizkizun eremuak ezkerreko zutabera eraman interesatzen zaizun ordenan. Ados

Sortzen den kalkulu orria datu-pilotuak ditu, alegia, errenkadetan iragazkiak aplikatzen ahal ditugu.

Datu-pilotuaren bidez datuak iragazten ahal ditugu. Adibidean herri herri edo auzo batzuetakoak iragazten ahal ditugu, jangelara doazenak eta abar.

Mugipuzkoa: planifikatu zure bidaiak garraio publikoan

2011-08-26T19:32:00.001+02:00

Gipuzkoan barna bidaiatu behar baduzu Mugipuzkoa.com zure bidaia garraio publikoan egiteko laguntzen ahal dizu esanez zein autobusa edo trena, non eta zein ordutan duzun (gutxi gora behera).

Oiartzundik Donostiako ospitalera hilaren 27an arratsaldeko bosterako.

Demagun Oiartzunen bizi zarela eta lagun bati bisita egin nahi diozula Donostiako Ospitalera bihar arratsaldeko 5etetarako. Google Mapsen oinarritzen den orrian nondik eta nora idatzi (edo A eta B) markak mugitu, eguna zehaztu -ordutegiak aldatzen dira egunaren arabera- eta zein ordutarako egon behar zaren. Lortu jarraibideak sakatu eta berak erakutsiko dizu mapan geltokiak eta bidea eta ezkerreko panelean zein autobusa edo trena zein ordutan hartu eta zein ordutan iritsiko zaren. Gure kasuan hiru aukeretan hoberena Oiartzunen Ekialdebus 02 linea hartu 16:12etan eta Pasai Antxoko Eskalerilletan aldaketa egin Ekialdebus 07 autobusera eta 5 minutuko ibilalditxo bat maternora joateko. 40 minutuko garraioa eta 16:53rako helmugan egongo zara.

Oso orri bisuala eta praktikoa. Itxuraz aldagai asko kontuan hartzen duena.

Webgune berean beste fitxa batean Ordutegiak kontsultatzen ahal dugu herriak, geltokiak eta datak zehaztura. Beste fitxa batean Androiderako bertsioa jaisteko aukera ematen du.

Ekimena Gipuzkoako Garrioaren Lurralde Agintaritzarena da. Ea Udalbiltza non jartzen dugun martxan eta ekimen hau Euskal Herri osora zabaltzen den.

Ubuntu: nola instalatu Google Earth

2011-08-26T15:25:00.003+02:00

Google Earth lurra eta unibertsotik nabigatu eta mota guztietako informazioa biltzeko aukera ematen duen aplikazioa Ubuntun instalatzeko lehenik eta behin berak erabiltzen duen letra mota instalatzea komeni da, terminalean ondoko agindua itsatsi eta exekutatu:

sudo apt-get install lsb-core ttf-mscorefonts-installer

Ondoren Google Earth-en deskarga orrira joan eta zure sistema eta ekipoari dagokion bertsioa hautatu eta onartu. Honek azken bertsio egonkorra jaitsiko du.

Ubunturen kasuan nahikoa da jaitsitako fitxategiaren gainean klik bikoitza egin eta software biltegia arduratuko da instalazioa egiten.

Gnomeren mahaigain klasikoa Ubuntu 11.10ean.

2011-08-26T01:56:00.001+02:00

Ubuntu 11.10 Oneiric Ocelot Unity erabiliko du mahaigain lehenetsi moduan eta Unity 2D bigarren aukera bezala. Gnome Shell instalatu ahal izango da eta bat Gnomeren mahaigain klasikoa.

Gnomeren mahaigain klasikoa 11.10ean.

Gnomeren mahaigain klasikoaren instalazioak "gnome-session-fallback" izena izango du eta Software biltegitik, Synapticetik edo terminaletik instalatu ahal izango da: sudo apt-get install gnome-session-fallback

Instalatu ondoren saioa itxi behar da eta saioa hasteko pantailan erabiltzailea hautatu ondoren "GNOME Classic" hautatu eta barrura.

Maila pertsonalean irtenbide ona izan daiteke Unity eta Gnome Shell gogoko ez dugunontzat baina elkarte, enpresa eta erakundetan mahaigainaren gaineko gorabehera hauek ez dute irtenbide errazik.

Linux: nola sortu eta erabili ssh zerbitzari bat

2011-08-24T23:30:00.000+02:00

SSH (Secure Shell) Linuxpeko ekipoen artean informazioa bidaltzeko protokolo eta programa da.

Ni hasi naiz erabiltzen etxeko mahaigaineko ekipoko karpetak eta fitxategiak netbook edo portatil txikiarekin erabili ahal izateko bai etxean -mahaigainekoa beste norbait erabiltzen ari denean- bai etxetik kanpo. Bi ekipoak Linuxean.

Nola jarri martxan zerbitzaria eta nola eskuratu fitxategiak bezero-ekipotik.

Informazioa zerbitzatu behar duen ekipoan -nire kasuan mahaigainekoan- openssh-server programa instalatu behar da, Ubunturen kasuan software-biltegian dago. Demonio bat da; ekipoa piztu eta martxan jartzen da gu ezer sumatu gabe.

Zerbitzariko karpetak bezerotik -nire kasuan netbooketik- ikusi ahal izateko bi modu daude, gutxienez:

Ubuntu klasikoan egin Lekuak > Konektatu zerbitzariarekin...> zerbitzu motan SSH aukeratu, zerbitzaria atalean zerbitzariko IPa eta zerbitzariko zure erabiltzaile-izena. Zerbitzariko IPa jakiteko terminalean ifconfig komandoa exekutatu eta bigarren lerroan inet addr: ondoan azalduko zaizu. Kontuan izan ISP edo interneteko hornitzaile gehienek emanten duten IPak behin behinekoak direla, beraz, noizean behin ekipoaren IPa aldatzen da.

Beste era Linux guztietarako balio du -Unityn esate baterako Konektatu zerbitzariarekin aukera ez dago-. Fitxategien arakatzailean sartu -Nautilus, Dolphin edo dena den- eta fitxategiaren helbidean -Nautilusen editatu ahal izateko Ctrl+L egin behar da- idatzi: sftp://125.4.201.128 (nik jarritako IParen ordez zure zerbitzarikoa jarri);

lehenengo aldia ezin duela kontaktatu esaten du baina zuk aurrera segitzeko eta zerbitzarian duru erabiltzaile-izena eta pasahitza eskatuko dizu, arakatzailean laster-marka bat sortuko du -paneleko Lekuak ataletik eskuragarri- eta mahaigainean saiorako abairazle bat sortuko du.

Lekuak atalean zerbitzarirako laster-marka -finkoa- eta mahaigainean behin behineko abiarazlea.

Kito. Urrats gutxi batzuekin muntatu dugu zerbitzari bat etxean.

Nola irakurri dokumentu luzeak portatil batean

2011-08-19T17:19:00.000+02:00

Dokumentu luzeak ordenagailu batean irakurtzea nekagarria da, batez ere netbook edo portatil txikia bada. Konponbide bat izan daiteke ordenagailuan dokumentuak e-bookerako formatu batean irakurtzea, hala nola epub. Zein da diferentzia nagusia? odt edo pdf paperaren forma zurruna dute, letra handiago ikusteko zoom egin behar dugu eta lerroa pantailatik kanpo ateratzen da batez ere pantaila txikietan. E-booketarako formatuan lerroak ez dira finkoak beraz letra handitzean lerroak pantailara egokitzen dira. Bestetik portatil txikietan pdf formatuko irakurtzaileek pantaila 90º biratzeko aukera ematen dute baina nabigazioa konplikatzen da. E-book irakurgailuak, FBReader kasu, letra handitu, testua biratu, orriak pasa, koloreak aldatu eta, oro har, irakurketa errazten dituzten tresnak dituzte.
Beste abantaila bat da testua leihora egokitzen dela eta hori oso ondo etortzen da aplikazio baten manuala eta aplikazio bera aldibereko bi leihoetan ikusteko.

Ezkerreko leihoan Blender, eskuinekoan Blenderri buruzko manual FBReaderrenL bertan ikus daiteke nola testua leihora egokitzen den.

Odt edo pdf dokumentu bat horrelako aplikazio batekin irakurtzeko zein urrats eman dezakegu?
Lehenik eta behin dokumentua bere formatutik odt, pdf... epub formatura pasako dugu.
Formatua odt bada posible dugu Libreoffice-Openofficerako writer2epub gehigarria erabil dezakegu. Edozein modutan Calibre aplikazioa instala dezakegu: plataforma guztietarako bertsioak ditu, bai eta portablea ere eta formatu konbertsioaz gain beste hainbat tresna eskaintzen ditu. Ubuntun software biltegitik instala dezakegu.
Martxan jarriko dugu Aplikazioak > Bulegoa > Calibre. Konbertsioa egiteko:

Dokumentua ireki (onartzen dituen sarrerako formatuak ODT eta PDFz gain: BZ, CBR, CBC, CHM, EPUB, FB2, HTML, HTMLZ, LIT, LRF, MOBI, PRC, PDB, PML, RB, RTF, SNB, TCR, TXT, TXTZ)
Convert individually (bakarra bada edo banaka egin nahi badugu).

Guk sortutako dokumentua bada aurkibide txukun bat edukitzeko atalen tituluei 1. izenburua, 2. izenburua estiloekin markatuko ditugu eta Calibrek aurkibide txukuna egin dezan Estruktura Detekzioa atalean azpiko irudian laranjaz markatutakoa ezabatu beharko dugu.

Gainerako zehaztasunak begiratu ondoren OK egingo dugu epub formatura konbertitzeko (beste irteerako formatuak: FB2, LIT, LRF, MOBI, HTMLZ, PDB, PML, RB, PDF, RTF, SNB, TCR, TXT, ZIP).

Calibrek berak badu aplikazio bat epub formatuko dokumentuak irakurtzeko baina egokiagoa iruditu zait FBReader aplikazioa. Windowserako bertsioa ere badu. Ubuntun software biltegitik instala dezakegu.
Instalatu ondoren Aplikazioak > Bulegoa atalean azalduko da E-book reader izenarekin. Aldez aurretik epub formatura konbertitu dugun fitxategia (edo deskargatu dugun beste edozein) netbook batean eroso irakurtzeko aurrena (1) dokumentua irekiko dugu (2) ezkerretara 90º biratuko dugu eta (3) fondo beltza eta letra zuriak jarriko ditugu.

Fondo beltza Colours fitxan:

eta letra zuria:

Styles fitxan letra-tipoa eta tamaina alda ditzakezu. Margins fitxan margenak txikitu ditzakezu.

Laster teklak
Pantaila osoa Enter,
Orria pasatzeko AvPag
Aurkibidea ikusteko C
Beste laster teklak eta ezarpenetarako laguntza orri honetan.

Ubuntu: nola bertsio berritu Firefox 6 eta Thunderbird 6 bertsiora.

2011-08-18T01:04:00.001+02:00

Mozilla Fundazioak bertsioak berritzeko sistema berriaren arabera -6 astetan behin bertsio berria ateratzea- Firefox eta Thunderbird-erako bertsio berriak atera ditu, 6garrenak.
Ubuntu oso kontserbadorea da aplikazioen bertsio berritzeekin eta asteak pasa daitezke bere eguneraketetan sartu arte. Bertsio berritzea oraintxe egin nahi baduzu Mozillaren PPA edo software biltegiak partikularrak instalatu behar dituzu eta ondoren Ubunturen eguneraketa egin.

Firefoxen PPA instalatzeko ireki Terminala, kopiatu, itsatsi eta exekutatu:

sudo add-apt-repository ppa:mozillateam/firefox-stable

Thunderbirden PPA instalatzeko:

sudo add-apt-repository ppa:mozillateam/thunderbird-stable

Ubuntu eguneratzeko:

sudo apt-get update
sudo apt-get upgrade

Berrabiaraztean ingelesez agertzen bada hizkuntza fitxategia instalatu beharko duzu:

sudo apt-get install firefox-locale-eu

Bertsio berrietako aldaketa nagusiak zein diren Librezaleen orrian kontsulta daitezke: Firefox eta Thunderbird.

Ubuntu: nola ezabatu CD-RW edo DVD-RW baten datuak berrerabili ahal izateko

2011-08-15T22:53:00.003+02:00

CD-RW eta DVD-RW behin eta berriz erabili daitezkeen diskoak dira zeren eta euren datuak ezaba daitezke. Nola ezabatu berridazgarria den disko baten datuak Ubuntun?

1- Terminaletik:

umount /dev/cdrom
cdrecord dev=/dev/cdrom blank=fast

2- Brasero erabiliz:
Tresnak > Hustu

3- K3B erabiliz:
Tresnak > Formateatu/Ezabatu disko berridazgarria

Lore urdinen izena

2011-08-12T00:07:00.000+02:00

Lore beltzik ez dut topatu, beraz, hau da segidako azken bideoa. Lore urdinei buruzko informazio gehiago hemen: http://loretan.weebly.com/lore-urdinak.html

Lore gorrien izenak

2011-08-10T23:14:00.000+02:00

Segidako azken aurrekoa. Informazio gehiago http://loretan.weebly.com/lore-gorriak.html

Tile Tabs Firefoxen bi fitxa batera ikusteko gehigarria

2011-08-10T00:14:00.000+02:00

Tile Tabs (fitxen mosaikoa) gehigarria hemendik instala daiteke. Behin instalatuta fitxa batean eskuin klik egin eta fitxa guztiak batera ikusteko aukera ematen du bertikalki edo horizontalki banatuta. Fitxetako bi ikus daiteke batera edo fitxa bat bikoiztu eta bi tiratan ikusi edo...
Fitxak leheneratzeko posibilitatea ematen dutile

Bereziki interesgarria iruditzen zait zerbait idazten ari bagara fitxa batean, dela web-postan, blogean, G-docs-en edo eta beste web bat erreferentzia moduan erabili behar dugunean.

Ubuntu: Firefox 5 euskaratu

2011-08-09T19:49:00.000+02:00

Lehengoan Firefox 5 instalatu nuen eta ingelesez agertu zitzaidan. Euskaratzeko honako hau egin behar izan dut:

sudo apt-get install firefox-locale-eu

Hori eginda irekitzen duzun hurrengoan aplikazioa euskaraz agertzen da.

Lore berdeen izenak

2011-08-07T22:25:00.003+02:00

Berdea ez da, logikoa denez, loreen kolorerik gogokoena. Loreek, erreprodukzio organoak direnez gero, intsektuak erakarri behar dituzte polena zabaltzeko eta berdea ez da horretarako kolorerik egokiena. Edozein modutan izan badira eta ez hain gutxi; web honetan mordo bat ikus daiteke.

Bestetik bideoko irudi gehienak lorerik ez duten landareenak dira. Goroldioak, ekisetoak eta iratzeak esporen bidez hedatzen dira. Helburu nagusia landareen izenak ezagutzea denez eta inguru honetan lore berde gutxi topatu dudanez tokitxo bat egin diet esporadunei.

Mezua prestatzeko dokumentatzen ari nintzela landareen sailkapenaz oso eskema argigarria topatu dut Plantamer blogean. Creative Commons lizentzia duenez erositako prezio berean eskaintzen dut hemen:

Lore horien izenak

2011-08-06T21:41:00.001+02:00

Atzo hasitako seriari segida emanez, Alaitz alabak lore horiekin egindako bideoa da hau.
Izenak ikusteko orri hau komeni da ikustea: http://loretan.weebly.com/lore-horiak.html

Lore zurien izenak

2011-08-05T23:32:00.005+02:00

Loreei buruzko web orri bat sortu nuen, http://loretan.weebly.com, pretentsio txikiekin, inguruko basa-loreen izenak ikastea. Argazkiak atera, identifikatu eta web orrian jarri; koloreen arabera sailkatuta bilaketa errazteko.

Helburu berarekin bideo batzuk editatuko ditut eta hau da seriearen lehenengoa, lore zuriena.

Planteamendua hau da, http://loretan.weebly.com/lore-zuriak.html orrian izenak ikasi eta bideoa ikustean -lore bakoitza bi segundo agertzen da izenik gabe eta beste bi izenarekin-, jakina, izena agertu aurretik asmatzea da.

Edizioa OpenShot bideo-editoreaz egin dut eta musika Jamendo.com orritik eskuratu dut.

gSharkDown GrooveShark-en musika entzun eta jaisten duen aplikazioa

2011-08-03T15:59:00.006+02:00

Beste buelta bat GrooveShark inguruan. Aurreko mezu batean komentatu nuen Firefoxen gehigarri bat orri horretatik musika jaisteko. Gaurkoan aplikazio bat ekarriko dut, gSharkDown. Pieza, artista edo albuma bilatu; topatzen dituenen artean nahi ditugun abestiak gura dugun ordenan entzun-zerrendara eraman eta erreprodukzioa agindu dezakegu. Baten bat jaitsi nahi baduzu hauta eta deskarga dezakezu.

Nola instalatu eta erabili Ubuntun edo Debian-en oinarritutako beste distribuzioetan:

sudo add-apt-repository ppa:ferramroberto/gsharkdown sudo apt-get update sudo apt-get install gsharkdown

Piezaren bat jaitsi nahi baduzu inportantea da zehaztea ezarpenetan zein karpetara jaitsi behar duen. Horretarako ikonoetan giltza ingelesean klika eta zehaztu karpeta.

Estatu Batuetako zorra iruditan

2011-08-03T15:03:00.001+02:00

Asteleheneko akordioaren harira hona ekarri dut AEBetako zorraren tamainaren ideia grafikoa ematen duen esteka bat. Estatuko zorra 14,3 bilioi (EABeko trilioi) dolarrekoa da; zor pribatua, alegia partikular eta enpresena, erantsita 114,5 bilioi dolarrekoa.

http://usdebt.kleptocracy.us/

Granola ordenagailuaren kontsumoa jaisteko programa

2011-08-02T15:14:00.007+02:00

Granola PUZ edo prozesadorearen elektrizitate kontsumoa jaisten duen aplikazio bat da. DVFS teknologia erabiltzen du (tentsio dinamikoa eta maiztasunaren eskalatzea); haren bidez prozesadoreen maiztasuna haren lanari egokituta kontsumoaren murrizketa interesgarria lortzen omen du -%30 artekoa hornitzaileak dioenez-. Ekipoaren errendimenduan ez da inolako jaitsierarik sumatzen -duela hiru aste instalatu nuen-. Portatiletan baterien iraupena luzatzen da.
Interfaze grafiko txiki bat du aurreztearen berri ematen duena, kontsumoan, dirutan eta CO2an.
Windows eta Linuxerako bertsioak daude.

Ubuntun instalatzeko hauek dira hurrenez hurren terminalean exekutatu beharreko aginduak:

sudo apt-get install apt-transport-https

wget https://download.miserware.com/linux/deb/ubuntu/natty/miserware-repo-latest.deb
sudo dpkg -i miserware-repo-latest.deb

sudo apt-get update
apt-cache search MiserWare

sudo apt-get install granola

sudo apt-get install granola-gui

Jakin nahi duzu ekipo batean granola zerbitzua dagoen? Egin sudo ls /etc/init.d eta zerrendan agertzen bada zerbitzua badago.

Kuriositatez kontsultatu dut zenbat kontsumitzen duen ordenagailu batek eta hemen jarriko ditut hainbat datu orientatzaile:

Mahaigaineko baten osagaiak:
PUZ:                             40W - 125W
Oinarrizko plaka: 10W
Haizagailu bakoitzak: 5W
Txartel grafikoa:        20W - 50W
Elikadura iturria:       10W
Disko gogorra:           5W - 10W
CD-ROMa:                3W - 6W

CRT monitorea:            70W - 110W LCD monitorea:            30W - 40W

Bozgorailuak:               10W - 30W

Bideratzailea:               5W - 10W
ADSL modema:        5W - 10W  Ekipo portatilek 15W - 45 W
Nire ekipoaren kasuan prozesadoreak 95W kontsumoa du; aplikazioaren datuen arabera 40 W gutxiago gastatzen omen du orduko.

iturriak: el atareao eta taringa

Libreoffice Openoffice Base apunteak

2011-07-30T00:31:00.000+02:00

Base da datu baseak kudeatzeko Libreoffice eta Openoffice paketeen aplikazioa. Askoren ustez pakete hauek atalik flojoena, Microsoft Access-ekin alderatuz gero behintzat. Edozein modutan bere lana txukun betetzen du eta elkarte eta enpresa txikientzat non sarritan datuak kalkulu orrien bidez kudeatzen diren kontuan izateko tresna da, batez ere txosten dinamikoak, etiketak, gutun pertsonalizatuak eta antzeko lanak egiten badira.

Batxilergoko ikasleentzat prestatutako apunteak dira hauek. Datu base erlazionalei buruzko oinarrizko kontzeptu batzuk definitu ondoren guztiz praktikoak diren atalak osatzen dute gainerakoa.

Bertan duzu ikusi, inprimatu eta deskargatzeko aukera.

Firefoxetik nola deskargatu Grooveshark-eko musika

2011-07-28T19:01:00.002+02:00

Lehengo batean Grooveshark orriaren berri eman nuen zeinean musika bilatu eta entzun daitekeen; beste batean letrak ikusteko gehigarri baten berri eman nuen. Bada, orain Firefox erabiltzen baduzu posible duzu instalatu Groove Shredder gehigarria eta GrooveShark orritik abestiak mp3 formatuan deskargatu.

GrooveShark-en orria eskuinean abestiaren letra eta gezi puntan deskargatzeko botoia

Nola erabili Windows-en CD-ROMak Ubuntun

2011-07-26T18:00:00.001+02:00

CD-ROM asko tamalez soilik Windows-en erabiltzeko eginak daude, Ikastolen Elkartekoak adibidez. EXE fitxategi bat exekutatuz abiatzen dira. CD-ROM hauek ikusteko aski zen Wine instalatzea eta horren bidez ikustea baina Ubuntun, Lucid (10.04) bertsiotik hasita, ezin dira exekutatu ekipotik kanpoko programak eta horrek tarea konplikatzen du. Ikus dezagun nola peleatu .exe horiekin.

Lehenik eta behin bereizi behar dugu instalatu gabe aplikazioa martxan jartzen duten .exe fitxategiak eta .exe intalatzaileak. Batzuetan, azpiko irudiaren lez, biak agertuko dira.

Ttantto aplikazioa martxan jartzen duena eta Ttantto disko gogorrean instalatzen duen setupa.

Aplikazioa martxan jartzen duen .exe badago nik ondoren azaltzen dudan sistema gomendatzen dizut. Soilik instalatzailea badago mezuaren bukarean emango dizut sistema egokia instalazioa burutzeko.

1. urratsa: ISO irudia prestatzea.
ISO irudia egitea CD edo DVD baten informazioa fitxategi bakarrean gordetzea da.
CD edo DVDa grabagailu unitatean sartu eta Brasero (Aplikazioak > Soinu eta Bideoa > Brasero) martxan jarriko dugu.
Diskoak kopiatzea aukera hauta eta bertan Disko berria beharrean Irudi fitxategia hauta ezazu. Propietateetan sartu eta jarri izen egoki bat irudiari, irudia gordetzeko tokia adierazi (eskolan zerbitzariko karpeta batean CD-DVD irudiak karpeta sor dezakezu) eta beheko Disko-irudi mota atalean hauta ezazu ISO9660irudia formatua; Itxi; Sortu irudia.

Braserori kopia ISO fitxategi batean egiteko agintzen

2. urratsa: softwarea.
Bi programa eta bere menpekoak behar ditugu. Hauek instalatzeko ireki terminal bat (Aplikazioak > Gehigarriak > Terminala) eta honako hau itsatsi eta exekutatu:

sudo apt-get install wine acetoneiso

3. urratsa: ISOak AcetoneISO-rekin asoziatu.
Grabatu duzun ISO irudira joan arakatzailearekin eta fitxategiari eskuin klik egin eta Propietateak klikatu, fitxetan Ireki honekin klika, agertzen den zerrendan Acetoneiso hauta eta onartu.

ISO irudia AcetoneISO aplikazioari asoziatzen

4. urratsa: esteka bat sortu.
Erabilera erraztu arren ISO fitxategiari esteka bat sor diezaiokegu mahaigainean; horretarako ISO fitxategian eskuin klik egin eta Sortu esteka klika. Sortzen duen esteka ebaki eta mahaigainean itsatsi. Pausu hau CD-ROM bakoitzarekin egin beharko dugu.

Esteka sortzen

5. urratsa: martxan jarri.
Mahaigaineko estekan bi klik eginez bi leiho irekitzen dira: acetoneiso-rena eta CD-ROMaren fitxategiak erakusten diguna. Lehenengoa itxi eta bigarrenean aplikazioa martxan jartzen duen EXE fitxategia bilatu (kontu! ez klika setup.exe baizik eta aplikazioaren izena duena).

CD-ROMaren aplikazioa irekitzen

Sistema honek abantaila bat dauka -denak ez dira nekeak izango- eta zera da, diskoak tiradera batean gordetzen ahal ditugula betiko haren kopia disko gogorrean dagoelako.
CD-ROMen ordez bideo CD edo DVDak badira urratsak antzekoak dira, Wine ez genuke instalatu beharko eta EXEren ordez AVI fitxategia jarriko genuke martxan.

CD edo DVD baten Windows instalatzailea nola jarri martxan.

Zure diskoan .exe bakarra instalatzailea bada, jeneralean setup.exe, exekutatu ahal izateko exekutatzeko baimenik izan gabe Gnometik kanpo egitea da irtenbidea. Wine instalatua eduki behar duzu. Sartu CDa eta arakatzailearekin begira zein den setup.exe fitxategiaren kokalekua. Ondoren ireki terminala (Ctrl+Alt+t) eta idatzi:
wine /media/...eta osatu exe fitxategiaren path edo bidea eta izena. Enter egin eta instalazioa martxan jarriko da.

Ostadar II instalatzeko fitxategia exekutatzeko agindua.

Programa abiatzeko: Wine > Programak...

Math formula editorerako txuleta

2011-07-26T00:50:00.000+02:00

LibreOffice-OpenOffice formulak editatzeko tresna interesgarria dute, Math. Erabiltzeko testu prozesadorean Txertatu > Objektua > Formula egin eta formula editorea irekiko da; marko batean agertuko formula, behean edizio zona dugu eta Elementuak izeneko tresna-kutxa irekitzen da.

Tresna kutxa hori oso praktikoa da formulak noizbehinka idazten dugunontzako baina formulak sarri idazten dutenenei merezi zaie eragile eta funtzioen izenak eta sintaxia ikastea formulak zuzenean editorean idazteko. Ez da saila baina ohitu arte komenigarria izan daiteke laguntza eskura izatea. Horretarako prestatu dut txuleta hau:

Maialen Lujanbio, agur bertsoa

2011-07-25T00:29:00.000+02:00

2009ko Bertsolari Txapelketa Nagusiko Finalean Maialen Lujanbio txapeldunaren agur bertso gogoangarria.

Hemen bideoa eta hitz jokoa.

Celestia, espazioko denbora errealeko 3D simuladorea

2011-07-24T00:38:00.000+02:00

Celestia espazioan nabigatzeko aukera ematen duen aplikazio librea da. Sistema nagusietarako bertsioak daude bere web orrian. Ubuntun software biltegitik instala daiteke.

Hona hemen Celestiarekin nabigatzeko laguntza dokumentua edo gida laburra. Posible duzu pantaila osoan ikusi, jaitsi, inprimatu eta partekatu.

Box.net nola enkapsulatu zure dokumentuak web edo blog batean

2011-07-23T23:52:00.001+02:00

Box.net fitxategiak interneten -lainoan- gordetzeko doako zerbitzua da.

Fitxategiak gordetzeko erregistratu behar da. 5 GBeko edukiera du. Bertan karpetak eta azpikarpetak sor ditzakegu. Bertan gordetako fitxategiak hainbatekin partekatu edo publiko ere egin ditzakegu. Fitxategien gehienezko tamaina 25 MBekoa da eta hilabeteko banda zabalera 10 GBekoa. Baldintza horiek hobe daitezke ordainpeko Premium aukera kontratatuz gero.

Hemen ikusten da nola lor daiteken fitxategi baten kaptsula.

Publiko moduan jarritako fitxategiei estekak zein kapsulak jartzen badiegu web edo blog batean hauek ikusi eta jaitsi ahal dira erregistratu beharrik gabe.

Aspalditik erabiltzen nuen Box.net fitxategiak partekatzeko baina orain arte ez naiz konturatu kapsulak -embeded- egin zitekeenik. Dokumentu bat kapsulatzea ematen du aukera web baten barruan ikusi ahal izateko. Box.net orritik pdf eta Libreoffice-n odf fitxategiak kaptsula daitezke.
Kontua da moskeatuta nengoela Scrib.com zerbitzuarekin zeren eta propaganda pila bat jartzen dute dokumentuaren inguruan eta orrien artean, dokumentua jaisteko erregistratu behar da eta erregistratzeko Facebooken kontua ireki behar da. Jo ta pasa.

Scribd.com ostatuko fitxategi bat jaisteko Facebook-en alta eman behar da.

Hau dela eta erabaki dut Scribd-i agur esatea, hor ditudan dokumentuak ateratzea eta blog honetan jartzea Box.net eskaintzen duen zerbitzuari esker. Datozen egunetan sarrera moduan agertuko dira Scribden nituen dokumentu batzuk.

Bolivia software librearen aldeko legea onartu du

2011-07-23T14:32:00.001+02:00

Boliviako asanbladak telekomunikazioak arautzen dituen legearen barrenean estatuko egitura guztietan software librea eta estandar irekiak lehenesten dituzten artikulu hauek onartu ditu:

ARTÍCULO 77. (SOFTWARE LIBRE).
I. Los Órganos Ejecutivo, Legislativo, Judicial, Electoral y entidades territoriales autónomas en todos sus niveles, promoverán y priorizaran la utilización del software libre y estándares abiertos en el marco de la soberanía y seguridad nacional.
II. El Órgano Ejecutivo elaborará el plan de implementación de software libre y estándares abiertos en coordinación con los demás órganos del Estado y entidades de la administración pública. Lo que implica que el estado comenzara un plan de migración a software libre en todas sus instancias, ahora el siguiente paso es realizar la reglamentación para concretar esta migración.

Migrazioaren lana geratzen zaie orain. Aurrera Bolivia.

Web bideoak jaisteko 4k Video Downloader

2011-07-23T00:47:00.002+02:00

Youtube, Vimeo, Daylimotion eta beste webgunetako bideoak jaisteko nabigadoreak berak hainbat gehigarri ditu, besteak beste Video DownloadHelper erraza eta potentea.
Bestetik eskolako ekipoetan irakasle gehienek gutxi asko web bideoak jaisten dituzte. Hala bada ez du zentzu handirik denek aipatu dudan gehigarria instalatzeak, hobe da halako kasuetan bideoak jaisteko aplikazio bat instalatzea.
Asko dira horretarako dauden aplikazioak; nik 4k Video Downloader probatu dut eta gustatu zait.

Sinplea, bideo-web nagusiak onartzen ditu, sistema eragile nagusietarako bertsioak ditu, software librea da, bideoaren kalitate ezberdinak eskaintzen ditu bai eta bideotik audioa eraustea.

Jaisteko tokia

Funtzionatzeko modua.

Bideoaren gainean jarri, eskuin klik egin eta copy video URL egingo dugu bideoaren helbidea kopiatzeko. Ondoren aplikazioa martxan jarriko dugu eta Paste url zanpatuko dugu. Aplikazioak hainbat kalitate jarriko digu aukeran edo audioa bakarrik jaistea. Bestetik jaisteko tokia eta fitxategiaren izena zehaztu behar dugu.

Bideoa jaisteko aukerak.

Baten batek agian galdetuko dio bere buruari: eta zertarako jaitsi web bideo bat? Bada irakasleen kasuan inportantea da, klasean bideoa erakutsi nahi baduzu kontuan izan behar da batzuetan bideoak desagertzen direla internetetik, bestetan behar den unean internet ez dabil eta dabilenean hain motela izaten da konexioa ezen bideoaren erreprodukzioa behin eta berriz eten egiten da. Arazo horiek bideoa jaitsita ekidin daitezke.

Aldaketen erregistroa Libreofficen

2011-07-22T01:02:00.001+02:00

El atareado blogean artikulu interesgarra jarri dute Libreofficen bertsioen kontrolari buruz. Horren euskaratze librea da mezu hau.

Kontua da dokumentu baten gainean egiten ditugun aldaketa guztiak: ezabaketak, eransketak eta atributu aldaketak dokumentuan bertan gordetzea eta edozein unetan ikusi ahal izaten aldaketok zeinek eta noiz egin dituen.

Nola funtzionatzen du

Aldaketak erregistra ditzan egingo dugu Editatu > Aldaketak eta Erregistroa markatuko dugu. Aldaketok ikusi nahi badugu Erakutsi ere markatuko dugu.

Biak aktibatuta badaude zerbait ezabatzean erditik marratuta ageriko da eta eransten dugun testua azpimarratua -itxura hauek alda daitezke Tresnak > Aukerak > Libreoffice > Aldaketak atalean:

Are gehiago erabiltzaile bat baino gehiago editatzen badu testua bere aldaketak beste kolore batez agertuko dira eta testuko aldaketa baten gainean jarriz gero ohar batek esango digu nor eta noiz eginikoa den aldaketa. Editore bat baino gehiago egonez gero agian komenigarriagoa izan daiteke Google Docs edo wiki bat erabiltzea.

Dokumentua hainbat fasetik pasatzen badu eta fase bakoitzaren argazkia egin nahi badugu dokumentuaren bertsioak gordeko ditugu: Fitxategia > Bertsioak

Bukatzeko, demagun aldaketen erregistrorik ez duen dokumentuaren kopia bat bidali behar dugula. Aldaketen erregistroa desagerarazteko dokumentuaren kopia bat egingo dugu eta kopia horretan egingo dugu Editatu > Aldaketak > Onartu edo ezetsi, eta denak onartuko ditugu.

Linux: nola programatu ekipoaren itzaltzea

2011-07-18T09:34:00.004+02:00

Gure eskolan, batez ere irakasle-gelan eta mintegietan, ekipoak sarritan piztuta gelditzen dira gau osoa eta asteburuetan. Arazo hori gertatzen da erabiltzaile finkorik ez duten ekipoetan; jendeak ez du itzaltzen uste duelako ondoren beste norbaitek erabiliko duela.

Lehengo batean idatzi nuen nola programa zitekeen ekipoaren itzaltzea erabiltzaile batean logeatuta. Hori bera egiteko aplikazio polit bat dago, Sentinella, Ubuntun software biltegitik instala daitekeena, eta aukera gehiago ematen ditu. Sentinela euskaraz ibiltzeko jaitsi fitxategi hau eta terminalean: sudo nautilus egin eta /usr/share/locale/eu/LC_MESSAGES izeneko karpetan itzatsi.

Baina eskolaren kasurako ez du balio, batetik ataza errepikakorrak ezin direlako programatu eta erabiltzaile bakarrerako balio duelako, alegia beste erabiltzaile baten saioan edo saio batean logeatu gabe ez dabil.

Harira. Nola programatu ekipoa egunero ordu zehatz batean itzal dadin edozein erabiltzaileren saioan egonda edo saiotik kanpo egonik ere.

Terminalean egin:

sudo gedit /etc/crontab

irekiko den fitxategian honako lerro bat erantsi:

00 22 * * *   root    shutdown -h now

Non
   00 minutuak diren,
   22 ordua,
   *    1-31 hilabeteko eguna. Izarñoak esan nahi du egunero.
   *    1-12 hilabetea
   *    asteko eguna: 1 astelehena, 2 asteartea...
   root aginduaren emailea den eta
   shutdown -h now aplikatu beharreko komandoa

Editatu ondoren gorde eta kito.

Oharrak:

Komeni da itzaltzeko ordua nahiko berandu ipintzea eta lankideak jakinaren gainean egotea. Ordua iritsita norbait lanean balego gordetzeko aukera eman gabe itzaliko zaio ekipoa.
Sintaxi horri segituz itzaltzeko ordua edo eta ekintza bera alda dezakezu.
Programazioa aldatzeko edo ezabatzeko berriz editatu behar da crontab fitxategia.
Sarean begiratuta crontab editatzeko beste modu txukunagoa badago, bai eta interfaze grafiko bat ere, gnome-schedule, baina horiekin ez dut lortu emaitza onik eta azaldutako metodoarekin bai.

OpenPYME enpresa txiki eta ertainentzako software librea

2011-07-13T00:04:00.003+02:00

Kanariak uhartetako La Laguna Unibertsitateko Software Librearen Bulegoak pyme, hau da enpresa txiki eta ertainentzako software librearen bilduma interesgarri bat osatu du. Hasierako orrian kategoriak agertzen dira: Ofimatika, finantzen kudeaketa, e-komertzioa...; kategoria hautatuta funtzionalitate horretako aplikazioak agertzen dira; aplikazioa hautatuta deskripzio txiki bat, zein sisteman dabilen eta jaisteko lotura.

Klika irudian OpenPYMEren web orrira joateko.

Enpresentzako ez ezik enpresari lotutako prestakuntza ematen duten ikasteentzako baliabide interesgarria.

Nola inprimatu irudi bat hainbat orritan

2011-07-12T00:55:00.000+02:00

Irudi batekin poster bat egin nahi baduzu inprimagailu arrunt batez, alegia dinA4 tamainako orriak erabiltzen duen inprimagailu batez, artisautzako lan fina egin beharko duzu edo Posterazor aplikazioa erabil dezakezu.

Aplikazio honek oso erabilera sinplea du: irudia kargatu, orientazioa hautatu eta zenbat orritan inprimatu nahi dugun zehaztu behar dugu. Aplikazioak pdf formatuko fitxategi bat sortuko du. Fitxategi honetan irudia orri beste zatitan dago eta zati hauek muntatzen dira zinta itsaskorrez edo kolaz itsasteko.

Irudi zatiak muntatzen dira eta kolatzeko espazioa dute.

Tamaina handian inprimatzean kalitatea mantentzeko irudia handia izatea komeni da, alegia pixel asko izan behar ditu.

Aplikazioa software librea da eta hiru sistema nagusietan instala daiteke: Ubuntun zuzenean software biltegitik, beste sistemetarako eta Linuxeko beste banaketetarako proiektuaren web orritik deskarga daiteke.

Luberri beste hizkuntzetan

2011-07-08T16:36:00.001+02:00

Sustatun irakurri dut Googlek web orriak itzultzeko gadgeta jarri duela eskuragai web editoreentzako. Kutxatxo bat sortzen du eta bertan aukera daiteke zein hizkuntzara itzuli web orria edo bloga.

Eskuin zutabean jarri dut. Egia esateko itzulpenak hain dira "bitxiak" laguntzarako baino barre egiteko balio dutela -eta hori zerbitzua betatik alphara pasa dutela-. Tira, besterik ez bada testuak gehituta itzulpenen kalitatea hobetu dezaten.

Nola aldatu favicona Blogger blog batean

2011-07-04T17:49:00.001+02:00

Favicon esaten zaio web orri baten fitxaren erlaitzean, izenaren ezkerrean, agertzen den ikono txikiari. Aldatu ezean Bloggerrekin egindako blogetan agertzen den favicona fondo laranjaren gaineko B bat da.

Blogger blog baten editorea bazara aukera duzu favicona aldatzeko. Lehenik eta behin faviconaren irudia sortu edo bestela irudi bat aukeratu behar duzu (aukera zabala duzu openclipart.org, Creative Commons). Ondoren tamaina eta formatua emateko gutxienez bi aukera daude:

Aukera bat Gimpen editatzea da. Irudiari forma karratua eman, 32x32 pixeleko tamainara eraman eta gorde ico formatuarekin.
Beste aukera bat da Genfavicon.com orria erabiltzea. Arakatuz hautatu nahi duzun irudia eta igo, irudia doitu eta ico formatuarekin jaitsi.

Irudia ico formatuan dugula gure Blogger blogera joan, saioa hasi eta dugu Bloggerren eta Desingn atal edo fitxara joan, bertan Favicon Edit klika, arakatuz hautatu sortutako ico fitxategia eta gorde diseinua.

Nabigadorean zure bloga ireki eta, dena ondo joan bada, zure favicona agertuko da fitxan.

Plataforma bat erabili beharrean web orria editore batez osatzen baduzu eta gero
internetera igotzen baduzu favicona eta titulua aldatzeko kontsultatzen ahal duzu beste mezu hau.

Munduko mapak sarean

2011-07-02T18:34:00.000+02:00

Etorri da uda eta opor garaia. Sasoi ezin hobeagoa etxe ondoko zein munduko beste munduko bazterrak arakatzeko.
Arakatze horiek egiteko mapak baliabide interesgarriak dira. Karpeta bat baino gehiago dut paperezko mapaz beteta eta, egia esateko, ez ditut lehen beste erabiltzen zeren eta gaur egun sarean daudenak hobeak agian ez baina erabiltzeko errazak izateaz gain bilatzeko, neurtzeko eta informazio osagarria lortzeko tresna egokiak dituzte. GIS metodologia erabiltzen dute, hau da geruzaz osatuta daude eta geruza bakoitzak informazio mota bat ematen du: altitudeak, izenak, bideak...

Hona ekarriko ditut nire ustez erabilgarrienak, batetik eskura izateko eta bestetik haien arteko aldeak ikusteko. Diferentzia horiek hobeto ikusteko sailkapen txiki bat egingo dut:

Osatzeko eraren arabera:

Mapa tradizionalak, sestra-kurbadunak.
Satelitetik edo hegazkinetik ateratako argazkiz osatutakoak.

Dimentsioen arabera:

lauak.
erliebedunak.

Datuak biltzeko modua eta hauen patentearen arabera:

Pribatuak
Libreak, wikiak: datuak norberak sartu eta osa ditzake eta erabilera librea da.

Diferentziak hobeto atzemateko ireki dezakezu bakoitza fitxa batean (irudiaren gainean jarri eta klik egin saguaren gurpilarekin) eta gero fitxaz fitxa ibili. Pasaiako badia aukeratu dut orografia berezia duelako eta zati txiki batean mendia, hirigune eta bideak eta bestelako elementuak agertzen direlako. Egin kontu ere toponimian eta euskararen erabileran.

Lehenengo hiru irudiak Google Maps orrikoak dira: satelite, erliebea eta mapa arrunta.

Ondoren wikiak, libreak: OpenStreetMap (Euskal Mapa), OpenCycleMap eta Wikimapia. Euskal Mapa eta OpenCycleMap OpenStreetMap-ean oinarritzen dira: lehenengoan munduko izen ezagunenak euskaraz agertzen dira eta bigarrenean sestra-kurbak.

Azkenik Google Earth erliebeaz gain hiru dimentsio efektuak lortzen duena behatze planoa aldatuta.

Nola bertsio berritu Thunderbird 5era Ubuntun

2011-06-30T00:48:00.005+02:00

Thunderbird Mozillaren posta bezeroa da eta bere anaia den Firefox nabigatzailea bezala bertsio berritze sistema aldatu du: biek laburtu dituzte bertsioen bizitza. Ez dakit horrekin bere burua berritzen behartu nahi duten, berritze itxura ote den, sistema batzuen sei hilabeteko bertsio berritzera egokitu nahi ote duten edo bestelakoa den taktika honen arrazoia.

Thunderbirden kasuan 3.1 bertsiotik 5 bertsiora egin du salto 4tik pasa gabe Firefoxekin bertsio zenbakia partekatzeko asmoz.

Harira. Bertsio berri honek funtsezko aldaketari ez du, eta hauek dira aldaketa nabarmenenak:
Mozillaren Gecko 5 motorea erabiliko du hemendik aurrera.
Kontuak sortzeko morroia aldatu dute kontuen ezarpenak markatzeko prozesua errazteko.
Mezuen fitxen ordena aldatzeko aukera sartu dute.
Postari erantsitako fitxategien tamainak ikusiko dira.
Gehigarrien kudeatzaileak Firefoxenaren itxura hartu du.

Instalatzeko aginduak kopiatu eta terminalean itsatsi eta exekutatu behar duzu. Thunderbirden bertsio berritzea orain egin nahi baduzu Mozillaren APPa edo bertsio egonkorren biltegia erantsi behar duzu:

sudo add-apt-repository ppa:mozillateam/thunderbird-stable

Ondoren software biltegiak eguneratu,

sudo apt-get update

bertsio berriak instalatu,

sudo apt-get upgrade

Ondoren gehigarriak eguneratu behar dugu. Gehigarrien programadoreak zoratuta omen dabiltza bertsio berritze erritmo zoro honekin zeren eta etengabe egokitu behar dituzte. Nik Lightning eta Zindus erabiltzen ditut, lehenengoa egutegi-agenda eta bigarrena Gmailekin kontaktuak eta karpetak sinkronizatzeko. Lehenengoa automatikoki eguneratzen da eta bigarrena, Zindus, eguneratzeko hemendik deskargatu behar da, ondoren Thunderbirden egin behar da: Tresnak > Gehigarriak eta bilaketa leihoaren ezkerrean agertzen den giltzaren aukeretan hauta "Instalatu gehigarria fitxategitik..." deskargen karpeta arakatu eta hautatu Zindusen fitxategia.

Ez baduzu posta bezerorik erabiltzen eta merezi ote duen dudatan bazaude nire gomendioa da instalatzea normalean posta irakurri eta idazten duzun ekipoan, batez ere posta kontu bat baino gehiago erabiltzen baduzu; postaren gestioa azkartzen da, postak batera ekartzen ditu eta kontaktuak kontu guztietarako erabiltzen dira. Ubuntuk Evolution posta-bezeroa instalatzen du baina Thunderbird frogatu nahi baduzu instala dezakezu terminalean itsatsita:

sudo apt-get install thunderbird

Unity dela eta Ubuntuk distroen lidergoa galdu du

2011-06-28T23:19:00.000+02:00

Distrowatch orriaren arabera Ubuntuk galdu du azken urteetan Linuxen banaketen artean izan duen lidergoa eta postu hori hartu duena Ubuntun oinarritzen den LinuxMint distribuzioa da.

Argi dago kolpearen arrazoia Unity interfazea dela. Unityrekin Canonical enpresak smartphonen itxura eta jokabidea bilatu erabiltzaile berriak irabaztearren baina badirudi Linux erabiltzaile esperientziadun askok ez dutela ongi hartu aldaketa eta beste banaketara jo dutela.

Ubuntu: fitxategiak ezabatu memoria txarteletik, USB memoriatik edo kanpoko disko batetik

2011-06-25T00:17:00.001+02:00

USB memoria batetik, txarteletik, USB disko batetik edo sareko unitate batetik fitxategi bat ezabatzen dugunean ez da desagertzen eta ez du tokia askatzen, aitzitik .trashxxxx izeneko zakarrontzi-karpetara joaten da -non xxxx ezabaketa egin duen erabiltzaile-zenbakia den-. Zakarrontzira joateak bere onurak ditu, besteak beste ezabatutako fitxategiak berreskuratu ahal izatea; baina zakarrontzi hauek ezkutukoak dira, ez dira ikusten, eta gerta daiteke ustez hutsik dagoen memoria-txartela kargatu argazki kameran eta argazki gutxi batzuk eginda "txartela beteta" mezua agertzea edo pendrivean ustez sartu behar zen informazioa aski tokirik ez izatea.

Soluzioa; bat baino gehiago:

Gailua -dela txartela, pendrive, usb-diskoa, atera baino lehen arakatzailean desmuntzateko esaten badugu leiho bat aterako da zakarrontzia hustea nahi ote dugun. Baietz esaten badugu tokia libratzen da.

Beste aukera bat tarteka zakarrontzi hauek ezabatzea da. Horretarako gailua ireki eta ezkutuk fitxategi eta karpetak ikustea eskatu (Ikusi > Erakutsi ezkutuko fitxategiak) edo Ctrl+h egin. Behin agerian agertzen direla delako .trash horiek, hauta eta ezaba itzazu.

Bururatzen zaidan hirugarren aukera Nautilus arakatzailean benetako ezabaketa gaitzea da. Horretarako arakatzailea irekita dugula menuan egingo dugu Editatu > Hobespenak > Portaera eta atal honen beheko partean dagoen "Sartu zakarrontzia saltatuko duen "Ezabatu" komandoa" aktibatu. Hori eginez gero edozein fitxategi edo karpetan eskuin klik egitean "zakarrontzira bota"ren azpian "ezabatu" agertuko da. Bigarren aukera honez erabat ezabatzen du, zakarrontzitik pasa gabe. Antzeko emaitza du objektua hautatu ondoren Shift+Supr egiteak.

Irudiak Open Clip Art Librarytik hartuak.

Nola instalatu Firefox 5 Ubuntun.

2011-06-24T01:32:00.002+02:00

Gaur jarri dute Firefox 5 bertsio egonkorren biltegian, beraz instalatu nahi baduzu aski duzu Firefoxen PPA instalatzea era honetan: ireki terminal bat (Aplikazioak > Gehigarriak > Terminala, edo Ctrl+Alt+t) eta exekutatu, hurrenez hurren, agindu hauek:

sudo add-apt-repository ppa:mozillateam/firefox-stable
sudo apt-get update
sudo apt-get upgrade

sudo apt-get install firefox-locale-eu

Lehenengo aginduak Firefoxen bertsio egonkorren biltegia instalatzen du; Firefox 4 instalatzeko jarri bazenuen nahiko izango duzu azken bi aginduak exekutatzea, alegia sistema eguneratzen dutenak.
Behin instalatuta saiatuko da gehigarriak eguneratzen eta baliteke baten bat bateragarria ez izatea. Niri Fast Dial-ekin gertatu zait. Seguru egun gutxi batzuk barru ateratzen dutela bertsio bateragarria.

Itxuraren aldetik ez dago aldaketa nabarmenik. Aldaketak barrukoak dira eta horien berri jakin nahi baduzu librezaleak.org orrian topa ditzakezu.

Euskarazko testuen OCRa

2011-06-23T18:38:00.000+02:00

Gaur Gipuzkoako Foru Aldundia albiste onen iturria da. Aginte kontuak aparte utzita Diputazioak eskuragarri jarri du gaur Gipuzkoamatic etiketapean hainbat web sortzeko martxan jarri dituen zerbitzu eta api batzuk, besteak beste B5M mapak, testu idatzien irakurketa automatikoa eta euskal testuen karaktere-ezagutza optikoa edo OCRa. Albistea eta bideo-animazio argigarri bat topa dezakezu Sustatun edo Zuzeun. Hortik abiatuta hasi naiz kuskuseatzen: OCRa frogatu dut eta esan behar dut oso ondo dabilela. Aldez aurretik zerbitzu hauek erabili ahal izateko erregistratu behar da: izen eta helbide elektroniko bat eman eta bidaltzen duten posta baten bidez egiaztatu behar da -nabigatzaileak gogoratuko ditu datuok-. Behin erregistratuta, logeatu behar da, alegia izena eta pasahitza emanda sartu behar da, eta hainbat zerbitzu eskainiko dizkigu, tartean OCRa.

OCR zerbitzuaren interfazea. Ezkerreko aldean beste hainbat zerbitzu.

Irudi batetik abiatuta haren testu editagarria da OCR zerbitzua eskaintzen duena. Irudia liburu bat edo beste dokumentu bat eskaneatuta edo argazkia aterata lortuko dugu. Testua derrigor euskaraz egon behar du. Arakatu leihoan klikatu bilatu eta hautatuko dugu irudia eta Bidali botoian klikatuko dugu igotzeko; segundo gutxi batzuetan deskargatzeko bidaliko digute testua rtf formatuan; dokumentua gorde eta edozein testu prozesadorean ireki ahal izango dugu.

OCR sistemetan kontua da testutik zenbat ezagutzen duen, zeren eta ez badu guztia edo gehiena ezagutzen denbora luzea eman behar da delako testua zuzentzen. Alde horretatik pare bat froga egin ditut eta emaitzak oso onak izan dira, argazki kaskar samar batetik zutabeetan zegoen testua ia ia osorik ezagutu du.

Ezkerrean egunkari zati baten argazkia eta eskuinean OCR zerbitzuak bueltatutako testu editagarria. Klika irudian handiagoa ikusteko.

Zerbitzua oso interesgarria da, batetik web zerbitzu bat delako eta, beraz, ez dugu ordenagailuan aplikaziorik instalatu behar, eta konexioa duen edozein ekipotik erabil dezakegulako. Bestetik Linuxerako ere oso baliagarria da zeren eta sistema honetan dauden OCR aplikazioek ez dute, euskararen kasuan bederen, emaitza txukunik ematen.

Zerbitzuaren helbidea aldrebes samarra da: http://ezp.gipuzkoa2.net/?q=OCR
Blog honen ezkerreko zutabean dagoen Web zerbitzuak izeneko orrian jarri dut OCR atalean.

Aspaldi hartu zuen Gipuzkoako Foru Aldundia jarrera egokia formatu irekiez, informazioa zalbaltzeaz eta hiritarrok ordaindutako zerbitzuak nolabait hiritarrei zabaltzen. Hemendik aurrera aukera paregabea du horretan sakontzeko eta urratsak emateko software librearen erabileran.

Arista Transcoder bideo bihurtzailea

2011-06-23T00:25:00.001+02:00

Linuxen ez dut topatu Windowserako Format Factory bezain osoa den
bideo-formatu bihurtzailea baina Arista Transcoder oso interesgarria
iruditu zait. Bideo bat formatuz aldatu nahi baduzu -tamaina txikitzeko,
erreproduzitzeko arazo gutxiago izateko...- Arista aplikazio sinplea da, azkarra,
eta, aukera gutxi ematen baditu ere, oso formatu interesgarriak ditu, hala nola Mp4-H.264, Matroska-Theora, Flv eta, batez ere, WebM bideo-konpresio formatua.

Ubuntun instalatzeko software-biltegitik egin daiteke. Ubunturen azken bertsioa ez baduzu edo Software biltegirik ez baduzu eta azken bertsioa instalatu nahi baduzu PPA biltegia zehaztuta instala dezakezu; horretarako terminala ireki eta hurrenez hurren hiru agindu hauek exekuta itzazu:

sudo add-apt-repository ppa:webupd8team/arista
sudo apt-get update
sudo apt-get install arista

Hauta daiteke fitxategi bat konbertitzeko ala disko edo karpeta batean dauden fitxategi guztiak. Jatorrizko fitxategiak mantentzen ditu.

Konbertsioa irauten duen bitartean bideoaren erreprodukzio txikia ikus daiteke.

Ubunturen software-biltegitik instala daiteke eta Soinu eta bideo atalean kokatzen da.

Azpitituluen fitxategia badugu, bideo fitxategiaren izen bera badu eta bideo fitxategiaren karpeta berean badago Aristak azpitituluak itsasten ditu bideoan. Aukera hau interesgarria da kontuan izanik Subtitulator, azpitituluak bideoan itsasteko aplikazioa, soilik AVI fitxategiekin funtzionatzen duela.

The Borrower Arriette filma azpitituluak itsatsita duela

Duzun filma DivX kodeka ez badu eta DVD erreproduzigailu batean ikusi nahi baduzu aukerarik egokiena, nire ustez, DVD player PAL DVD da aukerarik egokiena.

Ubuntu: nola sortu fitxategi eta karpeten estekak

2011-06-21T23:03:00.001+02:00

Ez da modu bakarra baina bai errazena. Estekatu nahi duzun fitxategi edo karpetaren gainean jarri, klika saguaren gurpilean -edo erdiko botoian- eta herrestan eraman mahaigainera edo esteka utzi nahi duzun karpetan, askatzean menu txiki batek emango dizu aukera eramateko, kopiatzeko edo estekatzeko; hirugarrena hautatu eta kito.

Hiru ohar.
Estekak sortzeko modu hau erraza izateaz gain funtzionatzen duen bakarra da estekatu beharreko fitxategia edo karpeta ekipotik kanpo sarean konpartitutako karpeta batean dagoenean.
Esteka hauei Linuxen sinbolikoak edo bigunak esaten zaie. Esteka ezabatzen baduzu jatorrizkoa ez du kalterik hartzen. Jatorrizkoa ezabatuz gero esteka zurtz geratzen da.
Erabiltzaile bat baino gehiago badago ekipoan estekak erabili daitezke karpetak konpartitzeko. Kasu horretan karpetaren jabeak haren propietateetan baimenak alda ditzake beste erabiltzaileei eskubide gehiago emateko.

Luistxo Fernandez software libre eta enpresaz

2011-06-16T23:11:00.000+02:00

Luistxo Fernandez CodeSyntax enpresako partaideak elkarrizketa batean jardun du software libre eta enpresaz, beti bezain argigarri eta etxeko. Bereziki interesgarria iruditu zait software librearen erabilerak nola indartu dezake enpresaren erantzukizun soziala. Aspaldi ez nuen termino hori entzuten, ez behintzat Aurrezki Kutxaren kutsurik gabe.

Elkarrizketa Zortzigarren Lurraldea proiekturako egin dute eta blogean edukien kontzeptu mapa eta guzti ikus daiteke.

Nola eman baja zenbait sare sozialetan

2011-06-14T16:41:00.000+02:00

by Luc Legay

Dela esperientziak ez zaituelako gogobete, funtsik ez diozulako topatu, ez duzulako zure datuak konpainia erraldoien eskuetan utzi nahi edo dena delakoagatik Facebook, Twitter, MySpace edo Tuenti-tik baja eman nahi baduzu hona hemen esteka batzuk lagunduko dizutenak, ez baitute erraz jartzen:

Facebook. Baja hartzeko esteka honetara jo dezakezu eta ematen dituen jarraibideak segi. Lanak egin ondoren hamalau egunez baja behin behinekoa izango da eta epe horretan atzera egin dezakezu.

Twitter. Esteka honetatik ezabatzen da "eliminar la cuenta" sakatuta. Baja une horretan hartzen da eta ezin dira ez kontua ez datuak berreskuratu.

MySpace. Baja hartzeko esketa honetan klika eta "cancelar la cuenta" egin.

Tuenti. Behin behineko baja har daiteke kontuaren ezarpenetatik edo behin betikoa esteka honetan abiatuta -arrazoi bat eman behar da-.

Informazio iturria: Consumer

Lur entziklopediako edukiak Wikipediara

2011-06-12T23:06:00.000+02:00

EAEko Hizkuntza Politikak bere jarrera argitu du. Iazko azaroan esan zuen 200.000 euro zituela euskarazko entziklopedia bat sortzeko edo Wikipediarekin hitzarmen bat egiteko.

Badirudi azkenean 169.000 euroko partida bat -zer gertatu da gainerako 31.000ekin?- jarriko duela lehiaketa publiko baten bidez bere jabetzakoak diren Lur Entziklopediako edukiak egokituta Wikipediara sartzeko.

Azaroko egoera Sustatun
Albistea Euskadi+Innovan